ബിജെപി നേതാവുൾപ്പെടെ 3 പേർ അറസ്റ്റിൽ

പാലാ

സൈബർ തട്ടിപ്പ് കേസുകളിൽ പങ്കാളികളായ ബിജെപി മുൻ നിയോജക മണ്ഡലം പ്രസിഡന്റുൾപ്പെടെ മൂന്ന് പേർ അറസ്റ്റിൽ. പുലിയന്നൂർ പനയ്ക്കൽ മോഹനൻ(52), ചെത്തിമറ്റം വലിയകാപ്പിൽ അലൻ തോമസ്(22), ചെത്തിമറ്റം സ്വദേശി ബി കെ ഹരികൃഷ്ണൻ(25) എന്നിവരെയാണ് പാലാ പൊലീസ് അറസ്റ്റ് ചെയ്തത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. ബിജെപി നിയോജകമണ്ഡലം പ്രസിഡന്റായിരിക്കേ പുലിയന്നൂർ ക്ഷേത്രത്തിന് സമീപം ചാരായം വാറ്റിയ കേസിലുൾപ്പെടെ ക്രിമിനൽ കേസുകളിൽ പ്രതിയാണ് മോഹനൻ പനയ്ക്കൽ. പിന്നീട് ഭാരവാഹിസ്ഥാനത്തുനിന്ന് മാറ്റിയെങ്കിലും ഇയാൾ ഇപ്പോഴും ബിജെപി സംഘപരിവാർ സംഘടനകളിൽ സജീവമാണ്. രാജ്യത്തിന്റെ വിവിധ ഭാഗങ്ങളിൽ രജിസ്റ്റർ ചെയ്ത സൈബർ തട്ടിപ്പ് കേസുകളിലെ പരാതിക്കാർക്ക് നഷ്ടപ്പെട്ട പണം ചെക്ക് വഴിയോ, എടിഎം വഴിയോ പിൻവലിച്ച് തട്ടിപ്പുകാർക്ക് സഹായം ചെയ്തു പ്രതിഫലം വാങ്ങിക്കുന്ന സംഘത്തിൽപ്പെട്ടവരാണ് ഇവർ. പാലാ കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു. ​ മോഹനന്റെ അക്കൗണ്ടിലേക്ക് 56 ദിവസത്തിനിടെ 2.17 കോടി രൂപ എത്തിയതായി പൊലീസ് കണ്ടെത്തിയിട്ടുണ്ട്. 30,000 രൂപയിലേറെ കമീഷൻ കിട്ടിയതായും പ്രതി പൊലീസിനോട് സമ്മതിച്ചിട്ടുണ്ട്. എന്നാൽ ഇതിലും എത്രയോ ഇരിട്ടി കമീഷൻ കിട്ടിയതായാണ് പൊലീസിന്റെ നിഗമനം. അലൻ തോമസിന്റെ അക്കൗണ്ടിലേക്ക് 2.65 ലക്ഷം രൂപയും എത്തിയതായി പരിശോധനയിൽ കണ്ടെത്തി. മഹാരാഷ്ട്ര, തെലുങ്കാന, ഉത്തർപ്രദേശ്, ഗുജറാത്ത് സംസ്ഥാനങ്ങളിൽ രജിസ്റ്റർ ചെയ്ത കേസുകളുടെ മ്യൂൾ അക്കൗണ്ടുകളാണ് പാലായിൽ കണ്ടെത്തിയിരിക്കുന്നത്.