എസ്എസ്‌സി സിജിഎൽ അപേക്ഷ ഇന്ന് അവസാനിക്കും; 12,256 ഒഴിവുകൾ

ന്യൂഡൽഹി: സ്റ്റാഫ് സെലക്ഷൻ കമ്മീഷൻ നടത്തുന്ന കംബൈൻഡ് ഗ്രാജ്വേറ്റ് ലെവൽ (CGL) പരീക്ഷയ്ക്കുള്ള അപേക്ഷാ സമർപ്പണം ഇന്ന് (ജൂൺ 22) രാത്രി 11 മണിക്ക് അവസാനിക്കും. മെയ് 21-നാണ് സിജിഎൽ 2026 രജിസ്ട്രേഷൻ നടപടികൾ ആരംഭിച്ചത്.

യോഗ്യരായ ഉദ്യോഗാർത്ഥികൾക്ക് എസ്എസ്‌സിയുടെ ഔദ്യോഗിക വെബ്‌സൈറ്റായ ssc.gov.in സന്ദർശിച്ച് അപേക്ഷ സമർപ്പിക്കാം. വിവിധ കേന്ദ്ര സർക്കാർ വകുപ്പുകളിലായി ഏകദേശം 12,256 ഒഴിവുകളിലേക്കാണ് ഇത്തവണ താൽക്കാലികമായി നിയമനം പ്രഖ്യാപിച്ചിരിക്കുന്നത്.

മുൻവർഷങ്ങളിൽ നിന്ന് വ്യത്യസ്തമായി ഇത്തവണ ഉദ്യോഗാർത്ഥികൾ മുൻകൂട്ടി എടുത്ത ഫോട്ടോ അപ്‌ലോഡ് ചെയ്യേണ്ടതില്ലെന്ന പ്രത്യേകതയുമുണ്ട്. അപേക്ഷാ ഫോം പൂരിപ്പിക്കുന്ന സമയത്ത് തന്നെ ഉദ്യോഗാർത്ഥിയുടെ തത്സമയ ഫോട്ടോ സിസ്റ്റം വഴി പകർത്തുന്ന രീതിയിലാണ് പുതിയ അപേക്ഷാ മോഡ്യൂൾ തയാറാക്കിയിരിക്കുന്നത്.

ഇതിനായി നിർദ്ദേശം ലഭിക്കുമ്പോൾ ഉദ്യോഗാർത്ഥികൾ ക്യാമറയ്ക്ക് മുന്നിൽ ഇരിക്കുകയോ നിൽക്കുകയോ ചെയ്താൽ മതിയാകും. അസിസ്റ്റന്റ് ഓഡിറ്റ് ഓഫീസർ, അസിസ്റ്റന്റ് സെക്ഷൻ ഓഫീസർ, ഇൻസ്‌പെക്ടർ ഓഫ് ഇൻകം ടാക്സ്, ഇൻസ്‌പെക്ടർ (സെൻട്രൽ എക്‌സൈസ്), അസിസ്റ്റന്റ് എൻഫോഴ്‌സ്‌മെന്റ് ഓഫീസർ, സബ് ഇൻസ്‌പെക്ടർ, എക്‌സിക്യൂട്ടീവ് അസിസ്റ്റന്റ്, റിസർച്ച് അസിസ്റ്റന്റ്, ജൂനിയർ സ്റ്റാറ്റിസ്റ്റിക്കൽ ഓഫീസർ, ഓഡിറ്റർ, അക്കൗണ്ടന്റ്, ടാക്സ് അസിസ്റ്റന്റ് തുടങ്ങിയ വിവിധ ഗ്രേഡ് 'ബി', ഗ്രേഡ് 'സി' തസ്തികകളിലേക്കാണ് പരീക്ഷ നടത്തുന്നത്.

ഉദ്യോഗാർത്ഥികൾ എസ്എസ്‌സിയുടെ പുതിയ ഔദ്യോഗിക വെബ്‌സൈറ്റ് വഴിയോ ഗൂഗിൾ പ്ലേ സ്റ്റോറിൽ നിന്ന് ഡൗൺലോഡ് ചെയ്യാവുന്ന 'my SSC' മൊബൈൽ ആപ്ലിക്കേഷൻ വഴിയോ മാത്രമേ അപേക്ഷകൾ സമർപ്പിക്കാവൂ എന്ന് അധികൃതർ വ്യക്തമാക്കിയിട്ടുണ്ട്.

അപേക്ഷ അന്തിമമായി സമർപ്പിക്കുന്നതിന് മുൻപ് വിവരങ്ങൾ കൃത്യമാണെന്ന് ഉറപ്പുവരുത്തണമെന്നും, ഭാവി ആവശ്യങ്ങൾക്കായി അപേക്ഷാ ഫോമിന്റെ പ്രിന്റൗട്ട് സൂക്ഷിക്കണമെന്നും കമ്മീഷൻ നിർദ്ദേശിച്ചു.