വിഖ്യാത നടി പേൾ വൈറ്റ്‌ അഭിനയിച്ച ‘പേൾ ഓഫ്‌ ദ ആർമി’ (Pearl of the Army) എന്ന ചിത്രത്തിന്റെ അവസാന മൂന്ന്‌ എപ്പിസോഡുകൾ കാണാൻ തിയറ്ററിലേക്ക്‌ ക്ഷണിക്കുന്ന പരസ്യം ഇന്ത്യൻ പത്രങ്ങളിൽ വന്നത്‌ നൂറ്റിയെട്ട്‌ കൊല്ലം മുമ്പാണ്‌. ചെറുസീരീസുകൾ മുതൽ സീസണുകളായി പടരുന്ന മെഗാ സീരീസുകൾ വരെ ഇന്ന്‌ സ്‌ക്രീൻ നിറയുമ്പോൾ ഒരു നൂറ്റാണ്ടുമുമ്പ്‌ ലോകസിനിമയ്‌ക്ക്‌, സീരീസായിരുന്ന ഒരു ബാല്യമുണ്ട്‌ എന്ന്‌ ഈ പരസ്യം രേഖാമൂലം ഓർമിപ്പിക്കുന്നു. ഒരു സിനിമ കണ്ടുതീർക്കാൻ ഒന്നോ ഒന്നരയോ മാസത്തിന്റെ കാത്തിരിപ്പ്‌ വേണ്ടിവന്ന നാളുകൾ. സിനിമയുടെ പിറവിമുതൽ നാലു പതിറ്റാണ്ട് നീണ്ട ഈ സിനിമാസീരീസ്‌ കാലം ഇന്ത്യയിലെ തിയറ്ററുകളെയും സജീവമാക്കിയിരുന്നു.

ഈ കുറിപ്പിനൊപ്പമുള്ള പരസ്യങ്ങളിലൊന്ന്‌ 1917 സെപ്‌തംബറിൽ മുംബൈയിൽ ഇറങ്ങിയ ബോംബെ ക്രോണിക്കിൾ പത്രത്തിലേതാണ്. മുംബൈയിലെ ലാമിങ്‌ടൻ റോഡിലുള്ള ഇംപീരിയൽ തിയറ്ററാണ്‌ ‘പേൾ ഓഫ്‌ ദ ആർമി’യുടെ പരസ്യദാതാക്കൾ. അന്നുരാത്രി സിനിമാ സീരീസിലെ അവസാന മൂന്ന് ഭാഗങ്ങൾ കാണിക്കുന്നുവെന്നാണ്‌ അറിയിപ്പ്‌. വേറെ തിയറ്ററുകളുടെ പരസ്യങ്ങളാണ്‌ മറ്റുള്ളവ. മുംബൈ ഏഷ്യാറ്റിക്‌ സൊസൈറ്റിയുടെ ആർക്കൈവ്‌ ശേഖരത്തിൽ ഈ പത്രങ്ങളുണ്ട്‌.

1917 സെപ്‌തംബർ 26ന്‌ വന്ന ‘പേൾ ഓഫ്‌ ദ ആർമി’ ഫിലിം സീരീസിന്റെ പരസ്യം ‘നടിയുടെ വിടവാങ്ങൽ ചിത്രം’ എന്ന പ്രത്യേകതയും ‘പേൾ ഓഫ്‌ ദ ആർമി’യുടെ പരസ്യത്തിലുണ്ട്‌. ‘ഗംഭീരമായ വമ്പൻ രംഗങ്ങൾ ഉൾപ്പെടുത്തിയിരിക്കുന്നു. കടലിനടിയിലെ മൈൻ സ്‌ഫോടനം, പാലങ്ങൾ തകർക്കുന്ന രംഗങ്ങൾ, ‘സൈലന്റ്‌ മെനസ്‌’ (Silent Menace) ആരാണ് എന്ന ഞെട്ടിക്കുന്ന വെളിപ്പെടുത്തൽ’ എന്നിവയാണ്‌ ആകർഷക ഘടകങ്ങളായി വിവരിക്കുന്നത്‌.

ഈ ചിത്രം 15 എപ്പിസോഡുകളായിരുന്നു. സീനുകളുടെ ഇടയിൽ ഇംഗ്ലീഷ് ടൈറ്റിൽ കാർഡുകൾ (Inter titles) കാട്ടി കഥയ്‌ക്ക്‌ തുടർച്ച ഉണ്ടാക്കുന്ന രീതിയിലായിരുന്നു നിർമാണം.

ഒരു ദിവസം മൂന്ന് എപ്പിസോഡുകൾ ഒന്നിച്ച് കാണാം. അടുത്ത മൂന്നെണ്ണം അടുത്ത ആഴ്‌ച അതേ ദിവസം. ഇന്ത്യയിൽ മുഖ്യമായും മുംബൈയിലെ തിയറ്ററുകളിലായിരുന്നു സീരീസുകൾ പ്രദർശിപ്പിച്ചിരുന്നത്‌. ഇന്ത്യയിൽ സിനിമാനിർമാണത്തിന്‌ 1913‐ൽ ‘രാജാ ഹരിശ്‌ചന്ദ്ര’യോടെ തുടക്കമായെങ്കിലും സീരീസുകൾ ഉണ്ടായില്ല.

പേൾ വൈറ്റ്‌

പനാമാ കനാലിന്റെ രഹസ്യ സൈനിക വിവരങ്ങൾ ചോർത്തുന്ന ‘സൈലന്റ്‌ മെനസ്‌’(രഹസ്യ ശല്യക്കാരൻ) എന്ന പട്ടാളച്ചാരനെപ്പറ്റിയുള്ള അന്വേഷണമാണ് ‘പേൾ ഓഫ്‌ ദ ആർമി’യുടെ കഥാതന്തു. പേൾ വൈറ്റാണ്‌ നായിക. ‘സീരീസുകളിലെ രാജ്ഞി’ എന്നറിയപ്പെട്ടിരുന്ന അവർ നിശ്ശബ്‌ദ സിനിമകളിൽനിന്നാണ്‌ സീരീസിലെത്തിയത്‌. പരസ്യത്തിൽ അവരുടെ അവസാന ചിത്രം എന്ന് പറഞ്ഞിരുന്നുവെങ്കിലും, ഏഴ് വർഷം കഴിഞ്ഞ്, 1931-‐ൽ ‘Peril of Paris’ എന്ന സിനിമയിലാണ് അവർ ഒടുവിൽ അഭിനയിച്ചത്.

അമേരിക്കൻ സിനിമയിൽ 1912 മുതൽ 1956 വരെയുണ്ടായിരുന്ന സീരീസ്‌ സിനിമകൾ 1914‐ലാണ് ഏറ്റവും ജനപ്രിയത നേടിയതെന്ന് പഠന (Film Serials and the American Cinema, 1910‐-1940) ങ്ങളിൽ കാണാം. ഇന്ത്യയിലും ഈ കാലത്ത്‌ മുംബൈയിലെ തിയറ്ററുകളിൽ ഈ ചിത്രങ്ങൾ പ്രദർശനത്തിനെത്തുകയായിരുന്നു. സിനിമയ്‌ക്ക്‌ ശബ്ദം കിട്ടിയപ്പോഴും സീരീസുകൾ ഉണ്ടായി.

1921ൽ വന്ന മറ്റൊരു ഫിലിം സീരീസ്‌ പരസ്യം ആദ്യകാലത്ത്‌ മിക്ക സീരീസുകളും സമാനമായ കഥക്കുറ്റികളിൽ തിരിഞ്ഞു. സാഹസികയായ നായിക, അപകടത്തിൽനിന്ന്‌ രക്ഷിക്കാനെത്തുന്ന ഭാവിഭർത്താവ്. നായികയുടെ അച്ഛന്റെ; മിക്കപ്പോഴും വളർത്തച്ഛന്റെ, മരണം ഒക്കെ സ്ഥിരം ചേരുവ. പിന്നീട്‌ കുറ്റാന്വേഷകരും പൊലീസുകാരുമൊക്കെ സ്‌ക്രീനിൽ വന്നു. പേൾ വൈറ്റിനെ കൂടാതെ റൂത്ത്‌ റോളണ്ടിനെപ്പോലെ വേറെയും നായികമാർ ജ്വലിച്ചുയർന്നു.

ശബ്ദസിനിമയുടെ തുടക്കത്തിലെ സീരീസുകൾ പലതും പത്ര കോമിക്കുകൾ അടിസ്ഥാനമാക്കി ആയിരുന്നു. ബാറ്റ്‌മാനും സൂപ്പർമാനുമൊക്കെ നായകരായി. ആദ്യഘട്ടത്തിൽ ഇരുപത്‌ ഭാഗംവരെ നീണ്ട സീരീസുകൾ പിന്നീട്‌ പതിനഞ്ചും പന്ത്രണ്ടുമായി കുറഞ്ഞു. ഓരോ ഭാഗവും ആകാംക്ഷയുടെ മുൾമുന (Cliff Hanger)യിലാണ്‌ നിർത്തുക. അടുത്തയാഴ്‌ച അടുത്ത ഭാഗത്തിനായി കാണികൾ തിയറ്ററിലെത്തും എന്നിത്‌ ഉറപ്പാക്കി.

എഡിസൺ സ്‌റ്റുഡിയോസ്‌ നിർമിച്ച്‌ 1912-‐ൽ ഇറങ്ങിയ ‘What Happened to Mary’ ആണ് ആദ്യ സിനിമാസീരിയൽ. അമേരിക്ക, ജർമനി, ജപ്പാൻ, യുകെ തുടങ്ങിയ രാജ്യങ്ങളിൽ നിന്നെല്ലാം പല ഭാഗങ്ങളായി നീളുന്ന സീരിയലുകൾ ഇന്ത്യയിലും പ്രദർശനത്തിനെത്തിയിരുന്നു. കൂടുതലും അമേരിക്കയിൽ നിന്നായിരുന്നു. 1956-‐ൽ ടെലിവിഷൻ പ്രാമുഖ്യം നേടിയതോടെയാണ് അവ മറഞ്ഞത്. ഏറ്റവും ഒടുവിൽ ഒരു സീരിയൽ തിയറ്ററിലെത്തിയത്‌ 1957‐ലാണ്‌. ജാപ്പനീസ്‌ ചിത്രമായ സൂപ്പർ ജയന്റായിരുന്നു അത്‌ .