കടലിൽ നീന്തുന്നതിനിടെ സ്രാവ് ആക്രമിച്ചു; ഓസ്ട്രേലിയയിൽ 17കാരിക്ക് ദാരുണാന്ത്യം

സിഡ്നി : കടലിൽ നീന്തുന്നതിനിടെ സ്രാവിന്റെ ആക്രമണത്തിൽ 17കാരിക്ക് ​ദാരുണാന്ത്യം. ഓസ്ട്രേലിയയിലെ ക്വീൻസ് ലാൻഡിലാണ് സംഭവം. ബ്രിസ്ബേനിലെ വൂറിം ബീച്ചിൽ തിങ്കൾ പ്രാദേശിക സമയം 6.45ഓടെയായിരുന്നു അപകടം നടന്നത്. തീരത്തോടടുത്താണ് ആക്രമണമുണ്ടായത്. നീന്തുന്നതിനിടെ പെൺകുട്ടിയെ സ്രാവ് ആക്രമിക്കുകയായിരുന്നു. ​ഗുരുതരമായി പരിക്കേറ്റ പെൺകുട്ടി സംഭവസ്ഥലത്തുവച്ചുതന്നെ മരിച്ചു.

പ്രദേശത്ത് നിരവധി സ്രാവുകളുണ്ടെന്നതും തീരത്തോട് ഏറെ അടുത്തുകിടന്ന പ്രദേശത്താണ് ആക്രമണമുണ്ടായതെന്നും ആശങ്കയുണ്ടാക്കുന്നുവെന്ന് പ്രദേശവാസികൾ പറഞ്ഞു. പെൺകുട്ടിയുടെ കൈക്കാണ് ​ഗുരുതര പരിക്കേറ്റത്. ഏത് ഇനത്തിൽപ്പെട്ട സ്രാവാണ് ആക്രമിച്ചതെന്ന് വ്യക്തമല്ല. ഈ വർഷം സ്രാവിന്റെ ആക്രമണത്തിൽ ഓസ്ട്രേലിയയിലുണ്ടാകുന്ന രണ്ടാമത്തെ മരണമാണിത്. ജനുവരി രണ്ടിന് സ്രാവിന്റെ ആക്രമണത്തിൽ സർഫിങ് താരം കൊല്ലപ്പെട്ടിരുന്നു.