എന്തൊരു ചൂടാണ് ലോകം! ചൂട് അനുഭവപ്പെടുന്ന ദിവസങ്ങളിൽ 26 ശതമാനം വർധന

ലോകത്തിലെ പ്രധാന നഗരങ്ങളിൽ കഴിഞ്ഞ മുപ്പത് വർഷത്തിനിടയിൽ 26 ശതമാനം വരെ പരമാവധി താപനില വർധിച്ചതായി പഠനം. മൂന്ന് പതിറ്റാണ്ടുകൾക്ക് മുമ്പ് ഓരോ നഗരത്തിലെയും ജനങ്ങൾ അനുഭവിച്ചതിനെക്കാൾ കാൽ ശതമാനം അധികം ചൂടുള്ള ദിവസങ്ങൾ ഇപ്പോൾ നമ്മൾ അനുഭവിക്കുന്നു.

യുകെ ആസ്ഥാനമായുള്ള ഇന്റർനാഷണൽ ഇൻസ്റ്റിറ്റ്യൂട്ട് ഫോർ എൻവയോൺമെന്റ് ആൻഡ് ഡെവലപ്‌മെന്റിലെ (IIED) ഗവേഷകരുടേതാണ് പഠനം. 1994 മുതലുള്ള ഡാറ്റയാണ് വിശകലനം ചെയ്തത്. 40 ഏറ്റവും ജനസംഖ്യയുള്ള തലസ്ഥാനങ്ങൾ ഉൾപ്പെടെ 43 നഗരങ്ങളിൽ നിന്നുള്ള താപനില ഗവേഷകർ താരതമ്യം ചെയ്തു. ഫലം വിയർപ്പിക്കുന്നതാണ്.

31 വർഷത്തെ കാലയളവിൽ ഈ നഗരങ്ങളിൽ 35 ഡിഗ്രി സെൽഷ്യസിനു മുകളിലുള്ള ദിവസങ്ങളുടെ എണ്ണം (വളരെ ചൂടുള്ള ദിവസങ്ങൾ) 26 ശതമാനം വരെ വർദ്ധിച്ചതായി അവർ കണ്ടെത്തി. 470 ദശലക്ഷം നഗരവാസികളെ ഇത് ബാധിക്കുന്നു. ബദൽ സൌകര്യങ്ങൾ ഒന്നും തന്നെയില്ലാത്ത സാധാരണ മനുഷ്യരെ വിശേഷിച്ചും.

ഇന്ത്യയിൽ ഡൽഹി മുന്നിൽ

ഇന്ത്യയിൽ ഡൽഹിയാണ് ഇവയിൽ ഏറ്റവും ചുട്ടുപൊള്ളിക്കുന്നത്. 2013 മുതൽ ജനസംഖ്യ കുറഞ്ഞത് പകുതിയായി വർദ്ധിച്ച നഗരത്തിൽ ചൂടുസമ്മർദ്ദവും സമാന്തരമായി കൂടി. സാധാരണ ജനവാസ കേന്ദ്രങ്ങളിലെ മോശം ഭവന, അടിസ്ഥാന സൗകര്യങ്ങൾ കാരണം പാവപ്പെട്ടവരാണ് ചൂട് വർധനവിന് ഇവിടെ ഏറ്റവും ഇരയാകുന്നത്.

1994 നും 2003 നും ഇടയിൽ ഓരോ വർഷത്തിലും ശരാശരി 1,062 ദിവസങ്ങളാണ് ഉയർന്ന ചൂട് രേഖപ്പെടുത്തിയിരുന്നത്. ഇതിൽ നിന്നും 2015 നും 2024 നും ഇടയിലുള്ള വർഷങ്ങളിലേക്ക് എത്തിയപ്പോൾ 1,335 ദിവസങ്ങളായി ഉയർന്നു. അത്രയും ചൂടൻ ദിവസങ്ങളുടെ വർധന.

ഗവേഷക സംഘം പരിശോധിച്ച നഗരങ്ങളിൽ 2024 വർഷത്തിൽ 1,612, ദിവസങ്ങളിൽ ഉയർന്ന ചൂട് രേഖപ്പെടുത്തി. ഇവിടങ്ങളിൽ 2019 നെ അപേക്ഷിച്ച് 196 ചൂടൻ ദിവസങ്ങൾ കൂടുതലായി അനുഭവപ്പെട്ടു. രണ്ടാമത്തെ ഉയർന്ന നിരക്കാണ് ഇത്. മാത്രമല്ല 1994 ൽ അനുഭവപ്പെട്ടിരുന്നതിനെക്കാൾ 52 ശതമാനം കൂടുതലാണ് ഇത്. അത്രയും കൂടുതൽ ഉഷ്ണിക്കുന്ന ദിവസങ്ങൾ അനുഭവപ്പെടുന്നു.

അതിശക്തമായ ചൂടിന്റെ ഏറ്റവും ഉയർന്ന മൂന്ന് വർഷങ്ങൾ കഴിഞ്ഞ ആറ് വർഷത്തിനകമാണ് ഉണ്ടായത്. 2024 ലും  2023 ഉം 2019 ഉം വർഷങ്ങളാണിത്. ഇന്ത്യയിൽ മാത്രമല്ല. ലോകം മുഴുവൻ ഇത് അനുഭവിക്കുന്നു.

തണുപ്പുള്ള പ്രദേശങ്ങളിൽ വരെ

അന്റനനാരിവോ (മഡഗാസ്കർ), കെയ്‌റോ (ഈജിപ്ത്), ജോഹന്നാസ്ബർഗ് (ദക്ഷിണാഫ്രിക്ക), കിൻഷാസ (ഡെമോക്രാറ്റിക് റിപ്പബ്ലിക് ഓഫ് കോംഗോ), മനില (ഫിലിപ്പീൻസ്), റോം (ഇറ്റലി), ടോക്കിയോ (ജപ്പാൻ), വാഷിംഗ്ടൺ ഡിസി (യുഎസ്), യൗണ്ടെ (കാമറൂൺ) എന്നീ നഗരങ്ങളിൽ എല്ലാം 2024 ൽ റെക്കോർഡ് ചൂടുള്ള ദിവസങ്ങൾ രേഖപ്പെടുത്തി.

തണുത്ത കാലാവസ്ഥയ്ക്ക് പേരുകേട്ട സാവോ പോളോയിൽ 2024 ൽ 30 ഡിഗ്രിയിൽ കൂടുതൽ ചൂട് അനുഭവപ്പെട്ട 120 ദിവസങ്ങൾ ഉണ്ടായി. പ്രദേശത്തെ പഠന കാലയളവായ 30 വർഷത്തെ ഏറ്റവും ഉയർന്ന താപനിലയാണിത്.

ബ്രസീൽ തലസ്ഥാനമായ ബ്രസീലിയയിൽ 1994 നും 2003 നും ഇടയിൽ 35 ഡിഗ്രിയിൽ കൂടുതൽ ചൂട് അനുഭവപ്പെട്ടത് വെറും മൂന്ന് ദിവസം മാത്രമായിരുന്നു. ഈ പത്ത് വർഷത്തിനിടയിൽ 40 ദിവസങ്ങളായി ഉയന്നു. മൂന്ന് ദിവസത്തിന് പകരം ഒരു മാസക്കാലയളവിലും അധികം ചൂടുള്ള ദിവസങ്ങൾ അവരനുഭവിച്ചു.

യൂറോപ്പിനും ചൂട് പിടിക്കുന്നു.

യൂറോപ്പ് വൻകരിയിലും ചൂട് ഉയരുക തന്നെയാണ്. റോമിൽ 35 ഡിഗ്രിയിൽ കൂടുതലുള്ള ശരാശരി ദിവസങ്ങൾ 1994 നും 2003 നും ഇടയിൽ 11 ആയിരുന്നത് ഇരട്ടിച്ച് കഴിഞ്ഞ ദശകത്തിൽ 24 ആയി ഉയർന്നു.

മാഡ്രിഡിലെ (സ്പെയിൻ) ആളുകൾ മുൻ കാലയളവിൽ ശരാശരി 25 അത്തരം ദിവസങ്ങൾ നേരിട്ടു. ഇത് 2015 നും 2024 നും ഇടയിൽ എത്തിയപ്പോൾ 47 ആയി വർദ്ധിച്ചു. ബെർലിനിലും (ജർമ്മനി) സമാന അനുഭവം രേഖപ്പെടുത്തി.

ആഫ്രിക്കയിലും വ്യത്യസ്തമല്ല

ദക്ഷിണാഫ്രിക്കയിൽ, പ്രിട്ടോറിയയിലെയും ജോഹന്നാസ്ബർഗിലെയും നിവാസികൾ ശരിക്കും ചൂട് അനുഭവിക്കുന്നു. തലസ്ഥാനം ഇപ്പോൾ പ്രതിവർഷം ശരാശരി 11 ദിവസം 35°C യിൽ കൂടുതലാണ്. 1994 നും 2003 നും ഇടയിൽ വെറും മൂന്ന് ദിവസമായിരുന്നു അത്. 1994 നും 2021 നും ഇടയിൽ ജോഹന്നാസ്ബർഗിൽ ആകെ മൂന്ന് ദിവസം മാത്രമേ 35°C യിൽ എത്തിയിട്ടുള്ളൂ. എന്നാൽ 2022 നും 2024 നും ഇടയിൽ, 26 ദിവസമായി.

തെക്കുകിഴക്കൻ ഏഷ്യയിൽ കുത്തനെയുള്ള മുകളിലേക്കുള്ള താപനില പ്രവണതകളുണ്ട്. ബാങ്കോക്ക് ഒഴികെയുള്ള എല്ലാ സ്ഥലങ്ങളിലും വളരെ ചൂടുള്ള ദിവസങ്ങൾ അനുഭവപ്പെടുന്നു. 1994 മുതൽ 2003 വരെയുള്ള ദശകത്തിൽ നിന്ന് ഹനോയിയുടെ 10 വർഷത്തെ ശരാശരി ഇരട്ടിയായി, ക്വാലാലംപൂരിലേത് ഏതാണ്ട് മൂന്നിരട്ടിയായി.

ഓരോ രാജ്യത്തെയും സർക്കാരുകൾക്ക് കാലാവസ്ഥയും അതിലെ വ്യത്യാനങ്ങളും തമ്മിലുള്ള പഠന അറിവുകൾ ഉണ്ട്. എന്നാൽ സർക്കാരുകൾ പ്രതീക്ഷിച്ചതിലും വേഗത്തിൽ ആഗോള താപനില ഉയരുന്നു, തീർച്ചയായും അവർ പ്രതികരിക്കുന്നതിനേക്കാൾ വേഗത്തിൽ." എന്ന് IIED യിലെ ഗവേഷകയായ അന്ന വാൽനിക്കി പറഞ്ഞു.

 ഏറ്റവും ദരിദ്രരായ ആളുകളായിരിക്കും ഏറ്റവും കൂടുതൽ ഇതിന്റെ ഫലദുരിതങ്ങൾ അനുഭവിക്കുക. താഴ്ന്ന നിലവാരമുള്ള ഭവനങ്ങളും അടിസ്ഥാന സൗകര്യങ്ങളും ഗ്ലോബൽ സൗത്തിലെ  ഇതിന്റെ പ്രഭാവ ഫലങ്ങൾ രൂക്ഷമാക്കും.

മനുഷ്യരും മനോഭാവവും മാറണം

പുതിയ നിർമ്മാണ ചട്ടങ്ങൾ വേണ്ടിവരും. ചൂടേറി വരുന്ന ലോകത്തിന് അനുയോജ്യമാണെന്ന് ഉറപ്പാക്കേണ്ടി വരും. കെട്ടിടങ്ങളിലെ ഇൻസുലേഷനും വെന്റിലേഷനും മെച്ചപ്പെടുത്തുന്നതിനും, താപ സമീകരണ പ്രവർത്തന പദ്ധതികൾ വികസിപ്പിക്കുന്നതിനും തണൽ മൂടൽ സൃഷ്ടിക്കുന്നതിനും നഗരങ്ങൾക്ക് അടിയന്തിരമായി പദ്ധതികൾ ആവശ്യമാകുമെന്നും ഐഐഇഡി ചൂണ്ടികാണിക്കുന്നു.

ആഗോള നഗര ജനസംഖ്യയുടെ മൂന്നിലൊന്ന് ഭാഗവും അവികസിതമായ വാസസ്ഥലങ്ങളിലും സാഹചര്യങ്ങളിലുമാണ് താമസിക്കുന്നത്. അവർ മാരകമായ ഉഷ്ണതരംഗങ്ങൾക്ക് ഏറ്റവും കൂടുതൽ വിധേയമാകും എന്നും വിശകലനം സൂചിപ്പിക്കുന്നു. ജീവിതത്തിന്റെ മറ്റ് മേഖലകളിലേക്കുള്ള ഇതിന്റെ ആഘാതം വ്യക്തമാണ് . മോശം ഉറക്കം. ജോലിസ്ഥലത്തെ മോശം പ്രകടനം. നമ്മൾ ചെയ്യാൻ ഇഷ്ടപ്പെടുന്ന കാര്യങ്ങൾക്ക് കുറഞ്ഞ ഊർജ്ജം ഇവയെല്ലാം വർധിക്കും.

2013 മുതൽ 16 നഗരങ്ങളിലെ ജനസംഖ്യ കുറഞ്ഞത് പകുതിയായി വർദ്ധിച്ചു: അഡിസ് അബാബ, അന്റാനനാരിവോ, ബാങ്കോക്ക്, കെയ്‌റോ, ഡാർ എസ് സലാം, ഡൽഹി, ധാക്ക, ഹനോയ്, ജോഹന്നാസ്ബർഗ്, കമ്പാല, കിൻഷാസ, ലുവാണ്ട, പ്രിട്ടോറിയ, നെയ്‌റോബി, റിയാദ്, യൗണ്ടെ എന്നീ നഗരങ്ങളിൽ എല്ലാം വർധനവ് ഉണ്ടായി.

പൊരുത്തപ്പെടുന്നതിൽ പരാജയപ്പെടുന്നത് ദുരിതമാവും. നഗരങ്ങളിലെ ഹീറ്റ് ഐലൻഡ് പ്രഭാവം മൂലം ദശലക്ഷക്കണക്കിന് നഗരവാസികൾക്ക് കൂടുതൽ അസ്വസ്ഥതകളും അപകടകരവുമായ അവസ്ഥകളും നേരിടുന്ന സാഹചര്യം വരും.

"ലണ്ടനിലായാലും ലുവാണ്ടയിലായാലും ലിമയായാലും ദരിദ്രരായ ആളുകളായിരിക്കും ഏറ്റവും കൂടുതൽ ദുരിതമനുഭവിക്കുക. താഴ്ന്ന നിലവാരമുള്ള ഭവനങ്ങളും അടിസ്ഥാന സൗകര്യങ്ങളും കാരണം ഗ്ലോബൽ സൌത്തിലെ താഴ്ന്ന വരുമാനക്കാരോ ആസൂത്രണം ചെയ്യാത്തതോ ആയ സമൂഹങ്ങളിലെ ആഘാതങ്ങൾ രൂക്ഷമയിരിക്കും എന്നും അന്ന വാൽനിക്കി മുന്നറിയിപ്പ് നൽകുന്നു.

പഠനം നടത്തിയ 43 നഗരങ്ങളിലെയും മൊത്തം ജനസംഖ്യ ഏകദേശം 470 ദശലക്ഷമാണ്. വരും ദശകങ്ങളിൽ ഇത് കുത്തനെ ഉയരുമെന്ന് കണക്കാക്കുന്നു. ജനസംഖ്യയും ഒപ്പം ഉഷ്ണവും ഉയരും.