​ഗ്രീൻലാൻഡ് സ്വന്തമാക്കാൻ പുതിയ കരാറുമായി ട്രംപ്; സൈനിക സാന്നിധ്യം ശക്തമാക്കും

ന്യൂയോർക്ക് : ​ആർട്ടിക് മേഖല കൈയടുക്കകയെന്ന അമേരിക്കയുടെ സാമ്രാജ്യത്വ അജണ്ടക്ക് കരുത്തേകുന്ന പുതിയ പ്രതിരോധ കരാറിൽ ഒപ്പുവച്ച് ഗ്രീൻലാൻഡും ഡെന്മാർക്കും. ​ഗ്രീൻലാൻഡിലും ആർട്ടിക് മേഖലയിലും യുഎസിന്റെ സൈനിക സാന്നിധ്യം ശക്തിപ്പെടുത്തുന്നതാണ് പ്രതിരോധ കരാർ. ​ഗ്രീൻലാൻഡ് സ്വന്തമാക്കുക എന്ന ലക്ഷ്യത്തിൽ നിന്ന് പിന്മാറിയെങ്കിലും സൈനിക അധികാരം കൈക്കലാക്കുകയാണ് ട്രംപിന്റെ ലക്ഷ്യം. ​ഗ്രീൻലാൻഡിന്റെ സുരക്ഷ ചുമതലയിൽ അമേരിക്കയ്ക്ക് കൂടുതൽ പങ്കാളിത്തം നൽകുന്ന കരാറിന്റെ പ്രധാന ലക്ഷ്യം ​ഗ്രീൻലാൻഡിലേക്ക് കടന്നുകയറ്റം നടത്തുകയെന്നതാണ്.

പ്രതിരോധ കരാർ നിലവിൽ വന്നാൽ ഗ്രീൻലാൻഡിലെ രണ്ട് തന്ത്രപ്രധാന കേന്ദ്രങ്ങളിൽ പുതിയ സൈനിക താവളങ്ങൾ സ്ഥാപിക്കാൻ യുഎസിന് അനുമതി ലഭിക്കും. ആർട്ടിക് മേഖലയിലെ സൈനിക ശക്തി വർധിപ്പിച്ച് സാമ്രാജ്യത്വ അജണ്ട നടപ്പിലാക്കുകയാണ് അമേരിക്കയുടെ ചിരകാല സ്വപ്നമാണ് ഈ കരാറിലൂടെ നടപ്പിലാകുന്നത്. 1951ലെ യുഎസ്-ഡെൻമാർക്ക് പ്രതിരോധ കരാറിന്റെ അടിസ്ഥാനത്തിലാണ് പുതിയ ധാരണ.

രാജ്യത്തിന്റെ പരമാധികാരം ഡെൻമാർക്കിൽ തുടരുമെന്ന് കരാറിൽ പറയുന്നുണ്ട്. ഗ്രീൻലാൻഡിലെ ജനങ്ങളുടെ സ്വയംനിർണയാവകാശവും കരാർ അംഗീകരിക്കുന്നുണ്ട്. എന്നിരുന്നാലും രാജ്യത്തിന് മേൽ അമേരിക്കക്ക് ഭാ​ഗിക അധിനിവേശത്തിന് അധികാരം നൽകുന്ന കരാറാണിത്. ഗ്രീൻലാൻഡ് അമേരിക്കയുടെ ഭാഗമാക്കണമെന്ന ട്രംപിന്റെ താല്പര്യത്തെ ഡെൻമാർക്ക് എതിർത്തിരുന്നു. എന്നാൽ പുതിയ കരാർ വഴി ഗ്രീൻലാൻഡിലേക്ക് സൈനിക ശക്തി വർധിപ്പിച്ച് സാമ്രാജ്യത്വ അധിനിവേശ അജണ്ട നടപ്പിലാക്കുക തന്നെയാണ് അമേരിക്കയുടെ ലക്ഷ്യമെന്ന് വ്യക്തമാണ്.