ആരായിരുന്നു ആ ‘ഭാസ്‌കരൻ നായർ’?

1956 ഫെബ്രുവരി ആറുമുതൽ 12 വരെ ആലുവ ഐക്യകേരള നഗറിൽ നടന്ന ഇന്ത്യൻ കമ്യൂണിസ്റ്റ്‌ പാർടി തിരു‐കൊച്ചി സംസ്ഥാന സമ്മേളനത്തിന്റെ ക്രഡൻഷ്യൽ കമ്മിറ്റി പാനലിൽ ഭാസ്‌കരൻ നായർ (തിരുവല്ല) എന്നൊരു പേരുണ്ടായിരുന്നു (രേഖ കാണുക). ആ പേരിൽ അറിയപ്പെടുന്ന ഒരു നേതാവ്‌ അന്നു തിരു‐കൊച്ചിയിൽ ഇല്ല. അപ്പോൾ ആരായിരുന്നു ഈ ഭാസ്‌കരൻ നായർ?

‘ഭാസ്‌കരൻ നായർ’ ഒരു ഒളിപ്പേരായിരുന്നു. മറ്റ്‌ നേതാക്കൾ സ്വന്തം പേരിൽ പങ്കെടുത്തപ്പോൾ അവർക്കൊപ്പം മറ്റൊരു പേരിൽ ഒളിവിൽ നിന്നെത്തിയത്‌ ആ ഒരാൾ മാത്രം. പി കെ ചന്ദ്രാനന്ദൻ എന്ന അദ്ദേഹത്തിന്റെ യഥാർഥ പേര്‌ പിൽക്കാലത്ത്‌ സിപിഐ എം പാർടി കോൺഗ്രസുകളിലെ ക്രഡൻഷ്യൽ റിപ്പോർട്ടുകളിൽ സ്ഥിരമായി ഇടംപിടിച്ചു. ഇന്ത്യയിൽ ഏറ്റവും കൂടുതൽ കാലം ഒളിവിൽ കഴിഞ്ഞ പാർടി നേതാവായിട്ടായിരുന്നു അത്‌. പട്ടാളത്തിലെ മേജർ പദം വിട്ട്‌ സ്വാതന്ത്ര്യസമരത്തിലെത്തി പിന്നീട്‌ കമ്യൂണിസ്റ്റ്‌ നേതാവായി വളർന്ന മേജർ ജയ്‌പാൽ സിങ് മാത്രമായിരുന്നു സിപിഐ എമ്മിൽ ഒളിവുജീവിതത്തിൽ പികെസിയെ മറികടന്ന നേതാവ്‌ (15 വർഷം). അദ്ദേഹം 1982‐ൽ അന്തരിച്ചു. പന്ത്രണ്ടു വർഷവും ആറുമാസവും ഒളിവിൽ ജീവിച്ച പികെസിയുടെ പേരായി ആ സ്ഥാനത്ത്‌.

പി കെ ചന്ദ്രാനന്ദൻ

പികെസിയുടെ ഒളിവുജീവിതത്തിന്റെ പ്രത്യേകത ഈ കാലയളവിന്റെ വലിയ പങ്കും ഒരു ‘തെളിവ്‌ ജീവിത’വും അദ്ദേഹം നയിച്ചു എന്നതാണ്‌. മറ്റൊരു പേരിൽ മറ്റൊരു നാട്ടിലെ പാർടി നേതാവായി അദ്ദേഹം വളർന്നു. പുന്നപ്ര വയലാർ സമരത്തെ തുടർന്നാണ് പികെസി ഒളിവിലായത്. 1946 ഒക്ടോബർ 24‐ന്‌ പുന്നപ്ര പൊലീസ് ക്യാമ്പ് ലക്ഷ്യമാക്കിയുള്ള പോരാട്ടത്തിന്റെ ക്യാപ്റ്റനായിരുന്നു പികെസി. ദിവാൻ സർ സി പിയുടെ സേനക്കെതിരെ അന്ന് വാരിക്കുന്തമേന്തി പൊരുതുമ്പോൾ പ്രായം 21.

പട്ടാളം പോരാളികൾക്കുനേരെ ഉതിർത്ത വെടിയുണ്ടകളിൽ നിന്ന്‌ കഷ്‌ടിച്ച്‌ രക്ഷപ്പെട്ട പികെസി പാർടി നിർദേശപ്രകാരം ഒളിവിൽ പോയി. പാർടി സംസ്ഥാന കേന്ദ്രം അന്ന് കോഴിക്കോട്ടാണ്‌. സെക്രട്ടറി പി കൃഷ്‌ണപിള്ള. അവിടെ എത്തിയ പികെസി ഒരു കൊല്ലം കോഴിക്കോടും പരിസരങ്ങളിലും ഒളിവിൽ കഴിഞ്ഞു. രാഘവൻ എന്നായിരുന്നു ഒളിവിലെ പേര്‌. പിന്നീട്‌ തിരുവല്ലയിലേക്ക്‌ പാർടി നിയോഗിച്ചു. നഗരത്തിൽനിന്നു മാറി കുന്നന്താനത്ത് ഒരു വീടായിരുന്നു താവളം. പാർടി നേതാവ്‌ പി ടി പുന്നൂസാണ്‌ സ്ഥലം കണ്ടെത്തിയത്‌. അദ്ദേഹത്തിന്റെ ജ്യേഷ്‌ഠൻ ഇടിക്കുളയുടെ വീടായിരുന്നു ഇത്‌. ഭാസ്‌കരൻ നായർ എന്ന ഒളിവിലെ പേര് നൽകിയതും പി ടി പുന്നൂസ്‌ തന്നെ.

1956 ഫെബ്രുവരി ആറുമുതൽ 12 വരെ ആലുവ ഐക്യകേരള നഗറിൽ നടന്ന ഇന്ത്യൻ കമ്യൂണിസ്റ്റ്‌ പാർടി തിരു‐കൊച്ചി സ്റ്റേറ്റ് സമ്മേളനത്തിന്റെ കാര്യപരിപാടി

കുന്നന്താനത്തുകാരൻ ഭാസ്‌കരൻ നായരായി ഇടയ്‌ക്കിടെ തിരുവല്ലയിലെത്തിയ പികെസി ആ പേരിൽ ബന്ധങ്ങൾ സ്ഥാപിച്ചു പാർടി പ്രവർത്തനം തുടങ്ങി. ടൗണിൽ പാർടി ഘടകം രൂപീകരിച്ചു. ഇടയ്‌ക്കിടെ ഒളിസങ്കേതങ്ങൾ മാറി. എല്ലാം തിരുവല്ലയിൽനിന്ന്‌ ഏറെ അകലെയല്ലാത്ത ഇടങ്ങളിൽ.

കൽക്കത്ത തിസീസിനെ തുടർന്നുള്ള പരീക്ഷണ കാലഘട്ടമടക്കം ഇതിനിടെ കടന്നുപോയി. അപ്പോഴെല്ലാം ‘ഭാസ്‌കരൻ നായർ’ നേതൃത്വപരമായ പങ്കുവഹിച്ചു. പാർടിയുടെ വിശ്വസ്‌ത വലയത്തിനു പുറത്തേക്ക്‌ ഒരിക്കലും ഈ സഖാവിനു പിന്നിലെ രഹസ്യം ചോർന്നതുമില്ല.

1956‐ൽ പാർടിയുടെ തിരു‐കൊച്ചി സംസ്ഥാന സമ്മേളനം ആലുവയിൽ നടക്കുമ്പോൾ ഭാസ്‌കരൻ നായർ എന്ന പേരിൽ ആലപ്പുഴ ജില്ല (അന്ന്‌ തിരുവല്ല ആലപ്പുഴ ജില്ലയിലാണ്‌)യിൽ നിന്നുള്ള പ്രതിനിധികളിൽ ഒരാളായാണ്‌ അദ്ദേഹം തെരഞ്ഞെടുക്കപ്പെട്ടത്‌. സമ്മേളനത്തിന്റെ ക്രഡൻഷ്യൽ കമ്മിറ്റിയിൽ അംഗമാകുകയും ചെയ്‌തു. തുടർന്ന്‌ അതേവർഷം ജൂൺ 22 മുതൽ 24 വരെ തൃശൂരിൽ നടന്ന കേരളസംസ്ഥാന സമ്മേളനത്തിലും ഭാസ്‌കരൻ നായരായി പികെസി പങ്കെടുത്തു.

1957‐ലെ തെരഞ്ഞെടുപ്പ്‌ പ്രവർത്തനങ്ങൾക്കും പാർടി താലൂക്ക്‌ സെക്രട്ടറി എന്ന നിലയിൽ നേതൃത്വം നൽകി. തിരുവല്ലയിൽ നിന്ന്‌ നിയമസഭയിലേക്ക്‌ അഡ്വ. ജി പി തമ്പിയും ലോക്‌സഭയിലേക്ക്‌ പി കെ വാസുദേവൻ നായരും തെരഞ്ഞെടുക്കപ്പെടുകയും ചെയ്‌തു.

കമ്യൂണിസ്റ്റ് മന്ത്രിസഭ അധികാരത്തിൽ വന്നപ്പോൾ പുന്നപ്ര വയലാർ കേസുകളിലെ വാറൻഡുകൾ പിൻവലിച്ചു. ഒളിവിൽ നിന്നു പുറത്തുവരുന്ന നേതാക്കൾക്കിടയിൽ ‘പി കെ ചന്ദ്രാനന്ദൻ’ എന്ന അടിക്കുറിപ്പുമായി ‘ഭാസ്‌കരൻ നായരു’ടെ ചിത്രം കണ്ടാണ്‌ പ്രവർത്തകരടക്കം പാർടി കരുതലോടെ കാത്ത രഹസ്യം അറിയുന്നത്. തിരുവല്ലയിൽ അടുത്ത കാലംവരെ പികെസിയെ ഭാസ്‌കരൻ നായരെന്ന് വിളിക്കുന്നവർ പലരും ഉണ്ടായിരുന്നു.

ഭാസ്‌കരൻ നായർ (തിരുവല്ല) എന്ന പേരുകാണാം

1946 മുതൽ 57 വരെ പത്തുവർഷവും എട്ടുമാസവും ഭാസ്‌കരൻ നായർ എന്ന പേരിൽ ജീവിച്ച പികെസി 1964‐ലും ഒളിവിൽ പോയി. ചൈനാചാരന്മാർ എന്നു മുദ്രകുത്തി കമ്യൂണിസ്റ്റ്‌ നേതാക്കൾ ജയിലിലടയ്‌ക്കപ്പെട്ടപ്പോൾ പിടികൊടുക്കാതെ വീണ്ടും രണ്ടുവർഷത്തോളംകൂടി ഒളിവുജീവിതം നയിച്ചു. അങ്ങനെ ആകെ പന്ത്രണ്ടര കൊല്ലത്തെ രാഷ്‌ട്രീയ ജീവിതം ഒളിവിലായി.