ഉള്ളൂരിനെ കമ്യൂണിസ്റ്റാക്കിയ വിമോചനസമരക്കാർ

കുട്ടികളെ വഴിതെറ്റിക്കുന്ന ഏതാനും ‘കമ്യൂണിസ്റ്റ്‌ എഴുത്തുകാരെപ്പറ്റി പറയാം. ഉള്ളൂർ എസ്‌ പരമേശ്വരയ്യർ, വൈലോപ്പിള്ളി ശ്രീധരമേനോൻ, ഒളപ്പമണ്ണ, ജി കുമാരപിള്ള, സർദാർ കെ എം പണിക്കർ തുടങ്ങിയ കവികൾ, പിന്നെ വൈക്കം മുഹമ്മദ്‌ ബഷീർ എന്ന ഒരു കഥാകാരൻ. 1958‐ൽ ഇ എം എസ്‌ സർക്കാരിനെ താഴെയിറക്കാൻ വിമോചനസമരം നയിച്ചവർ രാഷ്‌ട്രപതിക്ക്‌ നൽകിയ നിവേദനങ്ങളിൽ ഒന്നിലാണ്‌ ഈ ‘അപകടകാരി’കളുടെ പേരുകൾ.

കേരള സ്‌കൂൾ മാനേജേഴ്‌സ്‌ അസോസിയേഷൻ പ്രസിഡന്റ്‌ വി ഒ എബ്രഹാം നൽകിയ നിവേദനത്തിന്റെ കവറിങ് ലെറ്റർ

വിമോചനസമരത്തിൽ നിഴൽയുദ്ധങ്ങൾ ഏറെയായിരുന്നു. വിദ്യാഭ്യാസ ബില്ലിനെതിരെ നേരിട്ടുള്ള സമരത്തിനൊപ്പമാണ്‌ ‘കുട്ടികളെ ധാർമികമായി അധഃപതിപ്പിക്കുന്നതും ദൈവവിരുദ്ധ’വുമായ പുസ്‌തകങ്ങൾക്കെതിരെ ഉയർത്തിയ കോലാഹലം. സമരത്തിൽ സംഘടിത വലതുപക്ഷത്തിനൊപ്പം സജീവമായി നിന്ന കേരള സ്‌കൂൾ മാനേജേഴ്‌സ്‌ അസോസിയേഷൻ 19 പേജുള്ള നിവേദനമാണ്‌ രാഷ്‌ട്രപതിക്ക്‌ നൽകിയത്‌. ‘കുട്ടികളിൽ കമ്യൂണിസ്റ്റ്‌ ആശയം നിറയ്‌ക്കുന്നതിന്റെ അപകടവും ഗൗരവവും പരിഗണിച്ച്‌, കേരളത്തിനുമേൽ വീണ ശാപം രാജ്യത്തെ മറ്റു സംസ്ഥാനങ്ങൾക്കുമേൽ ഉണ്ടാകാതിരിക്കാനാണ്‌ നിവേദനമെന്നും അവകാശപ്പെടുന്നുണ്ട്‌.

പലഭാഗങ്ങളുള്ള രേഖയിൽ ആദ്യഭാഗങ്ങളിൽ സാമൂഹ്യപാഠത്തിൽ റഷ്യയെയും ചൈനയെയും മഹത്വവൽക്കരിക്കുന്നു, കമ്യൂണിസ്റ്റ്‌ സമരങ്ങളെപ്പറ്റി പറയുന്നു എന്നൊക്കെയാണ്‌ ആരോപണം. (ശാസ്‌ത്രപുസ്‌തകങ്ങളിൽ ഡാർവിന്റെ പരിണാമ സിദ്ധാന്തം പഠിപ്പിച്ച്‌ കുട്ടികളെ ദൈവവിരുദ്ധരാക്കുന്നതിനെപ്പറ്റി മറ്റൊരു വിശദമായ ലഘുലേഖതന്നെ സമരക്കാർ ഇറക്കിയിരുന്നു.)

കവിതകൾക്കെതിരെ ആക്ഷേപം ഉയർത്തുന്ന നിവേദനഭാഗം

നിവേദനത്തിന്റെ അവസാനഭാഗം സാഹിത്യ പുസ്‌തകങ്ങൾക്കെതിരെയാണ്‌. മലയാള പദ്യപാഠാവലിയായി മൂന്ന്‌ ക്ലാസിലേക്കുള്ള മൂന്ന്‌ പുസ്‌തകങ്ങളാണ്‌ പ്രസിദ്ധീകരിച്ചിരുന്നത്‌. മൂന്നിനുമെതിരെ ആരോപണങ്ങൾ കാണാം. രസകരമാണ്‌ സ്‌കൂൾ മുതലാളിമാരുടെ കവിതാവ്യാഖ്യാനം.

ഒന്നാം പുസ്‌തകത്തിൽ നാലാം പാഠമായി ചേർത്ത, എക്കാലത്തും യാഥാസ്ഥിതികനായിരുന്ന ഉള്ളൂർ എസ്‌ പരമേശ്വരയ്യരുടെ ‘മായാഭ്രമം’ എന്ന കവിതയാണ്‌ ആദ്യ പ്രതി. മരണം കാത്തുകിടക്കുമ്പോൾ ഭൗതിക ജീവിതസുഖങ്ങൾ ആഗ്രഹിക്കുന്ന പുരോഹിതനെ ചിത്രീകരിക്കുന്ന കവിത കുട്ടികളിൽ പുരോഹിതന്മാരോട്‌ വെറുപ്പ്‌ തോന്നിപ്പിക്കും എന്നതാണ്‌ കുറ്റം. ഉള്ളൂരിന്റെ ഈ കവിതതന്നെ തെരഞ്ഞെടുത്തത്‌ ഈ ദുരുദ്ദേശ്യത്തോടെയാണെന്ന ആരോപണവുമുണ്ട്‌.

അടുത്ത കുന്തമുന ഒളപ്പമണ്ണക്കെതിരെയാണ്‌. കവി കാമോദ്ദീപകമായ കവിതകൾ എഴുതുന്നതിൽ ‘കുപ്രസിദ്ധനാ’ണെന്നാണ്‌ നിവേദനം പറയുന്നത്‌. പാഠപുസ്‌തകത്തിലെ ‘കവിയോട്‌’ എന്ന കവിത സ്വർഗം മിഥ്യയാണെന്നും ഈ ലോകത്തെ ജീവിതമേയുള്ളൂ യാഥാർഥ്യമെന്നും പറയുന്നു. ഇത്‌ ഭൗതികവാദം വളർത്താനുള്ള ശ്രമമല്ലാതെ മറ്റെന്താണ്‌?‐ എന്നാണ്‌ ചോദ്യം.

ഉള്ളൂർ

രണ്ടാമത്തെ പുസ്‌തകത്തിലെ ആദ്യ ഇര വൈലോപ്പിള്ളിയാണ്‌. അദ്ദേഹത്തിന്റെ പ്രസിദ്ധ കവിതയായ ‘ആസാം പണിക്കാർ’ പുസ്‌തകത്തിൽ ഉണ്ടായിരുന്നു. കവിതയിലെ

‘തടുക്കില്ലമ്പലം; തടുക്കില്ല പള്ളി

പടച്ചവനിപ്പോൾ പരദേശത്തിലോ?’

എന്ന വരിയിലാണ്‌ കടന്നുപിടിച്ചത്‌. വരികൾ ഇംഗ്ലീഷിലാക്കി നിവേദനത്തിൽ ചേർത്തിട്ടുണ്ട്‌. നമ്മുടെ രാജ്യത്ത്‌ ദൈവംതന്നെ ഇല്ലെന്നല്ലേ കവിത പറയുന്നത്‌? ദാരിദ്ര്യത്തിന്‌ ദൈവത്തെ പഴിക്കുന്നത്‌ കമ്യൂണിസ്റ്റുകാരുടെ സ്ഥിരം രീതിയാണ്‌. ദൈവവിശ്വാസത്തോട്‌ അവമതിപ്പുണ്ടാക്കാനാണിത്‌. ‘‘ദൈവം എല്ലാവരെയും തികവോടെ സൃഷ്‌ടിച്ചിരുന്നെങ്കിൽ സ്‌നേഹത്തിനും സേവനത്തിനും ത്യാഗത്തിനും അവസരം എവിടെയും കിട്ടാതാകില്ലേ?’’ എന്ന ‘ഞെട്ടിക്കുന്ന’ ചോദ്യവും ഈ ‘കവിതാനിരൂപണ’ത്തിലുണ്ട്‌.

‘അറിയുമേ ഞങ്ങളറിയുമീ നാടു

നരകമാക്കിടും നരകീടങ്ങളെ.

പഹയന്മാരോടു പകരം വീട്ടട്ടെ

പകയിൽ നീറുന്ന വരുന്ന കാലങ്ങൾ!’

ഈ വരി പരിഭാഷപ്പെടുത്തി കവി വർഗസമരത്തിന്‌ ആഹ്വാനം ചെയ്യുന്നതിനു ‘തെളിവും’ നൽകുന്നു.

ജി കുമാരപിള്ള

ഇതേ പുസ്‌തകത്തിലെ സർദാർ കെ എം പണിക്കരുടെ ‘ഇങ്ക്വിലാബ്‌’ എന്ന കവിത പാശ്‌ചാത്യരാജ്യങ്ങളിലെ ജീവിതമികവ്‌ കാണാതെ കമ്യൂണിസ്റ്റ്‌ രാജ്യങ്ങളെ പ്രശംസിക്കുന്നു എന്ന ‘പാപ’മാണ്‌ ചെയ്‌തത്‌. പല രാജ്യങ്ങളിൽ സ്ഥാനപതിയായി പ്രവർത്തിച്ച സർദാർ കെ എം പണിക്കരിൽനിന്ന്‌ ഇത്‌ പ്രതീക്ഷിച്ചില്ലെന്നും പറയുന്നുണ്ട്‌. മൂന്നാം പുസ്‌തകത്തിൽ പി ഭാസ്‌കരൻ എഴുതിയ ‘ഹിരോഷിമയിലെ അമ്മ’ എന്ന കവിതക്കെതിരെയാണ്‌ ആക്രമണം. അമേരിക്കയോട്‌ വെറുപ്പ്‌ വളർത്താനാണ്‌ ഈ കവിത. എന്തുകൊണ്ട്‌ ഹംഗറിയിലെ അമ്മയെപ്പറ്റി കവി എഴുതിയില്ല എന്ന കഠിനചോദ്യവും നിവേദനത്തിൽ കാണാം.

ഒളപ്പമണ്ണ

തികഞ്ഞ ഗാന്ധിയനായിരുന്ന ജി കുമാരപിള്ളയുടെ ‘സ്‌നേഹദൂതൻ’ എന്ന കവിതക്കെതിരെയാണ്‌ പിന്നത്തെ വെടിവയ്‌പ്പ്‌. ക്രിസ്‌തുവിനെ സ്‌തുതിക്കുന്നതായി ഭാവിച്ച്‌ പുരോഹിതന്മാരെ ഇകഴ്‌ത്തുന്നു എന്നതാണ്‌ പ്രശ്‌നം. നിവേദനത്തിൽ പറയുന്നില്ലെങ്കിലും പുറത്ത്‌ പ്രചരിപ്പിച്ച ലഘുലേഖയിൽ സുഗതകുമാരിയുടെ ‘അഭയാർഥിനി’ എന്ന കവിതക്കെതിരെയും വിഷം ചീറ്റിയിരുന്നു. ‘കവിതാനിരൂപണം’ പൂർത്തിയാക്കിയശേഷം നോൺ ഡീറ്റെയിൽഡ്‌ പുസ്‌തകമായ വൈക്കം മുഹമ്മദ്‌ ബഷീറിന്റെ ‘ന്റുപ്പൂപ്പാക്കൊരാനേണ്ടാർന്ന്’എന്ന ലഘുനോവലിലേക്ക്‌ കടക്കുന്നു.

പി ഭാസ്‌കരൻ

‘മുസ്ലീം സമുദായത്തിന്റെ പിന്നാമ്പുറത്തെ അഴുക്കും അസംബന്ധങ്ങളും നിറച്ച ഈ പുസ്‌തകം പഠിച്ചാൽ കുട്ടികളുടെ ഭാഷപോലും നശിക്കും’ എന്ന്‌ നിവേദനം നിരീക്ഷിക്കുന്നു. പരിഷ്‌കൃതസമൂഹത്തിൽ പറയാൻപാടില്ലാത്ത പലതും വിളിച്ചു പറയുന്ന പുസ്‌തകം എന്ന ആക്ഷേപവുമുണ്ട്‌. പ്രധാനമന്ത്രിക്കും മന്ത്രിമാർക്കും അയച്ച നിവേദനം കേന്ദ്രസർക്കാർ കേരളമന്ത്രിസഭയെ പിരിച്ചുവിടാൻ ഒരുക്കിയ ആയുധങ്ങൾക്കൊപ്പം ഫയലിൽ സൂക്ഷിച്ചിരുന്നതായി നാഷണൽ ആർക്കൈവ്‌ രേഖകൾ തെളിവുനൽകുന്നു.

ബഷീറിന്റെ പുസ്‌തകത്തിനെതിരെ രംഗത്തുവന്നവരിൽ മുസ്ലീംലീഗ്‌ നേതാക്കളും ഉണ്ടായിരുന്നു. വിഷയം നിയമസഭയിലുമെത്തി. പാഠപുസ്‌തകത്തിൽ കമ്യൂണിസം ഉണ്ടോ എന്നറിയാൻ സർക്കാർ കമ്മിറ്റിയെ വച്ചു. കമ്മിറ്റി കാര്യമായ പ്രശ്‌നങ്ങൾ ഒന്നും കണ്ടെത്തിയില്ല. കേരളത്തിന്റെ രാഷ്‌ട്രീയ‐സാംസ്‌കാരിക ശരീരത്തിൽ വിമോചനസമരം ഏൽപ്പിച്ച പരിക്കുകളുടെ ആഴം വ്യക്തമാക്കുന്ന രേഖകളിൽ ഒന്നായി ഈ നിവേദനവും ചരിത്രത്തിൽ ഇടം നേടുന്നു .