print edition കെമിസ്‌ട്രി തെരഞ്ഞെടുത്താൽ

ദൈനംദിന ജീവിതത്തിൽ ഏറെ സ്വാധീനം ചെലുത്തുന്ന പഠനശാഖയാണ് രസതന്ത്രം അഥവാ കെമിസ്ട്രി. പദാർഥങ്ങളുടെ ഘടന, വിവിധ മൂലകങ്ങൾ, സംയുക്തങ്ങൾ, രാസമാറ്റങ്ങൾ തുടങ്ങിയവയെക്കുറിച്ചുള്ള വിശദ പഠനമാണിത്. ആരോഗ്യമേഖല, വ്യാവസായിക മേഖല, കാർഷിക മേഖല, നിർമാണ മേഖല എന്നിങ്ങനെ നിരവധി മേഖലകളിൽ കെമിസ്ട്രിയുടെ വലിയ സംഭാവനകളുണ്ട്.

ഉപരിപഠന മേഖലകൾ

പോളിമർ കെമിസ്ട്രി, അനാലിറ്റിക് കെമിസ്ട്രി, ഓർഗാനിക് കെമിസ്ട്രി, ബയോകെമിസ്ട്രി, അപ്ലൈഡ് കെമിസ്ട്രി, ഇൻഡസ്ട്രിയൽ കെമിസ്ട്രി, ഹൈഡ്രോ കെമിസ്ട്രി, ഫിസിക്കൽ കെമിസ്ട്രി, ഫാർമസ്യൂട്ടിക്കൽ കെമിസ്ട്രി, ടെക്സ്റ്റൈൽ കെമിസ്ട്രി, മറൈൻ കെമിസ്ട്രി, കംപ്യൂട്ടേഷനൽ കെമിസ്ട്രി, എൻവയോൺമെന്റൽ കെമിസ്ട്രി, ഫോറൻസിക് കെമിസ്ട്രി, ഫുഡ് ടെക്നോളജി, ബയോ ഇൻഫർമാറ്റിക്സ്, ഫോറൻസിക് കെമിസ്ട്രി, എൻവയോൺമെന്റൽ സയൻസ് തുടങ്ങി നിരവധി മേഖലകളിൽ ഉപരിപഠനം നടത്താം.

പഠനാവസരങ്ങൾ

പിജി, ഇന്റഗ്രേറ്റഡ്‌ പിഎച്ച്ഡി പഠനങ്ങൾക്ക് പ്രീമിയർ സ്ഥാപനങ്ങൾ ഉൾപ്പെടെ നിരവധി സ്ഥാപനങ്ങളിൽ അവസരങ്ങളുണ്ട്. ജോയിന്റ്‌ അഡ്മിഷൻ ടെസ്റ്റ് ഫോർ മാസ്റ്റേഴ്സ് (JAM) വഴി വിവിധ ഐഐടികളിൽ എംഎസ്‌സി, ഇന്റഗ്രേറ്റഡ് പിഎച്ച്ഡി പ്രോഗ്രാമുകൾക്കും എൻഐടികളിൽ എംഎസ്‌സി പ്രോഗ്രാമുകൾക്കും ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസ് ബംഗളൂരുവിൽ ഇന്റഗ്രേറ്റഡ് പിഎച്ച്ഡി പ്രോഗ്രാമിനും പ്രവേശനം നേടാം. ഐസറുകൾ, നൈസർ ഭുവനേശ്വർ, ടാറ്റാ ഇൻസ്റ്റിറ്റ്യൂട്ട് ഓഫ് ഫണ്ടമെന്റൽ റിസർച്ച് മുംബൈ തുടങ്ങിയ പ്രമുഖ സ്ഥാപനങ്ങളിലും തുടർ പഠനാവസരങ്ങളുണ്ട്. കൂടാതെ കോമൺ യൂണിവേഴ്സിറ്റി എൻട്രൻസ് ടെസ്റ്റ് (CUET ) പിജി വഴി സെൻട്രൽ യൂണിവേഴ്സിറ്റികളടക്കം വിവിധ സ്ഥാപനങ്ങളിൽ ബിരുദാനന്തര പ്രോഗ്രാമുകൾ പഠിക്കാം. താൽപ്പര്യമുള്ളവർക്ക് ഗ്രാജ്വേറ്റ് ആപ്റ്റിറ്റ്യൂഡ് ടെസ്റ്റ്‌ ഇൻ എൻജിനിയറിങ്‌ (GATE) എഴുതാനുമാകും.

കേരളത്തിൽ

മഹാത്മാഗാന്ധി, കലിക്കറ്റ്, കേരള, കണ്ണൂർ സർവകലാശാലകൾക്കുകീഴിലുള്ള അഫിലിയേറ്റഡ് കോളേജുകൾ, കൊച്ചിൻ യൂണിവേഴ്സിറ്റി ഓഫ് സയൻസ് ടെക്നോളജി (കുസാറ്റ്‌) എന്നിവിടങ്ങളിൽ വിവിധ ബിരുദാനന്തര പ്രോഗ്രാമുകൾക്ക് അവസരമുണ്ട്. നാഷണൽ ഷുഗർ ഇൻസ്റ്റിറ്റ്യൂട്ട് കാൺപുർ, വസന്ത ദാദാ ഷുഗർ ഇൻസ്റ്റിറ്റ്യൂട്ട് പുണെ, സെൻട്രൽ ഇൻസ്റ്റിറ്റ്യൂട്ട് ഓഫ് പെട്രോ കെമിക്കൽ എൻജിനിയറിങ്‌ ആൻഡ് ടെക്നോളജി (CIPET), ഇന്ത്യൻ ഇൻസ്റ്റിറ്റ്യൂട്ട് ഓഫ് പാക്കേജിങ്‌ തുടങ്ങിയ സ്ഥാപനങ്ങളിൽ കെമിസ്ട്രി ബിരുദധാരികൾക്ക് വിവിധ പ്രോഗ്രാമുകൾ പഠിക്കാം. താൽപ്പര്യമുള്ളവർക്ക് ഐഇഎൽടിഎസ്, ടോഫൽ, ജിആർഇ തുടങ്ങിയ പരീക്ഷകളിൽ മികച്ച സ്കോർ നേടി, വിദേശ യൂണിവേഴ്സിറ്റികളിലും തുടർപഠനം നടത്താം.

മറ്റു പ്രോഗ്രാമുകൾ

തിരുവനന്തപുരത്തെ ശ്രീചിത്ര ഇൻസ്റ്റിറ്റ്യൂട്ടിൽ ന്യൂറോ ടെക്നോളജി, മെഡിക്കൽ റെക്കോഡ്സ് സയൻസ് എന്നിവയിലെ പിജി ഡിപ്ലോമ, വെല്ലൂർ ക്രിസ്ത്യൻ കോളേജിൽ സൈറ്റോ ജനറ്റിക്സ്, ഹിസ്റ്റോ പത്തോളജിക്കൽ ലാബ് ടെക്നോളജി എന്നിവയിൽ പിജി ഡിപ്ലോമ, തിരുവനന്തപുരം റീജണൽ ക്യാൻസർ സെന്ററിലെ അഡ്വാൻസ് ട്രെയിനിങ് ഇൻ ക്ലിനിക്കൽ ലബോറട്ടറി ടെക്നോളജി എന്നിവ കെമിസ്ട്രി ബിരുദധാരികൾക്ക് പരിഗണിക്കാവുന്ന പാരാമെഡിക്കൽ കോഴ്സുകളാണ്.

സ‍ൗണ്ട് എൻജിനിയറിങ്, ഡിസൈൻ, സൈറ്റോ ജനറ്റിക്സ്, വിഎൽഎസ്ഐ ഡിസൈൻ, ബ്രോഡ്കാസ്റ്റ് ടെക്നോളജി, ത്രീഡി പെയിന്റിങ്‌, ഷുഗർ ടെക്നോളജി, ലെതർ ടെക്നോളജി, പ്ലാസ്റ്റിക് ആൻഡ്‌ ഫൈബർ ടെക്നോളജി, പാക്കേജിങ്‌ തുടങ്ങി നിരവധി തൊഴിലധിഷ്ഠിത പ്രോഗ്രാമുകളും പരിഗണിക്കാം. മാനേജ്മെന്റ്‌ പഠനം, നിയമപഠനം, സോഷ്യൽ വർക്ക്, ജേർണലിസം, ലൈബ്രറി സയൻസ്, ഇംഗ്ലീഷ്, ട്രാവൽ ആൻഡ് ടൂറിസം, ഹോട്ടൽ മാനേജ്മെന്റ്‌, ഹോട്ടൽ അഡ്മിനിസ്ട്രേഷൻ, ഹോസ്പിറ്റൽ അഡ്മിനിസ്ട്രേഷൻ, എംസിഎ തുടങ്ങി കെമിസ്ട്രി മേഖലയിൽനിന്ന് വ്യത്യസ്തമായ പ്രോഗ്രാമുകളും താൽപ്പര്യമനുസരിച്ച് തെരഞ്ഞെടുക്കാം.

തൊഴിലവസരങ്ങൾ

കെമിസ്ട്രി ബിരുദ- ബിരുദാനന്തര ബിരുദധാരികൾക്ക് ഫാർമസ്യൂട്ടിക്കൽസ്, ഫെർട്ടിലൈസർ, വസ്ത്രനിർമാണം, പെർഫ്യൂം, സെറാമിക്, പ്ലാസ്റ്റിക്സ്, ടാനിങ്‌, ഓയിൽ, പെട്രോളിയം, ടെക്സ്റ്റൈൽ, ഡൈ, പെയിന്റ്‌, കോസ്മെറ്റിക്സ്, സിമന്റ്‌, ഗ്ലാസ്, പൊലൂഷൻ കൺട്രോൾ, എൻവയോൺമെന്റ്‌ തുടങ്ങി നിരവധി മേഖലകളിൽ അവസരങ്ങളുണ്ട്. വിവിധ റിസർച്ച് സ്ഥാപനങ്ങളിലും വ്യവസായസ്ഥാപനങ്ങളിലും അവസരം ലഭിക്കാം. ഫാർമക്കോളജിസ്റ്റ്, നാനോടെക്നോളജിസ്റ്റ്, ഫോറൻസിക് സയന്റിസ്റ്റ്, ലാബ് കെമിസ്റ്റ്, ക്ലിനിക്കൽ സയന്റിസ്റ്റ്, ടോക്സിക്കോളജിസ്റ്റ്, ബയോ കെമിസ്റ്റ്, ക്വാളിറ്റി ഇൻസ്‌പെക്ടർ തുടങ്ങി നിരവധി തസ്തികകൾ ലഭ്യമാണ്.

അധ്യാപന മേഖലയിൽ ഹൈസ്കൂൾ തലംമുതൽ യൂണിവേഴ്സിറ്റി തലംവരെ ജോലിസാധ്യതകളുണ്ട്. എംഎസ്‌സി കെമിസ്ട്രിക്കാർക്ക് കേരള പിഎസ്‌സിവഴി ഫുഡ് സേഫ്റ്റി ഓഫീസർ, കെമിക്കൽ എക്സാമിനർ ലബോറട്ടറിയിൽ സയന്റിഫിക് ഓഫീസർ, മൈനിങ് ആൻഡ് ജിയോളജിവകുപ്പിൽ ജൂനിയർ കെമിസ്റ്റ്, ഫോറൻസിക് സയൻസ് ലബോറട്ടറിയിൽ സയന്റിഫിക് ഓഫീസർ തുടങ്ങിയ തസ്തികകൾക്ക് അപേക്ഷിക്കാം. കൂടാതെ ഏതു ബിരുദമുള്ളവർക്കും അപേക്ഷിക്കാവുന്ന സിവിൽ സർവീസ്, കേരള അഡ്മിനിസ്ട്രേറ്റീവ് സർവീസ്, സ്റ്റാഫ് സെലക്‌ഷൻ കമീഷൻ കമ്പൈൻഡ് ഗ്രാജ്വേറ്റ് ലെവൽ പരീക്ഷ, കേരള പിഎസ്‌സി പരീക്ഷ തുടങ്ങിയവ വഴിയുള്ള തസ്തികകളും ബാങ്കിങ്‌, റെയിൽവേ, ഡിഫൻസ് സർവീസ് തുടങ്ങിയവയിലെ അവസരങ്ങളും പരിഗണിക്കാം.