കോൾ ഇന്ത്യ ലിമിറ്റഡിൽ 
936 മാനേജ്‌മെന്റ് ട്രെയിനി

മഹാരത്ന പൊതുമേഖലാ സ്ഥാപനമായ കോൾ ഇന്ത്യ ലിമിറ്റഡിൽ മാനേജ്‌മെന്റ് ട്രെയിനി തസ്തികകളിലേക്ക് അപേക്ഷ ക്ഷണിച്ചു. രണ്ട് വ്യത്യസ്ത വിജ്ഞാപനങ്ങളിലായി ആകെ 936 ഒഴിവുകളിലേക്കാണ് നിയമനം. മൈനിങ് വിഭാഗത്തിൽ (276 ഒഴിവ്‌) ഗേറ്റ് (GATE-2025) സ്കോർ അടിസ്ഥാനമാക്കിയും മറ്റ് വിഭാഗങ്ങളിൽ (660 ഒഴിവ്‌) കംപ്യൂട്ടർ അധിഷ്ഠിത പരീക്ഷ വഴിയുമാണ് തെരഞ്ഞെടുപ്പ്‌.

സിവിൽ, ഇലക്ട്രിക്കൽ, മെക്കാനിക്കൽ, സിസ്റ്റംസ്, ഇലക്ട്രോണിക്സ് & ടെലികമ്മ്യൂണിക്കേഷൻ, ഇൻഡസ്ട്രിയൽ എൻജിനിയറിങ്‌, ജിയോളജി, ഹിന്ദി (രാജഭാഷ), കമ്പനി സെക്രട്ടറി എന്നിവയാണ്‌ മറ്റുതസ്‌തികകൾ. ബന്ധപ്പെട്ട വിഷയങ്ങളിൽ 60% മാർക്കോടെയുള്ള ബിരുദം/ബിരുദാനന്തര ബിരുദം (വിഭാഗം അനുസരിച്ച്) ആണ്‌ യോഗ്യത. മൈനിങ്‌ വിഭാഗത്തിന് ഗേറ്റ്‌ 2025 യോഗ്യത നിർബന്ധമാണ്. എസ്‌ സി/എസ്ടി/ഭിന്നശേഷി വിഭാഗക്കാർക്ക് മാർക്കിൽ 5% ഇളവുണ്ട്.പ്രായപരിധി: 2026 ഏപ്രിൽ 30-ന് 30 വയസ്‌ കവിയരുത്. നിയമാനുസൃത ഇളവ് ലഭിക്കും.

മൈനിങ്‌ വിഭാഗത്തിൽ ഗേറ്റ് സ്കോർ അടിസ്ഥാനമാക്കിയുള്ള ഷോർട്ട്ലിസ്റ്റ് വഴിയും, മറ്റ് വിഭാഗങ്ങളിൽ 3 മണിക്കൂർ ദൈർഘ്യമുള്ള ഓൺലൈൻ പരീക്ഷ വഴിയുമായിരിക്കും തെരഞ്ഞെടുപ്പ്. പരീക്ഷാ കേന്ദ്രങ്ങൾ അപേക്ഷാസമയത്ത് തിരഞ്ഞെടുക്കാം. ഇന്ത്യയിലെ വിവിധ സംസ്ഥാനങ്ങളിലുള്ള കോൾ ഇന്ത്യയുടെ സബ്സിഡിയറി കമ്പനികളിൽ എവിടെയും നിയമനംലഭിക്കാം.അപേക്ഷാ ഫീസ്: 1180 രൂപ. എസ്സി, എസ്ടി, ഭിന്നശേഷിക്കാർ, കോൾ ഇന്ത്യ ജീവനക്കാർ എന്നിവർക്ക് ഫീസില്ല.അവസാന തീയതി:മൈനിങ്‌ : ജൂൺ 7. മറ്റ് വിഭാഗങ്ങൾ: ജൂൺ 11. www.coalindia.in എന്ന വെബ്സൈറ്റിലൂടെ ഓൺലൈനായി അപേക്ഷിക്കാം.