ഗ്രോബാഗ് നിറയ്ക്കുന്നതിനും മുമ്പേ ഇക്കാര്യങ്ങൾ അറിഞ്ഞിരിക്കാം

ചൂട് കൂടുമ്പോൾ കൃഷി ഗ്രോബാഗിലേക്ക് മാറ്റുന്നതാണ് വീട്ടുമുറ്റ കൃഷിയിലെ തന്ത്രം. എന്നാൽ ഇങ്ങനെ കൃഷി ചെയ്യുമ്പോൾ ശ്രദ്ധിക്കേണ്ട കാര്യങ്ങൾ വിട്ടുപോകരുത്. ആദായകരവും അധ്വാനം കുറഞ്ഞതുമാണ് ഗ്രോബാഗിലെ കൃഷി.

ലഭ്യമായവയിൽ മികച്ച ബാഗുകൾ തന്നെ തെരഞ്ഞെടുക്കുക പ്രധാനമാണ്. നല്ല സൂര്യപ്രകാശമുള്ള സ്ഥലം വേണം കണ്ടെത്താൻ. വിളകൾ നശിപ്പിക്കുന്ന ജീവികളുടെ ശല്യം നഗരങ്ങളിൽ പോലും വ്യപകമാണ്. സുരക്ഷിതമായ സ്ഥലം തന്നെയാവണം.

പരമപ്രധാനമായത് ഗ്രോ ബാഗിൽ നടീൽ മിശ്രിതം നിറയ്ക്കുമ്പോൾ ചെലുത്തുന്ന ശ്രദ്ധയാണ്. കുറച്ചു ഉണങ്ങിയ കരിയില കൂടി ചേര്‍ത്ത് നിറയ്ക്കുക. ചിതലും കീടങ്ങളും ബാധിച്ച ഇലകൾ വേണ്ട. കരിയില പതുക്കെ പൊടിഞ്ഞു മണ്ണോടു ചേര്‍ന്ന് സാവധാനം ചെടിക്ക് പോഷണമാവും.

കൂടാതെ ഉണങ്ങിയ ചാണകപ്പൊടി അല്ലെങ്കിൽ ഉണങ്ങിയ ആട്ടിന്‍ കഷ്ട്ടം , എല്ലുപൊടി , വേപ്പിന്‍ പിണ്ണാക്ക് ഇവ കൂടി ചേര്‍ക്കാം. ചാണകം ചേർക്കുമ്പോൾ നനവ് തീരെയില്ലാത്തതാവരുത്. പൂർണ്ണമായും ഉണങ്ങി വരണ്ട ചാണകത്തിൽ പോഷകാംശങ്ങൾ കുറയും. ബാഗിൽ ആദ്യം വെള്ളം വാർന്നു പോകാൻ സഹായിക്കുന്ന ഓടിന്റെയോ മൺപാത്രങ്ങളുടെയോ ചെങ്കല്ലിന്റെയോ ചെറുകഷണങ്ങൾ ഇടാം.

കൃഷി തുടങ്ങി ആദ്യ ഒന്ന്-രണ്ടാഴ്ച ഈ വളം തന്നെ മതിയാവും. നിറച്ച വളത്തിൽ നിന്നു തന്നെ വിത്ത് മുളച്ച് തൈ ആകും. ആഴ്ചയില്‍ ഒരു തവണ സ്യുഡോമോണസ് ഇരുപത് ഗ്രാം ഒരു ലിറ്റര്‍ വെള്ളത്തില്‍ എന്ന തോതിൽ കലർത്തി ഒഴിക്കാം.

നൈട്രജന്‍, ഫോസ്ഫറസ്, പൊട്ടാഷ് (എന്‍.പി.കെ) എന്നിവയാണ് ചെടികൾക്ക് കാര്യമായി വേണ്ടത്. ഒരു ചെടിക്ക് 25-50 ഗ്രാം കടല പിണ്ണാക്ക് ഇട്ട് കൊടുക്കുക.  കൂടെ കുറച്ചു വേപ്പിന്‍ പിണ്ണാക്ക് കൂടി ചേര്‍ത്ത് പൊടിച്ചു അല്‍പ്പം മണ്ണ് മാറ്റി ഇടാം. ഇങ്ങനെയായാൽ എറുമ്പ് കൊണ്ടുപോകില്ല. പിണ്ണാക്ക് ഇട്ട ശേഷം മണ്ണിട്ട്‌ മൂടാം.

പിണ്ണാക്ക് വെള്ളത്തിൽ ലയിപ്പിച്ച് കലക്കിയും നൽകാറുണ്ട്. വേപ്പിൻ പിണ്ണാക്കും ഇങ്ങനെ നൽകാം. രണ്ട് മൂന്ന് ദിവസം കുതിർത്ത് വെച്ച് തെളിയെടുത്ത് ഒഴിക്കുകയും ആവാം.

ഫിഷ്‌ അമിനോ ആസിഡ് പോലെയുള്ള ദ്രവ രൂപത്തിലുള്ള വളങ്ങൾ ശുപാർശ ചെയ്യുന്നുണ്ട്. പക്ഷെ ഇവ വീട്ടിൽ തയാറാക്കുകയാണെങ്കിൽ ശ്രദ്ധ വേണം. വീര്യം കൂടിയാൽ ചെടികൾ വാടും.  ചെടിയുടെ ചുവട്ടില്‍ ഒഴിച്ചും, ഇലകളില്‍ തളിച്ചും  ഇവ പ്രയോഗിക്കാറുണ്ട്.

വീട്ടില്‍ വാങ്ങുന്ന മത്തിയുടെ വേസ്റ്റ് ഉപയോഗിച്ചു വളരെ എളുപ്പത്തില്‍ ഫിഷ്‌ അമിനോ ആസിഡ് അഥവാ മതി പ്രോട്ടിന്‍ തയ്യാറാക്കാം. ഇത് നന്നായി നേർപ്പിക്കണം.  

ഓരോ ചെടിക്കും ആവശ്യമായ തോതിൽ വെള്ളം കൃത്യമായി ഒഴിച്ചു കൊടുക്കാനും മറക്കരുത്. വളർച്ചയുടെ ഘട്ടത്തിൽ തളർന്ന് പോയാൽ ചെടികൾ വിളവ് തരുന്നത് കുറയും.