വർഗീയതയും ശാസ്ത്രബോധവും കൃത്യമായി രണ്ടു ധ്രുവങ്ങളിൽ സ്ഥിതി ചെയ്യുകയും ശാസ്ത്രബോധം നഷ്ടപ്പെടുന്ന യുവതലമുറയെ എളുപ്പത്തിൽ വർഗീയതയിലേക്ക് ആനയിക്കുന്ന രാഷ്ട്രീയം രാജ്യത്ത്‌ ശക്തിപ്രാപിക്കുകയുമാണ്. കപടശാസ്ത്രവും യുക്തിരാഹിത്യവും പൊതുസമൂഹത്തിൽ ആഴത്തിൽ പടർത്തി വർഗീയവൽക്കരണം എളുപ്പത്തിൽ സാധ്യമാക്കാനാണ് സമൂഹത്തിലെ ഒരുവിഭാഗം ശ്രമിക്കുന്നത്.

​ഈ അവസരത്തിലാണ്, ശാസ്ത്രമൂല്യങ്ങളും ശാസ്ത്രബോധവും അടിസ്ഥാനമാക്കിയ ഒരു തലമുറ ഇവിടെ ഉയർന്നുവരേണ്ടതിന്റെ ആവശ്യകത. മതനിരപേക്ഷ ജനാധിപത്യമൂല്യങ്ങൾ സംരക്ഷിക്കണമെങ്കിൽ അത്തരം വലിയ നീക്കം ഉയർന്നുവരേണ്ടതുണ്ട്. സാക്ഷരതയിലും വിദ്യാഭ്യാസത്തിലും മുൻപന്തിയിൽ നിൽക്കുന്ന കേരളത്തെ സംബന്ധിച്ച് സമൂഹത്തെ ശാസ്ത്രബോധത്തിലൂന്നി സംരക്ഷിക്കേണ്ട ഉത്തരവാദിത്വം ഏറെയാണ്. കേരള സയൻസ് ഫോറം എന്ന കൂട്ടായ്‌മ പ്രാധാന്യം അർഹിക്കുന്നത്, ശാസ്ത്രത്തെ സമൂഹത്തിന് പരിചയപ്പെടുത്തുന്നു എന്നതുകൊണ്ടുമാത്രമല്ല, സമൂഹത്തിന്റെയും യുവതലമുറയുടെയും ശാസ്ത്രബോധത്തെ പരിപോഷിപ്പിച്ച്‌ നവകേരളം കെട്ടിപ്പടുക്കുക എന്ന മഹത്തരമായ ലക്ഷ്യത്തിൽ അധിഷ്ഠിതമായതുകൊണ്ടുകൂടിയാണ്.

‘കേരള സയൻസ് ഫോറം’ കേരളത്തിലെ ശാസ്ത്രപ്രചാരകർക്കും അധ്യാപകർക്കും സയൻസിനെ ഉൾക്കൊള്ളാൻ കഴിയുന്ന ഏതൊരാൾക്കും പ്രവർത്തിക്കാൻ കഴിയുന്ന ഒരു പ്ലാറ്റ്‌ഫോമാണ്. സംസ്ഥാനതലത്തിലുള്ള സമ്മേളത്തിനുശേഷം ജില്ലകൾ തിരിച്ചുള്ള ശിൽപ്പശാലകൾ നടന്നുകൊണ്ടിരിക്കുകയാണ്. ഓരോ ശിൽപ്പശാലയിലും യുവാക്കളുടെയും ശാസ്ത്രകുതുകികളുടെയും വലിയ പങ്കാളിത്തമാണ് ഉണ്ടായിക്കൊണ്ടിരിക്കുന്നത്.

പ്രധാനമായും സമൂഹത്തിൽ ആഴത്തിൽ വേരൂന്നിയ കപടശാസ്ത്രത്തെയും അന്ധവിശ്വാസത്തെയും ചെറുക്കുക എന്നതാണ് ഫോറത്തിന്റെ ലക്ഷ്യം. ഗോമൂത്രത്തിന്റെ ആന്റിബാക്ടീരിയൽ പ്രത്യേകതകളും ആദ്യം പ്ലാസ്റ്റിക് സർജറി നടത്തിയത് ഗണപതിയാണെന്നും റൈറ്റ് സഹോദരന്മാർ അല്ല വിമാനം കണ്ടുപിടിച്ചത് അതിനുമുമ്പുതന്നെ പുഷ്പകവിമാനങ്ങൾ ഉണ്ടായിരുന്നെന്നും ഒക്കെയുള്ള ശാസ്ത്രീയാടിത്തറ ഇല്ലാത്ത പ്രചാരണങ്ങൾ നടത്തുന്നത് അറിവില്ലാത്തവരല്ല. പകരം വിദ്യാസമ്പന്നരും സമൂഹത്തെ ആഴത്തിൽ സ്വാധീനിക്കാൻ കഴിയാവുന്നവരുമാണെന്നത് വിഷയത്തിന്റെ ഗൗരവം വർധിപ്പിക്കുന്നു. സ്വാതന്ത്ര്യം ലഭിച്ചതിനുശേഷം ഇന്ത്യയിൽ ഉണ്ടായിരിക്കുന്ന വികസനങ്ങൾ ഏതാണ്ട് പൂർണമായും ശാസ്ത്രസാങ്കേതിക ഗവേഷണങ്ങളിൽ ഊന്നിയാണ് നടന്നിരിക്കുന്നത്. എന്നാൽ, പിന്നീടെപ്പോഴോ സമൂഹത്തിൽ വേരൂന്നിയ വർഗീയതയും കപടശാസ്ത്രവും വികസനത്തെ പിന്നോട്ടടിപ്പിച്ചു. ലോകരാജ്യങ്ങൾ ബഹുദൂരം മുന്നോട്ട്‌ കുതിക്കുമ്പോൾ, നമുക്ക് ഇത്തരം അശാസ്ത്രീയ ജൽപ്പനങ്ങൾ കേട്ടുകൊണ്ട് നിശ്ശബ്ദരായിരിക്കാൻ കഴിയില്ല. അതിന്റെ ഭാഗമായാണ് ഇപ്പോൾ ഇങ്ങനെയൊരു ബഹുജനകൂട്ടായ്‌മ ഉയർന്നുവന്നിരിക്കുന്നത്. പ്രകൃതിയുടെ തനതായ യുക്തിയെ ഇല്ലാതാക്കിക്കൊണ്ടും വരേണ്യയുക്തിയെ സമൂഹത്തിൽ പടർത്തിക്കൊണ്ടും ശാസ്ത്രബോധത്തെ ഇല്ലാതാക്കാനുള്ള ശ്രമമാണ് നടക്കുന്നത്. പാഠ്യപദ്ധതിയിൽനിന്ന്‌ ഡാർവിന്റെ പരിണാമസിദ്ധാന്തവും പീരിയോഡിക് ടേബിളും എടുത്തുമാറ്റിയതുമൊക്കെ ഇതിന്റെ ഭാഗമായി വേണം കാണാൻ.

മറ്റ്‌ സംസ്ഥാനങ്ങളിൽ സാമ്പ്രദായികവിദ്യാഭ്യാസം നടപ്പാക്കുമ്പോൾ കേരളത്തിൽ പുരോഗമനവിദ്യാഭ്യാസത്തിനാണ് ഊന്നൽ കൊടുക്കുന്നത്. അതിലൂടെമാത്രമേ വിമർശനാത്മക ബോധനശാസ്ത്രം (Critical Thinking) സമൂഹത്തിന്‌ പ്രാപ്യമാകുകയുള്ളൂ. ഇത്തരത്തിൽ വിദ്യാഭ്യാസത്തിന്റെ രീതിശാസ്ത്രത്തിൽത്തന്നെ മാറ്റങ്ങൾ വേണം. ആശയവാദവും ഭൗതികവാദവും വിട്ട്‌ വൈരുധ്യാത്മക ഭൗതികവാദത്തിൽ (Dialectical Materialism) ഊന്നിയ പഠനസമ്പ്രദായം നിലവിൽ വരേണ്ടതുണ്ട്. ഫാസിസത്തെ സംബന്ധിച്ച് സമ്പത്തിനെ ഭയമില്ല. എന്നാൽ, ജ്ഞാനത്തെ ഭയമുണ്ടുതാനും. അങ്ങനെ വരുമ്പോൾ ഫാസിസത്തെ ചെറുക്കാൻ ജ്ഞാനംമാത്രമാണ് നമുക്ക് കൈമുതൽ. ഈ ജ്ഞാനം ശാസ്ത്രബോധത്തിൽ അധിഷ്ഠിതമാകുകയും അവയെ പൊതുജനങ്ങൾക്കുമുന്നിൽ അവതരിപ്പിക്കുകയും ചെയ്യുമ്പോഴാണ് നമ്മുടെ ദൗത്യം പൂർണമാകുന്നത്. ആ ഉത്തരവാദിത്വമാണ് കേരള സയൻസ് ഫോറം ഏറ്റെടുക്കുന്നത്.

സ്‌കൂളുകളിലും കലാലയങ്ങളിലും തൊഴിൽനൈപുണിയിൽ അധിഷ്ഠിതമായ വിദ്യാഭ്യാസവും പരിശീലനവും പരമാവധി ഊർജിതമാക്കി കുട്ടികൾ പഠിക്കുന്ന അറിവുകൾ വ്യവസായമേഖലയ്‌ക്കുകൂടി പ്രയോജനകരമായ രീതിയിലാക്കുകയും അതുവഴി തൊഴിലവസരങ്ങൾ സൃഷ്ടിക്കുക എന്നതുകൂടി സയൻസ് ഫോറം ഏറ്റെടുക്കുന്ന ഉത്തരവാദിത്വമാണ്. കുട്ടികളുടെ അറിവുനേടലുകൾ പാഠങ്ങളിൽമാത്രം പരിമിതപ്പെടുത്താതെ മെച്ചപ്പെട്ടതും അവർക്ക് ഇണങ്ങുന്നതുമായ തൊഴിൽമേഖലകൾ കരസ്ഥമാക്കാൻ ഉതകുന്നതരത്തിൽ ഉയർത്തിക്കൊണ്ടുവരികയും ചെയ്യുക എന്നത് പ്രധാനമാണ്. അവിടെയും കുട്ടികളിൽ ശാസ്ത്രബോധം ഉണ്ടാക്കിയെടുക്കേണ്ടതുണ്ട്. യുക്തിഭദ്രമായി ചിന്തിക്കാൻ അവരെ പ്രാപ്തമാക്കുക എന്നതാണ് ആദ്യപടി. അതിനുള്ള ഇടപെടലുകൾ സയൻസ് ഫോറം തുടങ്ങി.

വർത്തമാനകാല രാഷ്ട്രീയത്തിൽ ശാസ്ത്രീയമായ സമീപനത്തോടെ ഇടപെടുകയും നവകേരളത്തെ കൂടുതൽ വിജ്ഞാനവികസന സംസ്ഥാനമായി രൂപപ്പെടുത്തുകയും വേണം. വർഗീയതയെ പടിക്കുപുറത്ത്‌ നിർത്തി മതനിരപേക്ഷവും ശാസ്ത്രബോധവുമുള്ള ഒരു ജനതയെ സൃഷ്ടിക്കുകവഴി സംസ്ഥാനത്തിന്റെയും രാജ്യത്തിന്റെയും വികസനത്തിൽ പങ്കാളിയാവുക എന്ന ദൗത്യമാണ് ഇവിടെ ഏറ്റെടുത്തിരിക്കുന്നത്.നാളെയുടെ വാഗ്‌ദാനങ്ങളായ കുട്ടികളിൽനിന്ന്‌ തുടങ്ങാനാണ് ഫോറം ലക്ഷ്യമിടുന്നത്. സ്‌കൂളുകളിലും കലാലയങ്ങളിലും കുട്ടികൾക്ക് ശാസ്ത്രബോധത്തെ പരിചയപ്പെടുത്തുകയും സമൂഹത്തിലെ സാധാരണക്കാരിലേക്ക് ഇറങ്ങിച്ചെല്ലുകയും ചെയ്യും. കപടശാസ്ത്രത്തെ ചെറുത്ത്‌ വിജ്ഞാനകേരളം കെട്ടിപ്പടുക്കാൻ ജനങ്ങളെ അണിനിരത്തി, അവരെ നയിക്കാനായി അധ്യാപകരെയും ശാസ്‌ത്രപ്രചാരകരെയും ഒരുക്കുകയും ചെയ്യുന്ന വലിയ ലക്ഷ്യത്തിലേക്ക് ഓരോരുത്തരും ഭാഗഭാക്കാകേണ്ടത് കാലത്തിന്റെ ആവശ്യംതന്നെയാണ്.

(കൊച്ചി സർവകലാശാല, സെന്റർ ഫോർ സയൻസ് ഇൻ സൊസൈറ്റിയിൽ അസിസ്റ്റന്റ് പ്രൊഫസറാണ് ലേഖകൻ)