ആപ്പിൾ റുമാനിയ രുചിയേറും മാമ്പഴം

കേരളത്തിലെ മണ്ണിനും കാലാവസ്ഥയ്‌ക്കും യോജിച്ച കുഞ്ഞൻ മാവിനമാണ് ആപ്പിൾ റുമാനിയ.  കെനിയൻ തീരപ്രദേശമായ മലിന്ദിയോ  സിങ്കപ്പൂരോ ആണ്‌ ജന്മദേശം.  ഇന്ത്യയിൽ വടക്കൻ ആന്ധ്രയിൽ വ്യാപകമായി ഇവ കൃഷിചെയ്യുന്നു. ഇപ്പോൾ കേരളം, തമിഴ്‌നാട്,  കർണാടകം തുടങ്ങിയ  സംസ്ഥാനങ്ങളിലും. ആകൃതിയിൽ ആപ്പിൾപോലെ ആയതിനാലാണ് ആപ്പിൾ റുമാനിയയെന്ന പേര് വന്നത്‌. ഐസ്ക്രീം മാമ്പഴമെന്നും പേരുണ്ട്.
കൃഷിരീതി സാധാരണ മാവിനങ്ങളുടേതുപോലെ തന്നെ. രോഗങ്ങളും കീടങ്ങളും പൊതുവെ കുറവാണ്. ഡിസംബർ മുതൽ മാർച്ചുവരെയാണ് വിളവെടുപ്പുകാലം.  കാലാവസ്ഥയിലുണ്ടാകുന്ന മാറ്റം വിളവെടുപ്പുകാലത്തെയും ബാധിക്കാറുണ്ട്‌.

ഇടത്തരം വലിപ്പമുള്ള മാമ്പഴത്തിന് 250 ഗ്രാം മുതൽ 580 ഗ്രാംവരെ തൂക്കംവരും. പാകമാകുമ്പോൾ ചുവപ്പ് കലർന്ന ഓറഞ്ച്  നിറമായിരിക്കും. അകത്തെ മാംസളമായ ഭാഗത്തിന് മഞ്ഞ നിറമാണ്.  മധുരം അൽപ്പം കുറവാണെങ്കിലും വിറ്റാമിൻ എയുടെ കലവറയാണ്‌.