സ്വാതന്ത്ര്യസമരകാലത്ത് ആൻഡമാൻ ജയിലിൽ അടയ്ക്കപ്പെടുകയും തുടർച്ചയായി മാപ്പെഴുതി പുറത്തുവരികയും ചെയ്ത സവർക്കർ പിന്നീട് എന്തു ചെയ്യുകയായിരുന്നു എന്ന ചോദ്യത്തിന്‌ ഉത്തരം കൂടിയാണ്‌ ഈ പ്രസ്‌താവന. 1948-‐ൽ മഹാത്മാഗാന്ധിയുടെ വധത്തിൽ പ്രതിയായത്‌ ചരിത്രത്തിലുണ്ട്. എന്നാൽ ഇത് മാത്രമല്ല, അദ്ദേഹത്തിന്റെ ‘സംഭാവന’യെന്ന്‌ ചരിത്രം രേഖാമൂലം ബോധ്യപ്പെടുത്തുന്നു.

“ഹിന്ദു സംഘടനകളും വ്യക്തികളും ദുരിതമനുഭവിക്കുന്ന ഹിന്ദുക്കൾക്ക് മാത്രമേ സഹായം നൽകാവൂ. ആ സഹായം മുസ്ലീങ്ങളിൽ എത്താതെ നോക്കണം”‐ ലക്ഷങ്ങൾ മരിച്ചുവീണ ഒരു കൊടുംക്ഷാമത്തിന്റെ നടുവിൽ ഇങ്ങനെയൊരു ആഹ്വാനവുമായി ഒരു നേതാവോ സംഘടനയോ പുറപ്പെട്ടാൽ അവരെ എന്തുപേര്‌ വിളിക്കാനാകും? മനുഷ്യർ എന്നു വിളിക്കാനാകുമോ?

1943 ആണ്‌ വർഷം. രണ്ടാം ലോകയുദ്ധകാലത്തെ ബംഗാൾ ക്ഷാമം. 30 ലക്ഷം പേർ മരിച്ചു എന്നാണ്‌ ഏകദേശ കണക്ക്‌. എത്ര ഭീതിദമായിരിക്കും ആ ദുരന്തം എന്നറിയാൻ ഈ കണക്ക്‌ മതിയല്ലോ. ക്ഷാമം ജീവനുകൾ വിഴുങ്ങി പടരുന്നു. പണമായും ഉൽപ്പന്നങ്ങളായും സഹായം ഒഴുകുന്നു.

ബംഗാൾ ക്ഷാമകാലത്തെ ചിത്രം

അങ്ങനെയൊരു ദുരന്തഭൂമിയിലേക്കാണ്‌ മതക്കണ്ണുമായി ആ നേതാവിന്റെ സന്ദേശമെത്തുന്നത്‌. ബോംബെയിൽനിന്ന്‌ ഹിന്ദുമഹാസഭാ പ്രസിഡന്റ്‌ വി ഡി സവർക്കറുടെ പ്രസ്‌താവന. ഈ കുറിപ്പിനൊപ്പമുള്ള രേഖകൾ 1943 ഡിസംബറിൽ നിന്നാണ്‌ (File No. 87/45-PolK I,National Archives of India).

സവർക്കറുടെ പ്രസ്‌താവന (നാഷണൽ ആർക്കൈവ്‌സ്‌)

'ബംഗാളിലെ ക്ഷാമഭൂമിയിൽ മുസ്ലീങ്ങൾ ഹിന്ദു സ്‌ത്രീകളെയും കുട്ടികളെയും മതം മാറ്റുന്നു. സ്വന്തം മതത്തെ തള്ളിപ്പറയുംവരെ സഹായം നൽകാതെ അവരെ പട്ടിണിക്കിടുന്നു’ ‐ഇതായിരുന്നു മുഖ്യ ആരോപണം.

രാമകൃഷ്‌ണ മിഷൻ, ബംഗാൾ റിലീഫ് കമ്മിറ്റി പോലെയുള്ള ഹിന്ദു സംഘടനകൾ നൽകുന്ന പണം മുഴുവൻ മുസ്ലീങ്ങൾക്കാണ് പോകുന്നത്.

മുസ്ലിം സംഘടനകൾ പിരിച്ചെടുക്കുന്ന തുക മുഴുവൻ ഹിന്ദുക്കളെ മതം മാറ്റാൻ ഉപയോഗിക്കുന്നു. അതുകൊണ്ട് ഹിന്ദു സംഘടനകളും വ്യക്തികളും ദുരിതമനുഭവിക്കുന്ന ഹിന്ദുക്കൾക്ക് മാത്രമേ സഹായം നൽകാവൂ എന്ന ആഹ്വാനവും ഉണ്ടായിരുന്നു.

സ്വാതന്ത്ര്യസമരകാലത്ത് ആൻഡമാൻ ജയിലിൽ അടയ്‌ക്കപ്പെടുകയും തുടർച്ചയായി മാപ്പെഴുതി പുറത്തുവരികയും ചെയ്‌ത സവർക്കർ പിന്നീട് എന്തു ചെയ്യുകയായിരുന്നു എന്ന ചോദ്യത്തിന്‌ ഉത്തരം കൂടിയാണ്‌ ഈ പ്രസ്‌താവന. 1948‐ൽ മഹാത്മാഗാന്ധിയുടെ വധത്തിൽ പ്രതിയായത്‌ ചരിത്രത്തിലുണ്ട്. എന്നാൽ ഇത് മാത്രമല്ല, അദ്ദേഹത്തിന്റെ ‘സംഭാവന’യെന്ന്‌ ചരിത്രം രേഖാമൂലം ബോധ്യപ്പെടുത്തുന്നു.

സവർക്കർ

1943 നവംബർ അവസാനവും ഡിസംബർ ആദ്യവുമായി യുണൈറ്റഡ്‌ പ്രസ്‌ വഴി പല പത്രങ്ങളിലും പ്രസ്‌താവന വന്നു. ബ്രിട്ടീഷ്‌ ഇന്ത്യയിലെ ആഭ്യന്തര സെക്രട്ടറി സർ റെജിനാൾഡ്‌ മാക്‌സ്‌വെല്ലിന്‌ പ്രസ്‌താവനയുടെ പൂർണരൂപം ബോംബെയിലെ ബ്രിട്ടീഷ്‌ അധികൃതർ അയച്ചു.

‘വളരെ വിഷലിപ്‌തമായ ഭാഷയിലാണ്‌ പ്രസ്‌താവന. ബംഗാളിൽ സവർക്കർക്ക്‌ കാര്യമായ സ്വാധീനമൊന്നുമില്ലെങ്കിലും പ്രസ്‌താവന വളരെ കുഴപ്പംപിടിച്ച പ്രത്യാഘാതങ്ങൾ ഉണ്ടാക്കിയേക്കാം’ എന്ന്‌ റെജിനാൾഡ്‌ ഫയലിൽ കുറിച്ചു. നിയമനടപടി പരിഗണിക്കാൻ ബംഗാൾ സർക്കാരിനു നിർദേശം നൽകി.

ദുരിതാശ്വാസ പ്രവർത്തനത്തിൽ ഏർപ്പെട്ടിരുന്ന വിവിധ സംഘടനകളും വ്യക്തികളും സവർക്കറുടെ ആരോപണം നിഷേധിച്ചു. ബംഗാൾ സർക്കാരും ആരോപണം തള്ളി. ശ്യാമപ്രസാദ് മുഖർജി അടക്കമുള്ള ഹിന്ദു സഭാനേതാക്കൾ പോലും ആരോപണം ഏറ്റെടുക്കാൻ വിസമ്മതിച്ചു.

ഇതിനിടെ ആരോപണം മഹാത്മാഗാന്ധിയുടെ ശ്രദ്ധയിൽ വന്നു. വാർധാ സേവാഗ്രാമിലെ അന്തേവാസി ‘ഗാന്ധിജിയുടെ ദത്തുപുത്രി’ എന്നറിയപ്പെട്ട അംതുസ്‌ സലാം അന്വേഷണത്തിന്‌ നിയോഗിക്കപ്പെട്ടു.

അംതുസ്‌ സലാം

അവർ ബംഗാളിൽ നേരിട്ടുപോയി അന്വേഷണം നടത്തി. അവരുടെ കണ്ടെത്തൽ അസോസിയറ്റ് പ്രസ് പ്രസിദ്ധീകരിച്ചു.

വിശദമായ അന്വേഷണത്തിനും വിവിധ ഹിന്ദു‐ മുസ്ലിം സംഘടനകളുമായി വ്യക്തിപരമായി ചർച്ച നടത്തിയശേഷവും ആയിരുന്നു അവരുടെ റിപ്പോർട്ട്. ആരോപണം പച്ചക്കള്ളമാണെന്ന് അവർ എഴുതി.

'ഹിന്ദുവിനെ മുസ്ലിം ആക്കാനോ തിരിച്ചോ ഒരു ശ്രമവും ഒരിക്കലും ഒരിടത്തും ഉണ്ടായിട്ടില്ല.

നേരെമറിച്ച്, ഹിന്ദു‐മുസ്ലിം സംഘടനകളായ മാർവാറി സർവീസ് സൊസൈറ്റി, രാമകൃഷ്‌ണ മിഷൻ, ആര്യസമാജ്‌ റിലീഫ് കമ്മിറ്റി, മുസ്ലിം ചേംബർ ഓഫ് കൊമേഴ്സ് റിലീഫ് കമ്മിറ്റി തുടങ്ങിയവ ഹിന്ദുക്കളും മുസ്ലീങ്ങളുമായ അഗതികൾക്ക് മതമോ ജാതിയോ പരിഗണിക്കാതെ സഹായം നൽകുന്നുണ്ടെന്ന് മനസ്സിലാക്കി.’

ബംഗാളിലാകെ സഹായ പ്രവർത്തനവുമായി സഞ്ചരിക്കുന്ന ബംഗാൾ റിലീഫ് കമ്മിറ്റി സെക്രട്ടറി ഭഗീരഥ്‌ കനോറിയയുമായും സംസാരിച്ചു. 'ഒരിടത്തും മതംമാറ്റങ്ങളുണ്ടായതായി കേട്ടിട്ടില്ല എന്ന് അദ്ദേഹവും വ്യക്തമാക്കി’‐ റിപ്പോർട്ട് പറയുന്നു.

അംതുസ്‌ സലാമിന്റെ അന്വേഷണ റിപ്പോർട്ട്‌ (അസോസിയേറ്റ്‌ പ്രസ്‌ വാർത്ത)

‘വർഗീയത വളർത്തുന്ന ഇത്തരം പ്രസ്‌താവനകൾ നടത്തി മാതൃഭൂമിയുടെ സ്വാതന്ത്ര്യം വൈകിപ്പിക്കുന്ന പ്രവർത്തനങ്ങളിൽ ഉത്തരവാദപ്പെട്ട നേതാക്കൾ ഏർപ്പെടരുതെന്ന’ അഭ്യർഥനയോടെയാണ്‌ അംതുസ്‌ സലാം തന്റെ റിപ്പോർട്ട്‌ അവസാനിപ്പിക്കുന്നത്‌.

ബംഗാളിലെ ഹിന്ദുമഹാസഭാ നേതാക്കൾപോലും ഉന്നയിക്കാൻ മടിച്ച ഹീനമായ ആരോപണം ഉന്നയിച്ച വി ഡി സവർക്കറുടെ യഥാർഥ ലക്ഷ്യം, അംതുസ്‌ സലാമിന്റെ റിപ്പോർട്ടിന്റെ അവസാന വരികളിൽ ഉണ്ട്.

ബ്രിട്ടീഷുകാർക്ക് മാപ്പ് എഴുതി പുറത്തുവന്ന സവർക്കർ അവർക്ക് നൽകിയ ഉറപ്പ് പാലിക്കുകയായിരുന്നു എന്ന് കരുതാം.

ദേശാഭിമാനി വാരികയിൽ നിന്ന്