ലെനിനെ ചുവന്ന തൂവാലയാക്കിയ ഭഗത് സിങ്
ശ്രീകുമാർ ശേഖർ
Published on Jul 11, 2025, 01:01 PM | 3 min read
തൂക്കിലേറ്റപ്പെടുന്നതിനു അറുപതു ദിവസം മുമ്പ് പോലും തെളിമയോടെ, രാഷ്‌ട്രീയ കാഴ്‌ചപ്പാട് ഉയര്‍ത്തിപ്പിടിച്ച ഭഗത് സിങ്ങിനെയാണ് വ്യാജ ചരിത്ര നിർമിതിയിലൂടെയും സാങ്കല്‍പ്പിക കഥകളിലൂടെയും സംഘപരിവാറിന്റെ മുന്‍ഗാമിയാക്കിയെടുക്കാന്‍ ചിലര്‍ പാടുപെടുന്നത് എന്നുകൂടി ഓർക്കാം. 1931 മാര്‍ച്ച് 23‐നാണ്‌ ലാഹോര്‍ സെന്‍ട്രല്‍ ജയിലില്‍ ഭഗത് സിങ്ങും സഖാക്കളായ രാജ് ഗുരുവും സുഖ്ദേവും തൂക്കിലേറ്റപ്പെട്ടത്. ഏറ്റവും ഒടുവിൽ, തൂക്കുമരത്തിലേക്ക്‌ കൂട്ടാൻ വന്ന ഉദ്യോഗസ്ഥരോട്‌ വായിക്കുന്ന പുസ്‌തകം തീർക്കാൻ ഭഗത് സിങ് അനുമതി ചോദിച്ചതായി ജീവചരിത്ര രചയിതാക്കൾ എഴുതുന്നു. ജർമൻ മാർക്‌സിസ്റ്റായ ക്ലാര സ്വെറ്റ്‌കിൻ എഴുതിയ Reminiscences of Lenin (ലെനിനെപ്പറ്റിയുള്ള ഓർമകൾ) ആയിരുന്നു ആ കൃതി.
ലാഹോറിലെ പൂഞ്ച്‌ ഹൗസിലെ പ്രത്യേക കോടതിയിലെ 1931 ജനുവരി 24‐ന്റെ സംഭവങ്ങൾ രേഖപ്പെടുത്തുന്ന ബ്രിട്ടീഷ് റിപ്പോർട്ടിൽ (File no. 172/30- Folitical, National Archives) ഇങ്ങനെ വായിക്കാം: ‘‘പ്രതികള്‍ മിക്കവരും ഇന്നു കോടതിയിലെത്തിയത് ലെനിൻ ദിനാചരണത്തിന്റെ ഭാഗമായി തലയിൽ ചുവന്ന തൂവാല കെട്ടിയാണ്‌. പരസ്‌പരം സംസാരിക്കുകയും ഇടവിട്ട്‌ പതിവ്‌ വിപ്ലവമുദ്രാവാക്യങ്ങൾ മുഴക്കുകയും ചെയ്‌തു.’’
ഭഗത് സിങ്ങും സഖാക്കളുമായിരുന്നു ഈ പ്രതികൾ. ലാഹോറിലെ സെൻട്രൽ ലെജിസ്ലേറ്റീവ് അസംബ്ലിയിൽ ബോംബെറിഞ്ഞ കേസിലും ജോണ്‍ പി സാണ്ടേഴ്സ് എന്ന ബ്രിട്ടീഷ് പൊലീസ് ഉദ്യോഗസ്ഥനെ വെടിവച്ചു വീഴ്‌ത്തിയ കേസിലും വിചാരണ നേരിടുകയായിരുന്നു അവർ. വിചാരണ തുടങ്ങുംമുമ്പ് ഭഗത് സിങ് മജിസ്ട്രേറ്റിനോട് ഒരു ആവശ്യം ഉന്നയിക്കുന്നു. ‘‘ലെനിൻ ദിനത്തിന്റെ അഭിവാദ്യം അറിയിച്ചുകൊണ്ട്‌ ഞങ്ങള്‍ക്ക് മോസ്‌കോയിലെ മൂന്നാം കമ്യൂണിസ്റ്റ് ഇന്റർനാഷണലിന്റെ പ്രസിഡന്റിന്‌ ഒരു ടെലഗ്രാം അയക്കണം.’’ ഇതിനിടയിൽ ലെനിനും സോഷ്യലിസ്റ്റ്‌ വിപ്ലവത്തിനും അഭിവാദ്യം അർപ്പിക്കുന്ന മുദ്രാവാക്യങ്ങൾ അവർ മുഴക്കുന്നുണ്ട്‌. തുടർന്ന് ആ ടെലഗ്രാമിന്റെ ഉള്ളടക്കം ഭഗത് സിങ് കോടതിയിൽ ഉറക്കെ വായിച്ചു.
‘മഹാനായ ലെനിന്റെ ചിന്തകളെ, ആശയങ്ങളെ മുന്നോട്ട് നയിക്കുന്ന, അതിനുവേണ്ടി പ്രവര്‍ത്തിക്കുന്ന മുഴുവന്‍ ആളുകളെയും ഈ ലെനിൻ ദിനത്തിൽ ഞങ്ങള്‍ അഭിവാദ്യം ചെയ്യുന്നു. റഷ്യ മുന്നോട്ട് കൊണ്ടുപോകുന്ന ഈ പരീക്ഷണത്തിന് എല്ലാ വിജയവും ആശംസിക്കുന്നു. സാർവദേശീയ തൊഴിലാളി വര്‍ഗ പ്രസ്ഥാനത്തോടൊപ്പം ഞങ്ങളുടെ ഈ ശബ്ദവും ചേർത്തുവയ്‌ക്കുന്നു. തൊഴിലാളി വർഗം വിജയിക്കും. മുതലാളിത്തം പരാജയപ്പെടും. സാമ്രാജ്യത്വം തുലയട്ടെ.’ ഇതായിരുന്നു ആ സന്ദേശം. മൂന്നാം ഇന്റർനാഷണലിന്റെ ആര്‍ക്കൈവ്സില്‍ ഈ ടെലഗ്രാമിന്റെ ഉള്ളടക്കം ഇപ്പോഴും കാണാം.
മൂന്നാം കമ്യൂണിസ്റ്റ് ഇന്റർനാഷണലിന്‌ ഭഗത് സിംഗും സഖാക്കളും അയച്ച ടെലിഗ്രാമിന്റെ ഉളളടക്കം.(http://www.shahidbhagatsingh.org/)
ഓരോ ചുവടുവയ്‌പ്പും തൂക്കുമരത്തിലേക്കാണെന്ന തിരിച്ചറിവിന്റെ നിമിഷങ്ങളില്‍ പോലും ഭഗത് സിങ് പുലർത്തിയ രാഷ്‌ട്രീയ ജാഗ്രതയുടെ രേഖാസാക്ഷ്യമായി ഈ കോടതിക്കുറിപ്പുകൾ നിലനിൽക്കുന്നു. ലെനിൻ ദിനാചരണം പോലെയുള്ള ചെയ്‌തികൾ തങ്ങളുടെ കേസിനെ ദുർബലപ്പെടുത്തുമെന്ന മുന്നറിയിപ്പ് അഭിഭാഷകർ നൽകിയിരുന്നു. അതുപോലും തള്ളിക്കൊണ്ടായിരുന്നു ഈ നിലപാട്‌. ഡോ. കെ എന്‍ പണിക്കരെപ്പോലെയുള്ള മാർക്‌സിസ്റ്റ്‌ ചരിത്ര പണ്ഡിതര്‍ ഭഗത് സിങ്ങിനെ ഒരു ആദ്യകാല മാർക്‌സിസ്റ്റ്‌ (Early Marxist) എന്നു വിളിക്കുന്നത്‌ ഈ സാഹചര്യത്തിലാണ്‌.
ലാഹോര്‍ ജയിലില്‍ തൂക്കുമരം കാത്തു കിടക്കുമ്പോള്‍ 1930‐ലാണ് ഭഗത് സിങ് ‘Why I am an Atheist’ (എന്തുകൊണ്ട് ഞാന്‍ ഒരു നിരീശ്വരവാദിയാണ്) എന്ന ഉപന്യാസം എഴുതിയത്. ഭഗത് സിങ്ങും സഖാക്കളും പ്രവര്‍ത്തിച്ച ഹിന്ദുസ്ഥാന്‍ റിപ്പബ്ലിക്കന്‍ അസോസിയേഷനിൽ 1928‐ല്‍ സോഷ്യലിസം കൂട്ടിച്ചേര്‍ത്തത്‌ ഭഗത് സിങ്ങിന്റെ നിര്‍ദേശത്തെ തുടർന്നാണ്‌.
1928‐ല്‍ ‘കീര്‍ത്തി’ വാരികയില്‍ എഴുതിയ ലേഖനത്തില്‍ സമൂഹത്തില്‍ വിഭജനം സൃഷ്ടിക്കുന്ന വര്‍ഗീയതക്കെതിരെ ഭഗത് സിങ് മുന്നറിയിപ്പ് നല്‍കുന്നു. മാർക്‌സിനെയാണ് അദ്ദേഹം ഉദ്ധരിക്കുന്നത്. "വിശപ്പിന്റെ പ്രശ്നങ്ങള്‍ തന്നെയാണ് എല്ലാത്തിന്റെയും അടിസ്ഥാനം. മാർക്‌സ്‌ പകര്‍ന്ന ഉള്‍ക്കാഴ്‌ചകളില്‍ ഒന്നാണിത്. പരസ്‌പരമുള്ള കലാപം അവസാനിപ്പിക്കാന്‍ ഉണ്ടാവേണ്ടത് വര്‍ഗബോധമാണ്. ദരിദ്രര്‍, കഷ്‌ടപ്പെടുന്നവര്‍, കര്‍ഷകര്‍ തുടങ്ങിയവര്‍ എല്ലാവരും മുതലാളിത്തമാണ് അവരുടെ യഥാർഥ ശത്രു എന്ന് മനസ്സിലാക്കണം...' ലേഖനത്തില്‍ പറയുന്നു.
ലെനിൻ ദിനം ആചരിക്കാൻ ഭഗത് സിങ്ങും സഖാക്കളും ചുവന്ന തൂവാല ധരിച്ചുവന്നതിന്റെ കോടതി രേഖ
ഇതെല്ലാം നിലനിൽക്കെ ഭഗത് സിങ് ഒരു ഹിന്ദുത്വ പോരാളിയായിരുന്നുവെന്ന്‌ സ്ഥാപിക്കാൻ ആർഎസ്‌എസ്‌ ശ്രമിക്കുന്നുണ്ട്‌. അതിനായി ഹാജരാക്കുന്ന ‘തെളിവുകൾ’ അവരുടെ പ്രസിദ്ധീകരണങ്ങളിൽ കാണാം. ‘പഞ്ചാബി ഭാഷയെപ്പറ്റി പതിനാറാം വയസ്സില്‍ എഴുതിയ ലേഖനത്തില്‍ ഉര്‍ദു ഭാഷയെ പരിഹസിച്ചു. മുസ്ലീം അധിനിവേശത്തിനെതിരായിരുന്നു അദ്ദേഹം എന്ന് വ്യക്തമല്ലേ? ജയില്‍ കുറിപ്പില്‍ ചിലയിടത്ത് വി ഡി സവര്‍ക്കറുടെ ‘ഹിന്ദു പദപാദശാഹി’എന്ന കൃതിയില്‍നിന്ന് ചിലത് ഭഗത് സിങ് ഉദ്ധരിച്ചിട്ടുണ്ട്. അപ്പോള്‍ സവര്‍ക്കറുടെ അനുയായി ആണെന്നതില്‍ സംശയമുണ്ടോ?’ എന്നൊക്കെയാണ് ചോദ്യങ്ങള്‍.
തൂക്കിലേറ്റപ്പെടുന്നതിനു അറുപതു ദിവസം മുമ്പ് പോലും തെളിമയോടെ, രാഷ്‌ട്രീയ കാഴ്‌ചപ്പാട് ഉയര്‍ത്തിപ്പിടിച്ച ഭഗത് സിങ്ങിനെയാണ് വ്യാജ ചരിത്ര നിർമിതിയിലൂടെയും സാങ്കല്‍പ്പിക കഥകളിലൂടെയും സംഘപരിവാറിന്റെ മുന്‍ഗാമിയാക്കിയെടുക്കാന്‍ ചിലര്‍ പാടുപെടുന്നത് എന്നുകൂടി ഓർക്കാം. 1931 മാര്‍ച്ച് 23‐നാണ്‌ ലാഹോര്‍ സെന്‍ട്രല്‍ ജയിലില്‍ ഭഗത് സിങ്ങും സഖാക്കളായ രാജ് ഗുരുവും സുഖ്ദേവും തൂക്കിലേറ്റപ്പെട്ടത്. ഏറ്റവും ഒടുവിൽ, തൂക്കുമരത്തിലേക്ക്‌ കൂട്ടാൻ വന്ന ഉദ്യോഗസ്ഥരോട്‌ വായിക്കുന്ന പുസ്‌തകം തീർക്കാൻ ഭഗത് സിങ് അനുമതി ചോദിച്ചതായി ജീവചരിത്ര രചയിതാക്കൾ എഴുതുന്നു. ജർമൻ മാർക്‌സിസ്റ്റായ ക്ലാര സ്വെറ്റ്‌കിൻ എഴുതിയ Reminiscences of Lenin (ലെനിനെപ്പറ്റിയുള്ള ഓർമകൾ) ആയിരുന്നു ആ കൃതി.
