ഐഐഎം വിശാഖപട്ടണത്ത് എക്സിക്യൂട്ടീവ് എംബിഎ പ്രവേശനം; ഇപ്പോൾ അപേക്ഷിക്കാം

വിശാഖപട്ടണം: ഐഐഎം വിശാഖപട്ടണം വർക്കിംഗ് പ്രൊഫഷണലുകൾക്കായുള്ള നാലാമത് എക്സിക്യൂട്ടീവ് എംബിഎ ബാച്ചിലേക്ക് അപേക്ഷ ക്ഷണിച്ചു. ടൈംസ് പ്രോയുമായി സഹകരിച്ച് നടത്തുന്ന ഈ രണ്ട് വർഷത്തെ പ്രോഗ്രാം, ജോലിയിൽ തുടർന്നുകൊണ്ട് തന്നെ ഉന്നത മാനേജ്‌മെന്റ് വിദ്യാഭ്യാസം നേടാൻ ആഗ്രഹിക്കുന്നവർക്കായി രൂപകൽപ്പന ചെയ്തതാണ്.

അംഗീകൃത സർവ്വകലാശാലയിൽ നിന്നുള്ള ബിരുദം (50% മാർക്ക്) കരസ്ഥമാക്കിയവർക്ക് അപേക്ഷിക്കാം. എസ്‌സി, എസ്ടി, ഭിന്നശേഷി വിഭാഗക്കാർക്ക് 40 ശതമാനവും ഒബിസി, ഇഡബ്ല്യുഎസ് വിഭാഗക്കാർക്ക് 45 ശതമാനവും മാർക്ക് മതിയാകും. അപേക്ഷിക്കാനുള്ള അവസാന തീയതി: ഏപ്രിൽ 27. അപേക്ഷാ തീയതിയിൽ കുറഞ്ഞത് മൂന്ന് വർഷത്തെ ഫുൾടൈം ജോലിപരിചയം (ഓഫീസർ/എക്സിക്യൂട്ടീവ് തലത്തിൽ) നിർബന്ധമാണ്.

ഐഐഎം വിശാഖപട്ടണം നടത്തുന്ന ഇമാറ്റ് പ്രവേശന പരീക്ഷയുടെയും പേഴ്സണൽ ഇൻ്റർവ്യൂവിന്റെയും അടിസ്ഥാനത്തിലാണ് പ്രവേശനം. സാധുവായ ക്യാറ്റ് (CAT), ജിമാറ്റ് (GMAT), ജിആർഇ (GRE) സ്കോറുകൾ ഉള്ളവർക്ക് പ്രവേശന പരീക്ഷയിൽ നിന്ന് ഇളവ് ലഭിക്കും. സ്ത്രീ പ്രവേശനത്തിന് മുൻഗണന നൽകുന്നതിനായി പ്രത്യേക വെയ്റ്റേജ് ഉണ്ടായിരിക്കും.

ഇന്ററാക്ടീവ് ലേണിംഗ് പ്ലാറ്റ്‌ഫോം വഴി ഓൺലൈനായാണ് ക്ലാസുകൾ നടക്കുക. ഇതിനുപുറമെ, ഐഐഎം വിശാഖപട്ടണത്തെ അത്യാധുനിക ക്യാമ്പസിൽ അഞ്ച് ദിവസം വീതമുള്ള രണ്ട് നേരിട്ടുള്ള പഠന സെഷനുകളും ഉണ്ടായിരിക്കും. മാർക്കറ്റിംഗ്, ഫിനാൻസ്, ഇക്കണോമിക്സ്, സ്ട്രാറ്റജി തുടങ്ങി വിവിധ മേഖലകളിൽ സ്പെഷ്യലൈസേഷൻ തിരഞ്ഞെടുക്കാൻ അവസരമുണ്ട്.

പ്രോഗ്രാം വിജയകരമായി പൂർത്തിയാക്കുന്നവർക്ക് ഐഐഎം വിശാഖപട്ടണം ബിരുദവും അലുമിനി പദവിയും നൽകും. താൽപ്പര്യമുള്ളവർക്ക് ഐഐഎം വിശാഖപട്ടണത്തിന്റെ ഔദ്യോഗിക വെബ്‌സൈറ്റ് വഴി അപേക്ഷിക്കാവുന്നതാണ്.