പരിപാലനം വിളകൾക്കും വളർത്തുമൃഗങ്ങൾക്കും

മാർച്ച്–- ഏപ്രിൽ മാസങ്ങളിൽ ചൂട്‌ കൂടിവരുന്നതിനാൽ വാഴ, തെങ്ങ് എന്നിവയ്ക്ക് ആവശ്യാനുസരണം ജലസേചനം നൽകണം. മണ്ണിൽ ഈർപ്പം നിലനിർത്തുന്നതിന് പുതയിടീൽ അവലംബിക്കാം. കവുങ്ങിൻ തടിയിൽ വെയിൽ ഏൽക്കാതെ വെള്ള പൂശുകയോ പാള വച്ച് കെട്ടുകയോ ചെയ്യുക. കുരുമുളക് കൊടികൾക്ക് ആഴ്ചയിൽ ഒരു ദിവസം ജലസേചനം നൽകാം. കൊടിക്കു ചുറ്റും ഒന്നര മീറ്റർ വ്യാസത്തിൽ എടുത്ത തടങ്ങളിലാണ് വെള്ളം നിർത്തേണ്ടത്. ഉണങ്ങിയ ഇലകളോ മറ്റോ ഉപയോഗിച്ച് തടത്തിൽ പുതയിടുന്നതും നല്ലത്‌. അന്തരീക്ഷ താപനില ഉയരുന്നത്‌ തക്കാളിയിലെ പൂകൊഴിച്ചിലിന് കാരണമായേക്കാം. തക്കാളി ചെടികൾക്ക് കുറഞ്ഞ തോതിൽ തണൽ നൽകുന്നതും ആവശ്യത്തിന് ജലസേചനം നൽകുന്നതും ഉത്തമം. പച്ചക്കറിത്തൈകളെ വെയിലിൽനിന്ന്‌ സംരക്ഷിക്കണം.

വളർത്തുപക്ഷികൾക്കും വളർത്തുമൃഗങ്ങൾക്കും ആവശ്യത്തിന്‌ ശുദ്ധജലം നൽകണം, വെയിലിൽനിന്നും ചൂടിൽനിന്നും സംരക്ഷണം നൽകണം. അവയുടെ താമസസ്ഥലത്ത് വേണ്ടത്ര വായുസഞ്ചാരം ക്രമീകരിക്കണം. ചൂട് കൂടിയ സമയത്ത് കന്നുകാലികളെ മേയാൻ വിടരുത്‌. കന്നുകാലിത്തൊഴുത്തിൽ വായുസഞ്ചാരം കൂട്ടുന്നതിന് വശങ്ങൾ തുറന്നുവയ്ക്കുന്നതും പറ്റുമെങ്കിൽ മേൽക്കൂരയുടെ ഉയരം കൂട്ടുന്നതും നല്ലത്‌. കന്നുകാലികളെ രാവിലെ ഒമ്പതിന്‌ മുമ്പോ വൈകിട്ട്‌ നാലിനു ശേഷമോ മാത്രം മേയാൻ അനുവദിക്കുക. അന്തരീക്ഷത്തിലെ ചൂട് കൂടിവരുന്നതിനാൽ കന്നുകാലികൾക്ക് ധാരാളം തണുത്ത വെള്ളം കൊടുക്കണം.

അതിരാവിലെയും വൈകിട്ടും പുല്ല്, വൈക്കോൽ മുതലായവ നൽകാം. പശുവിന്‌ ഉണ്ടാകുന്ന അമ്ലതയും ദഹനക്കേടും ഒരു വേനൽക്കാല പ്രശ്നമാണ്‌. ഇത് ഒഴിവാക്കാൻ 30 ഗ്രാം സോഡാപൊടിയും ഒരു ടീസ്പൂൺ യീസ്റ്റ് കുതിർത്തതും തീറ്റയിൽ ചേർത്ത് നൽകുക.