ആരോഗ്യപ്പച്ചയെന്ന അത്ഭുതപ്പച്ച

തിരുവനന്തപുരം : പശ്ചിമഘട്ട മലഞ്ചെരുവുകളിൽമാത്രം വളരുന്ന ആരോഗ്യപ്പച്ചയെന്ന അപൂർവ സസ്യത്തിന്റെ ഔഷധ​ഗുണം പുറംലോകം അറിഞ്ഞിട്ട് 38 വർഷം പിന്നിട്ടു. അഗസ്ത്യമലയുടെ താഴ്‌വാരത്തുള്ള കാണിക്കാർ എന്ന ആദിവാസി സമൂ​ഹത്തിന്റെ സഹായത്തോടെയാണ്‌ 1987ൽ ആരോഗ്യപ്പച്ചയെന്ന (ട്രൈക്കോപ്പസ് സൈലാനിക്കസ് ട്രാവൻകൂറിക്കസ്) അത്ഭുത സസ്യത്തിന്റെ ഔഷധഗുണം ഗവേഷകർ കണ്ടെത്തിയത്. കോട്ടൂർ ചോനാംപാറ വനമേഖലയിലെ കുട്ടി മാത്തൻ കാണി, മല്ലൻകാണി, ഈച്ചൻകാണി എന്നിവരായിരുന്നു ചാത്തൻ കളഞ്ഞയെന്ന് വിളിച്ചിരുന്ന ചെടിയെ ​ഗവേഷകർക്ക് കാട്ടിക്കൊടുത്തത്.

അഗസ്ത്യാർകൂട മലനിരയിലെ ഈ ആരോ​ഗ്യപ്പച്ചയ്ക്ക് രോഗപ്രതിരോധ ശക്തി വർധിപ്പിക്കാനാകൂമെന്ന് വിവിധ പഠനങ്ങളിൽ കണ്ടെത്തി. സമുദ്രനിരപ്പിൽനിന്ന് 900 മീറ്റർ മുകളിൽമാത്രം വളരുന്ന ഈ സസ്യം പശ്ചിമഘട്ട വനമേഖലയിലേ വളരാറുള്ളൂ. പുറത്ത്‌ കൃത്രിമ അന്തരീക്ഷം സൃഷ്ടിച്ച് വളർത്തിയാലും സ്വാഭാവികഗുണങ്ങളിൽ വ്യത്യാസം വരുമെന്ന് ഗവേഷകർ പറയുന്നു. കുറ്റിച്ചെടിയായിമാത്രം വളരുന്ന ഇതിന്റെ കുരിന്നിലയും പാകമാകാത്ത കായുമാണ് കൂടുതൽ ഗുണം തരുന്നത്. അഗസ്ത്യവനം കൂടാതെ കൊല്ലം ജില്ലയിലെ കുളത്തൂപ്പുഴ, ആര്യങ്കാവ്, തെൻമല, റോസ്‌മല എന്നിവിടങ്ങളിലെ കാടുകളിലും ആരോഗ്യപ്പച്ച വളരുന്നു. ട്രൈക്കോപ്പസ് സൈലാനിക്കസ് ശ്രീലങ്കയിലും തായ്‌ലൻഡിലുമൊക്കെയുണ്ടെങ്കിലും ട്രൈക്കോപ്പസ് സൈലാനിക്കസ് ട്രാവൻകൂറിക്കസ് എന്ന ഈ വിഭാ​ഗത്തിനു മാത്രമേ ഔഷധഗുണമുള്ളൂവെന്ന് പിന്നീട് തെളിഞ്ഞു. പാലോട് ജവാഹർലാൽ നെഹ്‌റു ട്രോപ്പിക്കൽ ബൊട്ടാണിക് ഗാർഡൻ ആൻഡ് റിസർച്ച് ഇൻസ്റ്റിറ്റ്യൂട്ട് (ജെഎൻടിബിജിആർഐ) ആരോഗ്യപ്പച്ചയിലെ പന്ത്രണ്ട് രാസഘടകങ്ങൾ വേർതിരിച്ച് രസതന്ത്ര പഠനങ്ങളും നടത്തിയിരുന്നു.

ഇവയുടെ ഇലയിലും വിത്തിലും ഹൃദ്‌രോഗത്തെപ്പോലും പ്രതിരോധിക്കാൻ ശേഷിയുള്ള സാപോണിൻ എന്ന രാസപദാർഥം ധാരാളമായി അടങ്ങിയിട്ടുണ്ട്. ഇലകളിൽ ഫ്ലാവനോയിഡ് ഗ്ളൈക്കോസിഡും ഗ്ളൈക്കോലിപ്പിഡുകളുമുണ്ടെന്ന് കണ്ടെത്തി. ഇവയെല്ലാം രോഗപ്രതിരോധ ശേഷിയുള്ള രാസപദാർഥങ്ങളാണ്. കരൾ സംരക്ഷണം, മാനസിക സംഘർഷം ലഘൂകരിക്കൽ, ആന്റി ഓക്സിഡൻസ് സാന്നിധ്യം, ശരീരത്തിലെ നീര് വലിച്ചുകളയാനുള്ള ശേഷി, രോഗാണുക്കളെ പ്രതിരോധിക്കാനുള്ള കഴിവ് എന്നിങ്ങനെ ആരോഗ്യപ്പച്ചയുടെ ഗുണങ്ങൾ നിരവധിയാണ്.

ആരോഗ്യപ്പച്ചയെ ഉപയോഗിച്ച് പാലോട് ജവാഹർലാൽ നെഹ്‌റു ട്രോപ്പിക്കൽ ബൊട്ടാണിക് ഗാർഡൻ ആൻഡ് റിസർച്ച് ഇൻസ്റ്റിറ്റ്യൂട്ട് (ജെഎൻടിബിജിആർഐ) ആര്യവൈദ്യഫാർമസിയുമായി ചേർന്ന് ജീവനി എന്ന മരുന്ന് നിർമിക്കുകയും ലാഭവിഹിതം കാണിക്കാർക്ക് നൽകുകയും ചെയ്തു. ഇത് പിന്നീട് എബിഎസ് കാണി മോഡൽ (ആക്സസ് ആൻഡ് ബെനഫിറ്റ് ഷെയറിങ്‌) എന്ന പേരിൽ ലോകപ്രശസ്തമായി. നിരവധി അംഗീകാരങ്ങളും ലഭിച്ചു.

കുട്ടി മാത്തൻ കാണി ആരോ​ഗ്യപ്പച്ചയുമായി( ഫയൽ ചിത്രം)

പ്രത്യേകം കൃഷിയാക്കിയാൽ വരുമാനം ഉറപ്പ്‌

കാണിക്കാരുടെ നേതൃത്വത്തിൽ രൂപീകരിച്ച കേരള കാണി സമുദായ ക്ഷേമ ട്രസ്റ്റിന്റെ സഹായത്തോടെ കോട്ടൂർ വനമേഖലയിൽ ആരോ​ഗ്യപ്പച്ചയും കൃഷി ചെയ്തു. എന്നാൽ, പിന്നീട് പലകാരണങ്ങൾകൊണ്ട്‌ പദ്ധതി മുന്നോട്ട് കൊണ്ടുപോകാനായില്ല. ചില ഇടനിലക്കാർ കാട്ടിനുള്ളിൽനിന്ന് ആരോ​ഗ്യപ്പച്ചയെ കടത്തിക്കൊണ്ടുപോകാൻ തുടങ്ങിയതോടെ വനംവകുപ്പ്‌ നിയന്ത്രണം ഏർപ്പെടുത്തി. വനംവകുപ്പിന്റെ നേതൃത്വത്തിൽ ആരോഗ്യപ്പച്ച കൃഷി അഗസ്ത്യവനത്തിലെ കാണിക്കാരുടെ സ്വന്തം ഭൂമിയിൽ വ്യാപിപ്പിച്ചാൽ സംസ്ഥാന സർക്കാർ സ്ഥാപനമായ ഔഷധിക്ക് ആരോഗ്യപ്പച്ച ഉപയോഗിച്ച് "ജീവനി' എന്ന മരുന്ന നിർമിച്ച് വിപണിയിലിറക്കാൻ കഴിയും.

"ജീവനി ഔഷധി' നിർമിക്കാനുള്ള ആജീവനാന്ത അവകാശം ജെഎൻടിബിജിആർഐ ഔഷധിക്ക് കൈമാറിയിട്ടുണ്ട്. പ്രതിവർഷം മരുന്ന് വിറ്റുകിട്ടുന്ന ലാഭത്തിന്റെ ഒരു പങ്ക് റോയൽറ്റിയായി ഔഷധി കാണി സമുദായ ക്ഷേമ ട്രസ്റ്റിനും നൽകും. ആരോഗ്യപ്പച്ചയുടെ ഇലകൾ നൽകുന്ന കാണി സമുദായ ക്ഷേമ ട്രസ്റ്റിന് കിലോയ്ക്ക് 500 മുതൽ -1000 രൂപവരെ ലഭിക്കും. തുടർച്ചയായി വിളവെടുക്കാനാകുന്ന തരത്തിൽ ആരോഗ്യപ്പച്ച കൃഷി ചെയ്യാൻ കഴി‌ഞ്ഞാൽ ജീവനിയെപ്പോലുള്ള പല ഉൽപ്പന്നങ്ങളും നമുക്ക് നിർമിക്കാനാകും. തൊഴിലുറപ്പ് പോലുള്ള പദ്ധതികളിൽ ഇത് ഉൾപ്പെടുത്താനും കഴിയും. മരുന്ന് വിപണിയിലിറക്കിയാൽ ആദിവാസികൾക്ക് നേട്ടമുണ്ടാകുമെന്നതിൽ സംശയമില്ല. ആരോഗ്യപ്പച്ച ഉപയോഗിച്ച് മറ്റു പല മരുന്നുകളും നമുക്ക് നിർമിക്കാനുമാകും.

പ്രത്യേക രുചിയോ മണമോ ഇല്ലാത്ത ആരോഗ്യപ്പച്ചയുടെ ഇലയും കായുമൊക്കെ നാം നിത്യവും കഴിക്കുന്ന ആഹാരപദാർഥങ്ങളിൽപ്പോലും ചേർത്ത് ഉപയോഗിക്കാവുന്നതാണ്. ഇത്തരം ഉൽപ്പന്നങ്ങൾ നിർമിക്കുന്നതിനെക്കുറിച്ചും ആലോചിക്കാം.

കുട്ടിമാത്തൻ കാണി ആരോഗ്യപ്പച്ചയുമായി