പൊൻ വെള്ളരി വിളയിച്ച് പൊൻതിളക്കവുമായി കുരുന്നുകൾ

പഠനത്തിൽ മാത്രമല്ല കൃഷിയിലും

ഒന്നാമതാണ് മാവിലായി എൽ പി സ്കൂളിലെ കുട്ടികൾ. സ്കൂൾ കെട്ടിട വളപ്പിൽ വിവിധയിനം പച്ചക്കറികൾ ഉൽപ്പാദിപ്പിച്ച് മാതൃക തീർത്തവരാണിവർ. പത്ത് സെൻ്റോളം വരുന്ന സ്കൂൾ കെട്ടിട വളപ്പിൽ വിതച്ച വെള്ളരി വിത്തുകൾ നൂറുമേനി വിളഞ്ഞ സന്തോഷം അടക്കാനാവുന്നില്ലിവർക്ക്. വിളവെടുത്ത പൊൻനിറമുള്ള വെള്ളരികൾ അടുക്കി കൂട്ടാനുള്ള അത്യുത്സാഹത്തിൽ സ്വയം മറന്ന് കുട്ടികളും, അധ്യാപകരും, രക്ഷിതാക്കളും. പോയകാല കൃഷി ഓർമ്മകളുടെ സാർത്ഥകമായ വീണ്ടെടുപ്പ്. ഇവർ രചിക്കുന്നത് അടുപ്പത്തിൻ്റെ, അധ്വാനത്തിൻ്റെ, ആത്മവിശ്വാസത്തിൻ്റെ, ആത്മഹർഷത്തിൻ്റെ പുതുചരിത്രം.

സ്കൂളിലെ ഇക്കൊ ക്ലബ്ബിൻ്റെ നേതൃത്വത്തിൽനടത്തിയ വെള്ളരികൃഷിയിൽ അഞ്ഞൂറ് കിലോയോളം പൊൻവെള്ളരിയാണ് വിളവെടുക്കാനായത്. വെള്ളരി വിളവെടുപ്പ് ക്ലബ്ബ് കൺവീനർ സി അമൃത ടീച്ചറും, സ്കൂൾ ലീഡർമാരായ സൃഷ്ടി നിജിലും ദേവത് ലിജിനും ചേർന്ന് നിർവ്വഹിച്ചു. വിളവെടുത്ത വെള്ളരി സ്കൂളിലെ കുട്ടികൾക്ക് വിതരണം ചെയ്തു.

കൃഷിയോട് മുഖം തിരിക്കുന്ന പുതിയ തലമുറയ്ക്ക് അപവാദമാണ് മാവിലായി

എൽ പി സ്കൂളിലെ കുട്ടികൾ. ഇക്കൊ ക്ലബ്ബിൻ്റെ നേതൃത്വത്തിൽ കഴിഞ്ഞ മാസം വിളവെടുത്ത 300 കിലോയോളംവരുന്ന പടവലവും, പയറും, പൊട്ടിക്കയും, കയ്പക്കയും, ചീരയും, വെള്ളരിയും, വഴുതിനയും,പച്ചമുളകും,കക്കിരിയുമൊക്കെ

മൂന്നുപെരിയയിലെ ചന്ത വഴി ഇവർ വിൽപന നടത്തിയിരുന്നു.

സ്കൂളിലെ ഇക്കോക്ലബ്ബിൻ്റെ നേതൃത്വത്തിൽ

കഴിഞ്ഞ പതിനഞ്ച് വർഷങ്ങളായി മാവിലായി എൽ പി സ്കൂളിൽ കൃഷി ചെയ്തുവരുന്നുണ്ട് . ഇവിടെ ഉൽപ്പാദിപ്പിക്കുന്ന പച്ചക്കറികൾ സ്കൂളിലെ ഉച്ചഭക്ഷണത്തിന് ഉപയോഗിക്കും.അധികം വരുന്നത് കുട്ടികൾക്ക് വീട്ടിലേക്ക് കൊണ്ടു പോകാം, തികച്ചും സൗജന്യമായി.

അധ്യാപികമാരായ വന്ദന ഹേമചന്ദ്രൻ,

സി അമൃത, എൻ ജ്യോതി, മദർ പി ടി എ പ്രസിഡൻ്റ് എം ലിഷ, പി ടി എ പ്രസിഡൻ്റ്

വി കെ ഷിനോദ്, മറ്റ് രക്ഷിതാക്കൾ എല്ലാ പ്രവർത്തനത്തിനും നേതൃത്വമായി സ്കൂളിലെ പ്രധാനാധ്യാപകൻ

ബി സഹദേവനും ഇവർക്കൊപ്പമുണ്ട്.