മെഴ്‌സിഡസ് ബെൻസിന് ഇനി വിലയേറും; കാരണങ്ങൾ നിരത്തി കമ്പനി

പൂനെ: ജർമ്മൻ ആഡംബര വാഹന നിർമാതാക്കളായ മെഴ്‌സിഡസ് ബെൻസ് ഇന്ത്യ തങ്ങളുടെ പാസഞ്ചർ കാറുകളുടെ വിലയിൽ ഏകദേശം രണ്ട് ശതമാനം വർധന പ്രഖ്യാപിച്ചു. പുതിയ വിലകൾ ഏപ്രിൽ ഒന്നുമുതൽ പ്രാബല്യത്തിൽ വരും. വിദേശനാണ്യ വിപണിയിലെ തുടർച്ചയായ ഏറ്റക്കുറച്ചിലുകളും പ്രത്യേകിച്ച് യൂറോയ്ക്കെതിരെ ഇന്ത്യൻ രൂപയുടെ മൂല്യത്തകർച്ചയും വില വർധനക്ക് പ്രധാന കാരണങ്ങളാണെന്ന് കമ്പനി അറിയിച്ചു. കൂടാതെ ജിഎസ്ടി ചെലവുകൾ ഉയരുന്നതും കമ്പനിക്ക് സാമ്പത്തിക സമ്മർദ്ദം സൃഷ്ടിക്കുന്നതായി വ്യക്തമാക്കുന്നു.

2026 കലണ്ടർ വർഷത്തിൽ ഇന്ത്യൻ വിപണിയിൽ ജർമ്മൻ ആഡംബര കാർ നിർമ്മാതാക്കൾ പ്രഖ്യാപിക്കുന്ന ആദ്യ പ്രധാന വില ക്രമീകരണമാണിത്. എൻട്രി ലെവൽ എ ക്ലാസ് സെഡാൻ മുതൽ അൾട്രാ ലക്ഷ്വറി മേബാക്ക്, ജി ക്ലാസ് മോഡലുകൾ ഉൾപ്പെടെ ഇന്ത്യയിൽ ലഭ്യമായ ബ്രാൻഡിന്റെ എല്ലാ വാഹനങ്ങളെയും ഈ വർധന ബാധിക്കും.

യൂറോയ്‌ക്കെതിരെ ഇന്ത്യൻ രൂപയുടെ തുടർച്ചയായ ദുർബലതയാണ് കമ്പനിയുടെ ചെലവ് ഘടനയെ നേരിട്ട് ബാധിക്കുന്നതെന്ന് മെഴ്‌സിഡസ് ബെൻസ് ഇന്ത്യ വ്യക്തമാക്കി. ഇറക്കുമതി ചെയ്യുന്ന ഘടകങ്ങൾ, സാങ്കേതിക ലൈസൻസുകൾ, പൂർത്തിയായ ചില വാഹനങ്ങൾ എന്നിവയ്ക്ക് യൂറോയിലാണ് പണമടയ്ക്കേണ്ടിവരുന്നത് എന്നതിനാൽ കറൻസി മാറ്റങ്ങൾ കമ്പനിയുടെ ചെലവിൽ നേരിട്ടുള്ള സ്വാധീനം ചെലുത്തുന്നു.

വില വർധന നടപ്പിലാക്കുന്നതിന് മുമ്പ് തന്നെ ഈ ചെലവ് സമ്മർദ്ദങ്ങൾ ആഭ്യന്തരമായി തന്നെ ഏറ്റുവാങ്ങിയിരുന്നുവെന്ന് കമ്പനി അറിയിച്ചു. അതേസമയം, ഉപഭോക്താക്കൾക്ക് ഉണ്ടാകുന്ന ആഘാതം പരമാവധി കുറയ്ക്കുന്നതിനായാണ് രണ്ട് ശതമാനം മാത്രം വർധന വരുത്തിയതെന്നും ഇത് “കാലിബ്രേറ്റ് ചെയ്ത നടപടി”യാണെന്നും കമ്പനി വിശദീകരിച്ചു.

സെഡാനുകൾ, എസ്‌യുവികൾ, ഇലക്ട്രിക് വാഹനങ്ങൾ, കൂപ്പെകൾ, കാബ്രിയോലെറ്റുകൾ, മൾട്ടി പർപ്പസ് വാഹനങ്ങൾ എന്നിവ ഉൾപ്പെടുന്ന മുഴുവൻ മോഡൽ നിരയിലും പുതിയ വില ബാധകമാകും.നിലവിലെ വിലയിൽ കാർ വാങ്ങാൻ ആഗ്രഹിക്കുന്ന ഉപഭോക്താക്കൾ മാർച്ച് 31 ന് മുമ്പ് അവരുടെ കാർ വാങ്ങൽ നടത്തുന്നത് ഉചിതമായിരിക്കും