മനുസ്‌മൃതിയിൽ ഭരണഘടന കാണുന്നവർ

ഹിന്ദുദേശീയതയിൽ വിശ്വസിക്കുന്ന ബിജെപിക്ക് ഇന്ത്യൻ ഭരണഘടനയെന്നത് എന്നും ഒരു ധർമസങ്കടമാണ്.  തെരഞ്ഞെടുപ്പ് രാഷ്ട്രീയത്തിന്റെ ഭാഗമായി ബാഹ്യമായി ഭരണഘടനയോട് വിധേയത്വം പ്രകടിപ്പിക്കുന്ന പാർടിയാണ് ബിജെപി. ദളിതർ ഉൾപ്പെടെ, സമൂഹത്തിൽ പാർശ്വവൽക്കരിക്കപ്പെട്ടവർ ഉൾപ്പെടെ എല്ലാ വിഭാഗം ജനങ്ങളുടെയും വോട്ടിനായി ബിജെപി അഭ്യർഥിക്കാറുണ്ട്. നിലവിൽ ബിജെപിയുടെ പാർലമെന്റ് അംഗസംഖ്യ വച്ച് ഈ ഭരണഘടന മാറ്റാനാകില്ല.  അതുകൊണ്ടുതന്നെ ഇതേക്കുറിച്ച് പരസ്യമായി അവർക്ക് പറയാനാകില്ല.  എന്നാൽ, ദളിതർക്കും പാർശ്വവൽക്കരിക്കപ്പെട്ടവർക്കും ഒരു വിമോചകനാണ് ഭരണഘടന. അവർക്ക്് ഭരണഘടനയോട് വൈകാരികമായ അടുപ്പംതന്നെയുണ്ട്. അവരെ സംബന്ധിച്ച് സാമൂഹ്യമാറ്റത്തിന്റെ ദിശയിലുള്ള ബാബാസാഹബ് അംബേദ്കറുടെ മഹത്തായ സംഭാവനയാണ് ഭരണഘടന. ബിജെപി അധികാരത്തിലിരിക്കുന്നത് ഭരണഘടനയിൽ മാറ്റങ്ങൾ വരുത്താനാണെന്ന കേന്ദ്രമന്ത്രി അനന്തകുമാർ ഹെഗ്ഡെയുടെ പ്രസ്താവന പാർലമെന്റിൽ മൂന്നിൽ രണ്ട് ഭൂരിപക്ഷം നേടുകയെന്ന ബിജെപിയുടെ മൊത്തത്തിലുള്ള തന്ത്രവുമായി പൊരുത്തപ്പെടുന്നതല്ല എന്ന് വേണമെങ്കിൽ വാദിക്കാം. എന്നാൽ ബ്രാഹ്മണ യുവ പരിഷത്ത് യോഗത്തിൽ സംസാരിക്കവെ ഹെഗ്ഡെ പറഞ്ഞത ്'മുസ്ലിമാണ്, ക്രിസ്ത്യാനിയാണ്, ബ്രാഹ്മണനാണ്, ലിംഗയാത്താണ് എന്നുപറഞ്ഞ് ഒരാൾ പരിചയപ്പെടുത്തുന്നത് എന്നെ ഏറെ സന്തോഷിപ്പിക്കും. എന്നാൽ, സെക്കുലറാണ് എന്നു പറയുമ്പോൾ പ്രശ്നങ്ങൾക്ക് തുടക്കമാകു'മെന്നാണ്. ഇത് അർഥമാക്കുന്നത് ഭരണഘടനയിൽ  മാറ്റം വരുത്താൻതന്നെയാണ് ബിജെപി ലക്ഷ്യമിടുന്നത് എന്നാണ്. എന്നാൽ, ഈ പ്രസ്താവനയെക്കുറിച്ച് ലോക്സഭയിൽ പ്രതിഷേധം ഉയർന്നപ്പോൾ ഭരണഘടനാമാറ്റത്തെക്കുറിച്ചും മതനിരപേക്ഷതയെക്കുറിച്ചുമുള്ള തന്റെ പ്രസ്താവനകൾ ആരെയെങ്കിലും വേദനിപ്പിച്ചിട്ടുണ്ടെങ്കിൽ മാപ്പ് പറയാൻ മടിയില്ലെന്നുപറഞ്ഞ് ഒഴിഞ്ഞുമാറുന്ന സമീപനമാണ് അനന്തകുമാർ ഹെഗ്ഡെ സ്വീകരിച്ചത്. 

ബിജെപിയുടെ യാഥാർഥ ലക്ഷ്യം എന്താണെന്ന് ഇതിലൂടെ വ്യക്തമാക്കപ്പെടുകയാണ്. ഹെഗ്ഡെയുടെ മാപ്പിരക്കൽ വെറും തന്ത്രമാണെന്ന് കാണാം.  ഭരണഘടയിൽ തൊട്ട് സത്യംചെയ്‌ത് അധികാരത്തിലെത്തിയ ബിജെപി ഭരണഘടനയ്ക്കകത്ത് നിന്നു പ്രവർത്തിക്കാൻ നിർബന്ധിതമാണ്. എന്നിരുന്നാലും 1998ൽ എൻഡിഎ സർക്കാർ അധികാരത്തിൽ വന്നപ്പോൾ ഭരണഘടന പുനഃപരിശോധിക്കാനായി ജസ്റ്റിസ് വെങ്കടചെല്ലയ്യ കമ്മിറ്റിയെ നിയോഗിച്ചു. ബിജെപിയുടെ ഭാഗത്തുനിന്ന് ആദ്യത്തെ പരസ്യമായ പ്രഖ്യാപനമായിരുന്നു അത്. എന്നാൽ, സമൂഹത്തിലെ ഭൂരിപക്ഷംപേരും ഭരണഘടനാപുനഃപരിശോധനയ്ക്ക് എതിരാണെന്ന് ബോധ്യപ്പെട്ടതോടെ കമീഷൻ റിപ്പോർട്ട് പൂഴ്ത്തുകയായിരുന്നു. 

എന്നാൽ, 2014ൽ മോഡി സർക്കാർ അധികാരത്തിൽവന്നതിന് ശേഷം 2015ലെ റിപ്പബ്ലിക് ദിനത്തോടനുബന്ധിച്ച് ഭരണഘടനയുടെ ആമുഖത്തോടുകൂടി നൽകിയ പരസ്യത്തിൽ സെക്കുലർ എന്ന പദവും സോഷ്യലിസ്റ്റ് എന്ന പദവും ഇല്ലായിരുന്നു. 2017 നവംബറിൽ യോഗി ആദിത്യനാഥ് പറഞ്ഞു സെക്കുലറിസം എന്നു പറഞ്ഞാൽ ഏറ്റവും വലിയ കള്ളമാണെന്ന്. 

ബിജെപി അവരുടെ യഥാർഥ അജൻഡ ഇപ്പോൾ വെളിപ്പെടുത്തണമെന്നില്ലെങ്കിലും നിലവിലുള്ള ഭരണഘടയിൽ അവർ തൃപ്തരല്ലെന്ന് ഉറപ്പ്. കശ്മീർ സംബന്ധിച്ച അനുച്ഛേദം 370, മതസ്വാതന്ത്ര്യം സംബന്ധിച്ച അനുച്ഛേദം 25, ന്യൂനപക്ഷങ്ങൾ വിദ്യാഭ്യാസ സ്ഥാപനങ്ങൾ സ്ഥാപിക്കുന്നത് സംബന്ധിച്ചുള്ള അനുച്ഛേദം 30 എന്നിവയുമായി ബന്ധപ്പെട്ടാണ് ബിജെപിയുടെ അതൃപ്തി.  ആർഎസ്എസ് കുടുംബത്തിലെ ഒരംഗമാണ് ബിജെപി എന്നിരിക്കെ ആർഎസ്എസ് താത്വികാചാര്യന്മാരും വിഎച്ച്പിയും മറ്റും ഈ വിഷയത്തിൽ എന്താണ് പറയുന്നതെന്ന് പരിശോധിക്കണം.  ഈ സംഘടനകളെല്ലാംതന്നെ ഭരണഘടനയോടുള്ള അവരുടെ എതിർപ്പ് ആവർത്തിച്ച് വ്യക്തമാക്കിയിട്ടുണ്ട്. 

നിലവിലുള്ള ഭരണഘടന അനുവദിക്കുന്ന ജനാധിപത്യ‐മതനിരപേക്ഷ ഇടം ഉപയോഗപ്പെടുത്തി ഹിന്ദു ദേശീയതയ്ക്ക് വഴി ഒരുക്കുന്നതിനാണ് ഹിന്ദുദേശീയതയുടെ അടിസ്ഥാനത്തിൽ പ്രവർത്തിക്കുന്ന എല്ലാ രാഷ്ട്രീയ സംഘടനകളുടെയും ശ്രമം. ആർഎസ്എസ് താത്വികാചാര്യനായ ഗോൾവാൾക്കർ അദ്ദേഹത്തിന്റെ വിചാരധാര എന്ന കൃതിയിൽ പറയുന്നത് ഇന്ത്യൻ ഭരണഘടനയ്ക്ക് അടിസ്ഥാനമായുള്ള ഭൂമിശാസ്ത്രപരമായ ദേശീയത അപരിഷ്കൃതമാണെന്നാണ്. രാഷ്ട്രം എന്ന് പറയുന്നത് 'രാഷ്ട്രീയ‐സാമ്പത്തിക അവകാശങ്ങളുടെ ഒരു മാറാപ്പ്്' മാത്രമല്ലെന്നും ദേശീയ സംസ്കാരത്തിന്റെയും പ്രാചീനവും ഉൽക്കൃഷ്ടവുമായ ഹിന്ദുയിസത്തിന്റെയും മൂർത്തിമദ്ഭാവമാണെന്നാണ്. ഹിന്ദു സംസ്‌കാരത്തിന്  ബാഹ്യമായ സങ്കൽപ്പമാണ് ജനാധിപത്യമെന്നും ഗോൾവാൾക്കർ പറയുന്നു.

ഭരണഘടന നിർമാണസഭ 1949 നവംബർ 26ന് ഇന്ത്യൻ ഭരണഘടനയ്ക്ക് അന്തിമമായി അംഗീകാരം നൽകിയപ്പോൾ ആർഎസ്എസ് ഒട്ടും സന്തോഷിച്ചിരുന്നില്ല.  നവംബർ മുപ്പതിന് ആർഎസ്എസിന്റെ മുഖപ്രസിദ്ധീകരണമായ ഓർഗനൈസർ മുഖപ്രസംഗത്തിൽ പരാതിപ്പെട്ടത് 'ഭരണഘടനയിൽ പ്രാചീനഭാരതത്തിലെ അനന്യമായ ഭരണഘടനാവികാസത്തെക്കുറിച്ച് പരാമർശമൊന്നുമില്ലെ 'ന്നാണ്. 'മനുവിന്റെ നിയമങ്ങൾ സ്പാർട്ടയിലെ ലൈക്കർഗസിനും പേഴ്സ്യയിലെ സോളനും മുമ്പുള്ളതാണ്. ഈ ദിവസം വരെയും മനുസ്മൃതിയിലെ നിയമങ്ങൾ ലോകത്തിന്റെ മുഴുവൻ പ്രശംസയ്ക്ക് പാത്രമായി. എന്നാൽ, നമ്മുടെ ഭരണഘടനാപണ്ഡിതർക്ക് അതൊന്നും ഒന്നുമല്ലായിരുന്നു' എന്നും ഓർഗനൈസർ പരിതപിച്ചു.

ഭൂരിപക്ഷം ഹിന്ദു ദേശീയവാദികളും ഇന്നും ആവേശം ഉൾക്കൊള്ളുന്നത് താത്വികാചാര്യനായ വി ഡി സവർക്കറിൽനിന്നാണ്. അദ്ദേഹത്തിന്റെ വാദമിതാണ്. 'നമ്മുടെ ഹിന്ദുരാഷ്ട്രത്തിൽ വേദങ്ങൾ കഴിഞ്ഞാൽ ഏറ്റവും ആരാധിക്കപ്പെടാവുന്നത് മനുസ്മൃതിയാണ്.  പ്രാചീനകാലംമുതൽ നമ്മുടെ സംസ്കാരത്തിന്റെയും ആചാരങ്ങളുടെയും ചിന്തയുടെയും പ്രവൃത്തിയുടെയും അടിസ്ഥാനം മനുസ്മൃതിയാണ്. ഇപ്പോഴും കോടിക്കണക്കിന് വരുന്ന ഹിന്ദുക്കൾ അവരുടെ ജീവിതത്തിൽ പിന്തുടർന്നുപോരുന്ന രീതികളും ചടങ്ങളും മനുസ്മൃതിയെ അടിസ്ഥാനപ്പെടുത്തിയിട്ടുള്ളതാണ്. മനുസ്‌മൃതിതന്നെയാണ് ഹിന്ദു നിയമം'.

ആർഎസ്എസിന്റെ മറ്റൊരു താത്വികാചാര്യൻ ദീനദയാൽ ഉപാധ്യായയാണ്. ബിജെപിയുടെ മുൻ രൂപമായ ജനസംഘത്തിന്റെ നേതാവായിരുന്നു അദ്ദേഹം. പാശ്ചാത്യരെ അനുകരിച്ചുള്ള ഒരു ഭരണഘടനയാണ് ഇന്ത്യയിൽ എഴുതി ഉണ്ടാക്കിയതെന്നും വ്യക്തികളും സമൂഹവും തമ്മിലുള്ള ബന്ധം സംബന്ധിച്ച ഇന്ത്യൻ ധാരണകളിൽനിന്ന് തീർത്തും വേർപിരിഞ്ഞുള്ളതാണ് ഈ ഭരണഘടനയെന്നും അദ്ദേഹം അഭിപ്രായപ്പെടുകയുണ്ടായി. ഇന്ത്യൻ ഭരണഘടനയെ ശക്തമായി വിമർശിച്ച അദ്ദേഹം ഒരു ഹിന്ദുരാഷ്ട്രത്തിന് വേണ്ടിയാണ് വാദിച്ചത്. ദീനദയാലിന്റെ ചിന്തകളാണ് ഇന്നത്തെ ബിജെപി നേതൃത്വത്തെ ഏറ്റവും കൂടുതൽ സ്വാധിനീക്കുന്നത്. ബിജെപിക്ക് എതിർപ്പുള്ള ഭരണഘടനയിലെ അനുച്ഛേദം 25, 30, 370 എന്നിവയാണ് ഇന്ത്യൻ ബഹുസ്വര സമൂഹത്തെ പ്രതിഫലിപ്പിക്കുന്നതും അവരുടെ ശാക്തീകരണത്തിന് വഴിവയ്ക്കുന്നതും. ഇന്ത്യൻ ഭരണഘടനയിൽ അന്തഃസത്തയായി നിലകൊള്ളുന്ന സമത്വം എന്ന ആശയമാണ്. ബിജെപിയുടെ യുടെ ആശയപദ്ധതിയുടെ സ്രോതസ്സായിത്തീർന്ന പല താത്വികാചാര്യന്മാരും ഉയർത്തിപ്പിടിക്കുന്ന ഇതേ മനുസ്‌മൃതിയാണ് ഇന്ത്യൻ ഭരണഘടനാശിൽപ്പിയായ ബാബാസാഹബ് അംബേദ്കർ കത്തിച്ചുകളഞ്ഞത്! 

(ബോംബെ ഐഐടിയിലെ മുൻ അധ്യാപകനാണ് ലേഖകൻ. കടപ്പാട്: സബ്രംഗ് ഇന്ത്യ)