ഗാന്ധിജി അടക്കമുള്ള നേതാക്കളെ മോചിപ്പിക്കാൻ കമ്യൂണിസ്റ്റ്‌ പാർടിയുടെ അഭ്യർഥനയും വന്നു. ക്വിറ്റ്‌ ഇന്ത്യ സമരത്തിൽ വ്യത്യസ്ത നിലപാടുണ്ടായിരുന്നെങ്കിലും പാർടി ശക്തമായി രംഗത്തെത്തി.

കണ്ണൂർ പാപ്പിനിശ്ശേരിയിലെ പോള പാറുവും എം ഡി കദീശയും മുതൽ പണ്ണേരി ചെമ്മരതിയും ചെറിയയും വരെ നീളുന്ന 261 സ്‌ത്രീകൾ ഒപ്പുവച്ച് ‘ഹിസ്‌ എക്‌സലൻസി ദ വൈസ്രോയി’ ക്ക്‌ കത്തെഴുതിയത്‌ 82 കൊല്ലം മുമ്പാണ്‌. ഇവരെല്ലാം മലയാളത്തിൽ പേരെഴുതി ഒപ്പിട്ട കത്തിന്‌ ഇംഗ്ലീഷിൽ ഒരു തുടക്കക്കുറിപ്പുണ്ട്‌. ‘പാപ്പിനിശ്ശേരിയിലെ സ്‌ത്രീകൾ’ എന്നാണ്‌ കത്ത്‌ അയക്കുന്നവർ പരിചയപ്പെടുത്തുന്നത്‌.

ഉള്ളടക്കം ഇങ്ങനെ:

ബഹുമാനപ്പെട്ട സർ,

മാനവികതയുടെയും ലോകസ്വാതന്ത്ര്യത്തിന്റെയും ജനാധിപത്യത്തിന്റെയും പേരിലും ഫാസിസത്തെയും നാസിസത്തെയും എതിർക്കാനായും ഇന്ത്യൻ അഴിയാക്കുരുക്ക്‌ പരിഹരിക്കാനായും ഗാന്ധിജിയെയും കോൺഗ്രസ്‌ നേതാക്കളെയും വിട്ടയക്കണമെന്ന്‌ താഴെ ഒപ്പുവച്ചിരിക്കുന്ന പാപ്പിനിശ്ശേരിയിലെ സ്‌ത്രീകളായ ഞങ്ങൾ അഭ്യർഥിക്കുന്നു.

ദേശീയപ്രതിസന്ധി അവസാനിപ്പിക്കാനും 400 ദശലക്ഷം ഇന്ത്യൻ ജനങ്ങളെ ഫാസിസത്തിനെതിരെ അണിനിരത്താനും ഗാന്ധിജിയുടെ മോചനം ആവശ്യമാണ്‌.

ക്വിറ്റ് ഇന്ത്യ സമരത്തെ തുടർന്ന് അറസ്റ്റിലായ ഗാന്ധിജിയെ പുണെയിലെ ആഗാഖാൻ പാലസിൽ തടവിലാക്കിയിരുന്നു. 1943 ഫെബ്രുവരി 9‐ന് അദ്ദേഹം നിരാഹാരം തുടങ്ങി. 21 ദിവസത്തെ നിരാഹാരം നടത്തുമെന്ന് ഗവർണർ ജനറലിന് കത്ത് നൽകിയിട്ടായിരുന്നു സമരം.

ഗാന്ധിജി

ഉപവാസം പത്താംദിവസം എത്തിയപ്പോൾ തന്നെ ഗാന്ധിജിയുടെ ആരോഗ്യം വളരെ മോശമായി. ബ്രിട്ടീഷ്‌ സർക്കാർ അദ്ദേഹത്തിന്റെ അന്ത്യം പ്രതീക്ഷിച്ചു. സംസ്‌കാരത്തിന് ചന്ദനമുട്ടികൾ ശേഖരിക്കാനും ശവഘോഷയാത്രയുടെ റൂട്ട് തീരുമാനിക്കാനും വരെ സർക്കാർ രഹസ്യനിർദേശം നൽകിയിരുന്നതായി ഗാന്ധിജിയുടെ സഹയാത്രിക മീരാ ബെൻ അവരുടെ ‘ദ സ്‌പിരിറ്റ്സ്‌ പിൽഗ്രിമേജ്’ എന്ന കൃതിയിൽ ( പേജ് 252 ) എഴുതുന്നു.

ഗാന്ധിജി അടക്കമുള്ള നേതാക്കളെ മോചിപ്പിക്കാൻ കമ്യൂണിസ്റ്റ്‌ പാർടിയുടെ അഭ്യർഥനയും വന്നു. ക്വിറ്റ്‌ ഇന്ത്യ സമരത്തിൽ വ്യത്യസ്‌ത നിലപാടുണ്ടായിരുന്നെങ്കിലും പാർടി ശക്തമായി രംഗത്തെത്തി. ഇന്ത്യൻ സ്വാതന്ത്ര്യം സംബന്ധിച്ച ചർച്ചകൾ അന്ന്‌ തടസ്സപ്പെട്ടു നിൽക്കുകയായിരുന്നു.

ഫെബ്രുവരി 10 മുതൽ 24 വരെ ചേർന്ന കേന്ദ്ര കമ്മിറ്റിയും പ്ലീനവും ഗാന്ധിജിയുടെ മോചനത്തിനായി ഒറ്റക്കെട്ടായി രംഗത്തിറങ്ങാൻ ( "All together Demand Gandhiji's release’ ) ആഹ്വാനം ചെയ്‌തു. രണ്ടാംലോകയുദ്ധം നടക്കുന്ന കാലമാണ്‌. ഫാസിസത്തിനെതിരായ ശക്തമായ യോജിപ്പിനും ഇന്ത്യയിൽ ഒരു ദേശീയ സർക്കാരിന്റെ സ്ഥാപനത്തിനുള്ള ചർച്ചകൾ തുടരാനും ഗാന്ധിജിയുടെ മോചനം മുന്നുപാധിയായി പാർടി കണ്ടു.

ഗാന്ധിജിയുടെ മോചനം ആവശ്യപ്പെട്ട്‌ പാപ്പിനിശ്ശേരിയിലെ സ്‌ത്രീകൾ അയച്ച കത്തിന്റെ ആമുഖം

കമ്യൂണിസ്റ്റ്‌ പാർടിയുടെ അഭ്യർഥന കേരളത്തിലും ചലനമുണ്ടാക്കി. അക്കാലത്തുതന്നെ കമ്യൂണിസ്റ്റ്‌ കേന്ദ്രമായിരുന്ന പാപ്പിനിശ്ശേരിയിൽനിന്ന് ഇത്രയേറെ സ്‌ത്രീകൾ ഒപ്പിട്ട ഒരു നിവേദനം വന്ന വഴിയും ആ ആഹ്വാനം തന്നെയാണെന്ന് വ്യക്തമാണ്. കത്തിന് ഒപ്പമുള്ള കുറിപ്പിൽ 'ഫാസിസ്റ്റ്‌ വിരുദ്ധ പോരാട്ടത്തിന്റെ ആവശ്യകത’ ഊന്നുന്നത്‌ ഈ കമ്യൂണിസ്റ്റ്‌ സ്വാധീനം കൊണ്ടാണ് എന്ന് കരുതാം.

അന്നത്തെ കേരളത്തിൽനിന്നുള്ള മറ്റ് പല സന്ദേശങ്ങളിലും ഈ ഇടതുചായ്‌വ്‌ കാണാം. എറണാകുളത്തുനിന്നുള്ള ഒരു ടെലിഗ്രാം അയച്ചയാളുടെ പേര്‌ ‘കോമ്രേഡ്‌ കാരിക്കാമുറി’ എന്നാണ്‌ ചേർത്തിരിക്കുന്നത്‌. ‘ഗാന്ധിജിയെ വിട്ടയക്കൂ. ഇന്ത്യൻ സ്റ്റാലിൻഗ്രാഡുകൾ സൃഷ്‌ടിക്കൂ’ എന്നാണ്‌ ഉള്ളടക്കം.

എറണാകുളത്തുനിന്ന്‌ ‘കോമ്രേഡ്‌ കാരിക്കാമുറി' എന്ന പേരിൽ അയച്ച ടെലിഗ്രാം

ആക്രമിച്ചു വന്ന ജർമൻ ഫാസിസ്റ്റ്‌ പട്ടാളത്തെ സോവിയറ്റ് ചെമ്പട സ്റ്റാലിൻഗ്രാഡിൽ തച്ചു തകർത്തിട്ട് അപ്പോൾ അധികദിവസം പിന്നിട്ടിട്ടുണ്ടായിരുന്നില്ല... സന്ദേശമയച്ച ‘സഖാവി’നെ അത്‌ ആവേശം കൊള്ളിച്ചിരിക്കുന്നു.

കേരളത്തിൽനിന്ന്‌ വേറെയും ധാരാളം ടെലിഗ്രാമുകൾ ഉണ്ട്‌.

കണ്ണൂർ ബീഡി തൊഴിലാളി യൂണിയൻ, തലശേരി യുവജനസംഘം, ആലുവ യുസി കോളേജിലെ വിവിധ ഹോസ്റ്റലുകളിലെയും എറണാകുളം തിയ്യ ഹോസ്റ്റലിലെയും അന്തേവാസികൾ, ഗേൾസ്‌ സ്‌കൂൾ വിദ്യാർഥികൾ എന്നിവരുടെ പേരുകൾ കാണാം.

ഒളപ്പമണ്ണ നമ്പൂതിരിപ്പാട്‌, പുറയന്നൂർ നമ്പൂതിരിപ്പാട്‌, പാലൂര്‌ മഹിളാസംഘം, മഹാരാജാസ്‌ കോളേജിലെ സീനിയർ ഇന്റർമീഡിയറ്റ്‌ വിദ്യാർഥിനി ദാക്ഷായണി വരെയുള്ളവർ അയച്ച സന്ദേശങ്ങൾ നാഷണൽ ആർക്കൈവ്‌സിൽ ഫയൽ ചെയ്‌തിട്ടുണ്ട്‌.

പാപ്പിനിശ്ശേരിയിലെ സ്‌ത്രീകൾ അയച്ച കത്തിന്റെ ഒരുഭാഗം

ഇവയ്‌ക്കെല്ലാം ഇടയിലും പത്ത്‌ പേജിൽ നീളുന്ന മലയാളത്തിലുള്ള പേരുകളും ഒപ്പുമായി പാപ്പിനിശ്ശേരിയിലെ പെണ്ണുങ്ങളുടെ സന്ദേശം വേറിട്ടുനിൽക്കുന്നു.

ദേശാഭിമാനി വാരികയിൽ നിന്ന്