ഐഐടി കാൺപൂർ ഓൺലൈൻ പിജി: അപേക്ഷിക്കാനുള്ള തീയതി നീട്ടി

കാൺപൂർ: ഐഐടി കാൺപൂർ 2026 സെപ്റ്റംബർ സെഷനിലേക്കുള്ള വിവിധ ഓൺലൈൻ പോസ്റ്റ് ഗ്രാജുവേറ്റ് പ്രോഗ്രാമുകളിലേക്ക് അപേക്ഷിക്കാനുള്ള അവസാന തീയതി നീട്ടി. രാജ്യത്തിന്റെ വിവിധ ഭാഗങ്ങളിൽ നിന്നുള്ള ഉദ്യോഗാർത്ഥികളിൽ നിന്നും വിദ്യാർത്ഥികളിൽ നിന്നും ലഭിച്ച മികച്ച പ്രതികരണത്തെത്തുടർന്നാണ് സ്ഥാപനത്തിന്റെ ഈ തീരുമാനം.

ഫ്രഷ് ഗ്രാജുവേറ്റുകൾക്കും നിലവിൽ ജോലി ചെയ്യുന്ന പ്രൊഫഷണലുകൾക്കും ഒരുപോലെ പ്രയോജനപ്പെടുന്ന രീതിയിലാണ് ഈ കോഴ്സുകൾ ക്രമീകരിച്ചിരിക്കുന്നത്. പുതുക്കിയ തീയതികൾ പ്രകാരം, ഐഐടി കാൺപൂരിന്റെ ഓൺലൈൻ പ്രവേശന പരീക്ഷ എഴുതേണ്ട ഉദ്യോഗാർത്ഥികൾക്ക് 2026 ജൂലൈ 1 വരെ അപേക്ഷ സമർപ്പിക്കാം.

പ്രവേശന പരീക്ഷയിൽ നിന്ന് ഇളവ് ലഭിക്കാൻ അർഹതയുള്ള യോഗ്യരായ ഉദ്യോഗാർത്ഥികൾക്ക് 2026 ജൂലൈ 10 വരെയും അപേക്ഷിക്കാവുന്നതാണ്. എംടെക് (ഓൺലൈൻ) - ആർഎഫ് എൻജിനീയറിങ്, എംടെക് (ഓൺലൈൻ) - സ്മാർട്ട് ഗ്രിഡ് ടെക്നോളജി, എംടെക് (ഓൺലൈൻ) - മൈക്രോഇലക്ട്രോണിക്സ് ആൻഡ് വിഎൽഎസ്ഐ, എംടെക് (ഓൺലൈൻ) - സസ്റ്റൈനബിൾ എനർജി ടെക്നോളജീസ്, എംടെക് (ഓൺലൈൻ) - ആർട്ടിഫിഷ്യൽ ഇന്റലിജൻസ് ആൻഡ് മെഷീൻ ലേണിങ്, എംടെക് (ഓൺലൈൻ) - വയർലെസ് നെറ്റ്‌വർക്ക്സ് ആൻഡ് മെഷീൻ ലേണിങ്, എംടെക് (ഓൺലൈൻ) - കൺസ്ട്രക്ഷൻ എൻജിനീയറിങ് ആൻഡ് പ്രോജക്ട് മാനേജ്മെന്റ്, എംഎസ്സി (ഓൺലൈൻ) - ഇക്കണോമിക്സ് ആൻഡ് ഡാറ്റ അനലിറ്റിക്സ്, പിജി ഡിപ്ലോമ (ഓൺലൈൻ) - സൈബർ സെക്യൂരിറ്റി എന്നിവയാണ് പ്രധാന കോഴ്സുകൾ.

ബാഹ്യ ഏജൻസികളുടെയോ തേർഡ് പാർട്ടികളുടെയോ യാതൊരുവിധ ഇടപെടലുകളുമില്ലാതെ പൂർണ്ണമായും ഐഐടി കാൺപൂർ നേരിട്ടാണ് ഈ കോഴ്സുകൾ നിയന്ത്രിക്കുന്നതും സർട്ടിഫിക്കറ്റുകൾ നൽകുന്നതും. ഐഐടി കാൺപൂരിലെ മികച്ച ഫാക്കൽറ്റികളാണ് ഓൺലൈൻ ക്ലാസുകൾ കൈകാര്യം ചെയ്യുന്നത്.

ഉദ്യോഗാർത്ഥികൾക്ക് തങ്ങളുടെ ജോലി സംബന്ധമായ തിരക്കുകൾക്കൊപ്പം തന്നെ രാജ്യത്ത് എവിടെയിരുന്നും ഉയർന്ന നിലവാരത്തിലുള്ള പോസ്റ്റ് ഗ്രാജുവേറ്റ് വിദ്യാഭ്യാസം നേടാൻ സാധിക്കുന്ന തരത്തിലാണ് ഇതിന്റെ ഘടന.