മലപ്പുറം വിരുദ്ധതയെ അന്നേ കുഴിച്ചുമൂടി, ആ നാട്‌
ശ്രീകുമാർ ശേഖർ
Published on Jun 06, 2025, 10:19 PM | 2 min read
56 വർഷംമുമ്പ്‌ 1969ൽ. അന്നും ജൂൺ. മലപ്പുറം നിയമസഭാ മണ്ഡലത്തിൽ ഉപതെരഞ്ഞെടുപ്പ്‌ നടക്കുന്നു. മലപ്പുറം ജില്ലയാകുന്നതിന്‌ അഞ്ചുനാൾമുമ്പ്‌ ജൂൺ പത്തിനായിരുന്നു വോട്ടെടുപ്പ്‌. സ്വാഭാവികമായും ജില്ലാരൂപീകരണംതന്നെ മുഖ്യവിഷയമായി. ഇ എം എസ്‌ സർക്കാരാണ്‌ ഭരണത്തിൽ. തിരുവനന്തപുരം ജില്ലയിലെ ആറ്റിങ്ങലിലും ഉപതെരഞ്ഞെടുപ്പ്‌.
ഐക്യമുന്നണിയിൽ മുസ്ലിംലീഗുമുണ്ട്‌. മന്ത്രിയായിരുന്ന എം പി എം അഹമ്മദ് കുരിക്കൾ അന്തരിച്ച ഒഴിവ്‌. മുന്നണി സ്ഥാനാർഥിയായി ചാക്കീരി അഹമ്മദുകുട്ടി മത്സരിക്കുന്നു. സിപിഐ എമ്മും സിപിഐയും അടക്കമുള്ള മുന്നണി കക്ഷികൾ പിന്തുണയ്‌ക്കുന്നു. മറുവശത്ത്‌ കോൺഗ്രസും ജനസംഘവും. പ്രത്യേകം സ്ഥാനാർഥികൾ ഉണ്ടായിരുന്നെങ്കിലും ഇരുകൂട്ടരും ജില്ലാ രൂപീകരണത്തിനെതിര്‌. തെരഞ്ഞെടുപ്പിലെ പ്രധാന പ്രശ്‌നമായും അതുമാറി. ജനസംഘവും കോൺഗ്രസ്‌‐ സർവോദയ നേതാവ്‌ കെ കേളപ്പനും ചേർന്നുള്ള സമരസമിതി. മറ്റു ജില്ലകളിലും സമരവും കല്ലേറും. കോൺഗ്രസ്‌ നേതാക്കൾ ജില്ലയ്‌ക്കെതിരെ ഒളിഞ്ഞും തെളിഞ്ഞും പ്രവർത്തിച്ചു. കെപിസിസി ജില്ലയെ നേരിട്ടെതിർക്കാതെ ജില്ല വരുന്നതിൽ ഉൽക്കണ്ഠ പ്രകടിപ്പിച്ച്‌ പ്രസ്‌താവന ഇറക്കുന്നു.
പ്രാദേശിക നേതാക്കളാകട്ടെ ജില്ലയ്‌ക്കെതിരെ ജാഥ നയിക്കുന്നു. കോഴിക്കോട്‌ കോർപറേഷനിൽ ജില്ലാരൂപീകരണത്തിനെതിരെ കോൺഗ്രസ്‌ നേതാവ്‌ പത്മനാഭൻ അടിയോടി പ്രമേയം കൊണ്ടുവരുന്നു. ഇ എം എസും എ കെ ജിയും ജില്ലാ രൂപീകരണത്തിന്റെ ആവശ്യം വിശദീകരിച്ച്‌ പ്രസംഗിക്കുന്നു; ലേഖനം എഴുതുന്നു. ഒടുവിൽ ഫലം വന്നപ്പോൾ സിപിഐ എം, സിപിഐ പിന്തുണയോടെ മത്സരിച്ച ലീഗിലെ ചാക്കീരി അഹമ്മദുകുട്ടി 23,413 വോട്ടിന്‌ ജയിച്ചു. കോൺഗ്രസ്‌ തോറ്റു. മുഴുവൻ ഹിന്ദുക്കളും ജില്ലയ്‌ക്കെതിരെ വോട്ട്‌ ചെയ്യുമെന്ന്‌ പ്രഖ്യാപിച്ച ജനസംഘത്തിന്‌ കെട്ടിവച്ച കാശുപോയി. കിട്ടിയത്‌ 5776 വോട്ട്‌ മാത്രം. മണ്ഡലത്തിലെ ഹിന്ദുക്കളുടെ നാലിലൊന്നുപോലും വരില്ല ഇത്‌. ആറ്റിങ്ങലിലും ഐക്യമുന്നണി വിജയിച്ചു. സിപിഐ എമ്മിലെ കാട്ടായിക്കോണം വി ശ്രീധർ ആയിരുന്നു വിജയി.
ജില്ലയ്‌ക്കെതിരായ രാഷ്‌ട്രീയത്തെ ജില്ല പിറവിയെടുക്കുന്നതിന്‌ ദിവസങ്ങൾക്കുമുമ്പ്‌ ആ മണ്ണിൽത്തന്നെ കുഴിച്ചുമൂടുന്ന ജനവിധിയായിരുന്നു മലപ്പുറം നിയമസഭാ മണ്ഡലത്തിലേത്. ജില്ലയ്‌ക്കെതിരെ വർഗീയ രാഷ്‌ട്രീയം കളിച്ചവർ നിലംപറ്റി.
ഇപ്പോൾ നടക്കുന്ന നിലമ്പൂർ ഉപതെരഞ്ഞെടുപ്പിൽ അന്ന്‌ ജില്ലയ്‌ക്കുവേണ്ടി നിലകൊണ്ട സിപിഐ എമ്മും സിപിഐയും ഇന്നും ഒരു ഭാഗത്തുണ്ട്‌. പക്ഷേ, ലീഗ്‌ ജില്ലാവിരുദ്ധരായിരുന്ന കോൺഗ്രസിനൊപ്പം മറുഭാഗത്താണ്‌. വോട്ടെടുപ്പ്‌ വേളയിൽ എവിടെ നിൽക്കണമെന്ന്‌ അവരുടെ വോട്ടർമാർ തീരുമാനിക്കട്ടെ!
