ഡിജിറ്റൽ സയൻസും ബിസിനസ് മാനേജ്‌മെന്റും; ഐഐടിയും ഐഐഎമും ചേർന്ന് പുതിയ ബിരുദ കോഴ്‌സ്

മുംബൈ: ഐഐഎം മുംബൈയും ഐഐടി ബോംബെയും കൈകോർക്കുന്നു. ഡിജിറ്റൽ സയൻസ്, ബിസിനസ് മാനേജ്‌മെന്റ് എന്നീ മേഖലകളിൽ നൂതനമായ നാല് വർഷത്തെ അണ്ടർ ഗ്രാജുവേറ്റ് (ഡിഗ്രി) പ്രോഗ്രാമിനാണ് ഇരു സ്ഥാപനങ്ങളും തുടക്കമിടുന്നത്. ഈ വർഷം തന്നെ കോഴ്‌സ് ആരംഭിക്കുമെന്ന് ഐഐഎം മുംബൈ അധികൃതർ അറിയിച്ചു.

ഐഐഎം മുംബൈയുടെ ആദ്യ എംബിഎ ബാച്ചിന്റെ ബിരുദദാന ചടങ്ങിലാണ് ഇക്കാര്യം പ്രഖ്യാപിച്ചത്. സാങ്കേതിക വിദ്യയും ബിസിനസ് മാനേജ്‌മെന്റും ഒത്തുചേരുന്ന ഈ കോഴ്‌സ് വ്യവസായ ലോകത്തെ പുതിയ മാറ്റങ്ങൾ ഉൾക്കൊള്ളാൻ വിദ്യാർത്ഥികളെ പ്രാപ്തരാക്കും. 70 സീറ്റുകളിലേക്കാണ് ആദ്യഘട്ടത്തിൽ പ്രവേശനം.

ആർട്ടിഫിഷ്യൽ ഇന്റലിജൻസ്, മെഷീൻ ലേണിംഗ്, ഡാറ്റ സയൻസ്, ഇന്റർനെറ്റ് ഓഫ് തിങ്‌സ്, റോബോട്ടിക്സ് തുടങ്ങിയ സാങ്കേതിക വിഷയങ്ങളും; മാർക്കറ്റിംഗ്, ഫിനാൻസ്, മാനുഫാക്ചറിംഗ് തുടങ്ങിയ മാനേജ്‌മെന്റ് വിഷയങ്ങളും സമന്വയിപ്പിച്ചാണ് പാഠ്യപദ്ധതി തയ്യാറാക്കിയിരിക്കുന്നത്.

പ്രതിവർഷം 6 മുതൽ 7 ലക്ഷം രൂപ വരെയാണ് കോഴ്‌സ് ഫീസ്. ഐഐഎം മുംബൈ 100 ശതമാനം പ്ലേസ്‌മെന്റ് ഉറപ്പുനൽകുന്നു. ജെഇഇ മെയിൻ പരീക്ഷയിലെ സ്കോറിന്റെ അടിസ്ഥാനത്തിലായിരിക്കും പ്രവേശനം. പരീക്ഷയിൽ യോഗ്യത നേടുന്നവർക്കായി പ്രത്യേക അഭിമുഖവും നടത്തും.

നാല് വർഷത്തെ ബിരുദ പഠനത്തിന് ശേഷം മൂന്നാം വർഷത്തിൽ തന്നെ വിദ്യാർത്ഥികൾക്ക് എംബിഎ തെരഞ്ഞെടുക്കാനുള്ള അവസരവും ലഭിക്കും. ഇതുവഴി ബിരുദത്തിന് തൊട്ടുപിന്നാലെ ഒരു വർഷം കൊണ്ട് എംബിഎ പൂർത്തിയാക്കാൻ സാധിക്കും. നിലവിൽ 1200 വിദ്യാർത്ഥികൾക്കുള്ള ഹോസ്റ്റൽ സൗകര്യമാണ് ഐഐഎം മുംബൈയിലുള്ളത്.

വരും വർഷങ്ങളിൽ അടിസ്ഥാന സൗകര്യങ്ങൾ വർധിപ്പിക്കുന്നതോടെ കൂടുതൽ ബിരുദ കോഴ്‌സുകൾ ആരംഭിക്കാനും പദ്ധതിയുണ്ട്. മുമ്പ് എൻഐടിഐഇ (NITIE) എന്നറിയപ്പെട്ടിരുന്ന സ്ഥാപനം 2026-ൽ ഐഐഎം മുംബൈ ആയി മാറിയതിന് ശേഷമുള്ള പ്രധാന ചുവടുവെപ്പായിട്ടാണ് ഈ പുതിയ കോഴ്‌സിനെ വിദ്യാഭ്യാസ മേഖല കാണുന്നത്.