മണ്ണും ജലവും മലീമസമാവുന്നു: കൃഷിയും ഭക്ഷ്യസുരക്ഷയും തകർച്ചയിലേക്കെന്ന് ഐ സി എ ആർ റിപ്പോർട്ട്

ന്യൂഡൽഹി: ഇന്ത്യയുടെ കാർഷിക മേഖലയിലെ ഭാവി സൂചകങ്ങൾ അപകടത്തിലെന്ന് ദേശീയ കാർഷിക വികസന ഗവേഷണ ഇൻസ്റ്റിറ്റ്യൂട്ട് റിപ്പോർട്ട്. മണ്ണിന്റെയും വെള്ളത്തിന്റെയും കൃഷിക്ക് അനുകൂലമായ ഗുണഘടകങ്ങൾ ആശങ്ക ഉയർത്തും വിധം താഴ്ന്നിരിക്കുന്നതായി പഠനം വ്യക്തമാക്കുന്നു.

കേരളം മിസോറാം മധ്യപ്രദേശ് സംസ്ഥാനങ്ങളാണ് ഇക്കാര്യത്തിൽ ജാഗ്രത പുലർത്തി മാറി നിൽകുന്നത്. ഇതര സംസ്ഥാനങ്ങളിൽ ഭാവിയിലെ ഭക്ഷ്യോത്പാദനത്തെ തന്നെ ഈ പ്രതികൂല ഘടകങ്ങൾ പ്രതിസന്ധിയിലേക്ക് നയിക്കുമെന്ന് റിപ്പോർട്ട് വ്യക്തമാക്കുന്നു.

ഗ്രാമീണ മേഖലകളിലെ ഭക്ഷ്യ സുരക്ഷയെയാവും ഇത് ആദ്യം തളർത്തുകയെന്നും നാഷണൽ ഇൻസ്റ്റിറ്റ്യൂട്ട് ഓഫ് അഗ്രികൾച്ചറൽ ഇക്കണോമിക്സ് ആന്റ് പോളിസി റിസർച്ച് (NIAP) റിപ്പോർട്ട് വ്യക്തമാക്കുന്നു. ഇന്ത്യൻ കൌൺസിൽ ഓഫ് അഗ്രികൾച്ചറൽ റിസർച്ചിന് കീഴിലുള്ള ഗവേഷണ സ്ഥാപനമാണിത്.

ഓരോ ദേശങ്ങളിലെയും കാർഷിക സുസ്ഥിരതയെ കുറിച്ചുള്ള ഈ പഠനത്തിൽ മണ്ണിന്റെ ആരോഗ്യം, ജലസ്രോതസ്, പരിസ്ഥിതി, സാമൂഹിക സാമ്പത്തിക ഘടകങ്ങൾ എന്നിവയാണ് പരിഗണിച്ചത്. ഇവയെ 51 മാനകങ്ങൾ ഉപയോഗിച്ചാണ് പഠന വിധേയമാക്കിയത്.

കാർഷിക സുസ്ഥിരതയിൽ ദേശീയ ശരാശരി നിലവാരം 0.49 എന്നാണ് കണ്ടെത്തിയിട്ടുള്ളത്. കേരളം, മിസോറാം, മണിപ്പൂർ, പശ്ചിമ ബംഗാൾ, മധ്യപ്രദേശ്, ആന്ധ്രപ്രദേശ്, ഉത്തരാഖണ്ഡ് സംസ്ഥാനങ്ങൾ ഇതിനെക്കാൾ ഉയർന്നു നിൽക്കുന്നു. രാജസ്ഥാൻ, ഉത്തർ പ്രദേശ്, സംസ്ഥാനങ്ങൾ ദേശീയ ശരാശരിയിലും താഴെ ഏറ്റവും ആശങ്കാകരമായ നിലവാരത്തിലാണ്. പഞ്ചാബ്, ഹരിയാന, രാജസ്ഥാൻ എന്നീ സംസ്ഥാനങ്ങൾ ഭൂഗർഭ ജലത്തിൽ 61 മുതൽ 72 ശതമാനം വരെ അധികമായി ചൂഷണം ചെയ്തിരിക്കുന്നു.

കൃഷിക്ക് ആവശ്യമായ ജലസ്രോതസുകളിൽ അമ്ലാംശം വർധിക്കുകയാണ്. മണ്ണിന്റെ ജൈവഘടന തകർച്ചയിലുമാണ്. ഇവ വീണ്ടെടുക്കക സാധ്യവുമല്ല. അമിതമായ രാസവസ്തുക്കളുടെ ഉപയോഗം ജൈവകാർബണിന്റെ അഭാവത്തിനും സൂക്ഷ്മ പോഷണങ്ങളുടെ നാശത്തിനും കാരണമായിരിക്കുന്നു.  

സുസ്ഥിര കാർഷിക വികസനം ലക്ഷ്യമാക്കി പ്രവർത്തനങ്ങൾ ആസൂത്രണം ചെയ്യുന്നതിൽ മുന്നിട്ട് നിൽക്കുന്ന കേരളം, മിസോറാം, മധ്യപ്രദേശ് സംസ്ഥാനങ്ങളെ റിപ്പോർട്ട് എടുത്തു പറയുന്നു.