അജ്ഞാതൻ വെടിയുതിർത്തു: ദക്ഷിണാഫ്രിക്കയിൽ 10 പേർ കൊല്ലപ്പെട്ടു

കേപ് ടൗൺ: ദക്ഷിണാഫ്രിക്കയിൽ അജ്ഞാതൻ നടത്തിയ വെടിവയ്പ്പിൽ പത്ത് പേർ കൊല്ലപ്പെട്ടു. ആക്രമണത്തിൽ പത്ത് പേർക്ക് പരിക്കേറ്റതായാണ് റിപ്പോർട്ട്. ബെക്കേഴ്‌സ്‌ഡാലിലാണ് ആക്രമണം നടന്നത്. ദക്ഷിണാഫ്രിക്കയിൽ ഈ മാസം നടക്കുന്ന രണ്ടാമത്തെ കൂട്ട വെടിവയ്പാണിത്.ജോഹന്നാസ്ബർഗിൽ നിന്ന് ഏകദേശം 40 കിലോമീറ്റർ അകലെയാണ് ആക്രമണം നടന്ന പ്രദേശം.

ബെക്കേഴ്‌സ്‌ഡാലിലെ ഒരു അനധികൃത മദ്യശാലയ്‌ക്ക് സമീപമാണ് വെടിവയ്പ്പ് നടന്നത്. പരിക്കേറ്റവരെ ആശുപത്രിയിൽ പ്രവേശിപ്പിച്ചതായി പൊലീസ് പറഞ്ഞു. ഡിസംബർ 6 ന്, തലസ്ഥാനമായ പ്രിട്ടോറിയയ്ക്ക് സമീപമുള്ള ഒരു ഹോസ്റ്റലിൽ തോക്കുധാരികൾ അതിക്രമിച്ചു കയറി വെടിവയ്പ്പ് നടത്തിയിരുന്നു. ഈ ആക്രമണത്തിൽ മൂന്ന് വയസ്സുള്ള ഒരു കുട്ടി ഉൾപ്പെടെ 12 പേർ കൊല്ലപ്പെട്ടിരുന്നു.

നിയമവിരുദ്ധമായി മദ്യം വിൽക്കുന്ന ഒരു സ്ഥലത്താണ് വെടിവയ്പ്പ് നടന്നതെന്ന് പൊലീസ് പറഞ്ഞു. 63 ദശലക്ഷം ആളുകൾ താമസിക്കുന്ന ദക്ഷിണാഫ്രിക്കയിൽ ഉയർന്ന കുറ്റകൃത്യനിരക്കാണ് റിപ്പോർട്ട് ചെയ്യുന്നത്.