എസ്‌എസ്‌സി സിഎച്ച്എസ്‌എൽ വിജ്‌ഞാപനം; 3131 ഒഴിവ്‌

കേന്ദ്ര സർവീസിൽ ലോവർ ഡിവിഷൻ അസിസ്‌റ്റന്റ്, ഡേറ്റ എൻട്രി ഓപ്പറേറ്റർ, ഡേറ്റ എൻട്രി ഓപ്പറേറ്റർ ഗ്രേഡ് എ ഒഴിവുകളിൽ സ്‌റ്റാഫ് സെലക്‌ഷൻ കമീഷൻ (എസ്എസ്‌സി) അപേക്ഷ ക്ഷണിച്ചു. ഗ്രൂപ്പ് സി തസ്‌തികയാണ്. 3131 ഒഴിവ്‌ പ്രതീക്ഷിക്കുന്നു. ഒഴിവുകളുടെ എണ്ണത്തിൽ മാറ്റം വന്നേക്കാം. പ്ലസ് ടുക്കാർക്കാണ് അവസരം. ജൂലൈ 18നുമുമ്പ്‌ ഓൺലൈനായി അപേക്ഷിക്കണം. യോഗ്യത: 12-ാം ക്ലാസ് ജയം/തത്തുല്യം. 2026 ജനുവരി 1 അടിസ്‌ഥാനമാക്കിയാണു യോഗ്യത കണക്കാക്കുക. നിശ്‌ചിതതീയതിക്കു മുമ്പ്‌ യോഗ്യത നേടിയവരാണ് അപേക്ഷിക്കാൻ അർഹർ. അപേക്ഷാഫീസ്: 100 രൂപ. പട്ടികജാതി/പട്ടികവർഗം/ഭിന്നശേഷിക്കാർ/വിമുക്‌തഭടന്മാർ വനിതകൾ എന്നിവർക്കു ഫീസില്ല. ഫീസ് ഓൺലൈനിൽ അടയ്ക്കണം. ജൂലൈ 19 വരെ അടയ്ക്കാം. ഫീസ് അടയ്ക്കുംമുമ്പ്‌ വിജ്‌ഞാപനത്തിലെ നിർദേശങ്ങൾ വായിച്ചു മനസ്സിലാക്കുക.

കംപ്യൂട്ടർ അധിഷ്ഠിത പരീക്ഷ (രണ്ടു ഘട്ടം), സ്‌കിൽ ടെസ്‌റ്റ്/ടൈപ്പിങ് ടെസ്‌റ്റ് എന്നിവയുടെ അടിസ്‌ഥാനത്തിലാണ്‌ തിരഞ്ഞെടുപ്പ്‌. രണ്ടു ഘട്ടങ്ങളായാണ് എഴുത്തുപരീക്ഷ, കംപ്യൂട്ടർ ബേസ്‌ഡ് ഒബ്ജക്ടീവ് പരീക്ഷയിൽ മൾട്ടിപ്പിൾ ചോയ്‌സ് ചോദ്യങ്ങളായിരിക്കും. തെറ്റായ ഉത്തരങ്ങൾക്ക്‌ നെഗറ്റീവ് മാർക്കുണ്ടാകും. മൂന്നാം ഘട്ട പരീക്ഷ (സ്‌കിൽ ടെസ്‌റ്റ്/ടൈപ്പിങ് ടെസ്റ്റ്): ഡേറ്റ എൻട്രി ഓപ്പറേറ്റർ തസ്‌തികയിലേക്കു നടത്തുന്ന സ്‌കിൽ ടെസ്‌റ്റിൽ കംപ്യൂട്ടർ ഡേറ്റ എൻട്രിയിലുള്ള വേഗം പരിശോധിക്കും. കംപ്യൂട്ടറിൽ മണിക്കൂറിൽ 8,000 കീ ഡിപ്രഷൻ വേഗം വേണം 15 മിനിറ്റ് ദൈർഘ്യമുള്ളതാണ്‌ സ്‌കിൽ ടെസ്‌റ്റ്. ലോവർ ഡിവിഷൻ ക്ലാർക്ക്/ജൂനിയർ സെക്രട്ടറിയറ്റ് അസിസ്‌റ്റന്റ്‌ തസ്‌തികയിലേക്കു നടത്തുന്ന കംപ്യൂട്ടർ ടൈപ്പിങ് ടെസ്‌റ്റിൽ ഹിന്ദി ടൈപ്പിങ്ങിൽ മിനിറ്റിൽ 30 വാക്കും ഇംഗ്ലിഷ് ടൈപ്പിങ്ങിൽ മിനിറ്റിൽ 35 വാക്കും വേഗം വേണം. 10 മിനിറ്റാണ്‌ ടെസ്റ്റ്.

പരീക്ഷ സംബന്ധിച്ച കൂടുതൽ വിവരങ്ങളും വിശദ സിലബസും വെബ്സൈറ്റിലെ വിജ്ഞാപനത്തിൽ. കേരളത്തിലെ പരീക്ഷാകേന്ദ്രങ്ങൾ: തിരുവനന്തപുരം, കൊല്ലം, കോട്ടയം, എറണാകുളം തൃശൂർ, കോഴിക്കോട്, കണ്ണൂർ എന്നിവിടങ്ങളിൽ പരീക്ഷാകേന്ദ്രമുണ്ട്. ഏതെങ്കിലും ഒരു കേന്ദ്രം തിരഞ്ഞെടുക്കുക. പരീക്ഷാകേന്ദ്രങ്ങളുടെ കോഡ് ഉൾപ്പെടെ വിശദാംശങ്ങൾ വെബ്‌സൈറ്റിൽ ലഭിക്കും. ssc.gov. in എന്ന വെബ്സൈറ്റിലൂടെ രണ്ടു ഘട്ടമായാണ് അപേക്ഷ സമർപ്പിക്കേണ്ടത്. ആദ്യഘട്ടം ഒറ്റത്തവണ രജിസ്ട്രേഷനാണ്. ഫോട്ടോയും ഒപ്പും ഈ ഘട്ടത്തിൽ അപ്ലോഡ് ചെയ്യണം. ഒറ്റത്തവണ രജിസ്ട്രേഷനു ശേഷം യൂസർ ഐഡിയും പാസ്‌വേഡും ഉപയോഗിച്ചു ലോഗിൻ ചെയ്ത്‌ അപേക്ഷ സമർപ്പിക്കാം.