യൂട്യൂബ് പണിമുടക്കി; ലോകമെമ്പാടും സേവനം തടസ്സപ്പെട്ടു

ന്യൂഡൽഹി: വീഡിയോ സ്ട്രീമിംഗ് പ്ലാറ്റ്‌ഫോമായ യൂട്യൂബ് ലോകമെമ്പാടും പണിമുടക്കി. ഇന്ത്യയുൾപ്പെടെയുള്ള വിവിധ രാജ്യങ്ങളിൽ ബുധനാഴ്ച രാവിലെ മുതൽ യൂട്യൂബ് സേവനങ്ങൾ തടസ്സപ്പെട്ടതായാണ് റിപ്പോർട്ട്. ഇന്ത്യയിൽ ഇപ്പോൾ സേവനം പുനഃസ്ഥാപിച്ചിട്ടുണ്ട്.

ഹോം പേജ് ലോഡ് ആകുന്നില്ലെന്നും വീഡിയോകൾ പ്ലേ ചെയ്യുന്നില്ലെന്നും ചൂണ്ടിക്കാട്ടി ലക്ഷക്കണക്കിന് ഉപയോക്താക്കൾ പരാതിയുമായി രംഗത്തെത്തി. ഡെസ്ക്ടോപ്പ് പതിപ്പിലും മൊബൈൽ ആപ്പിലും ഒരേപോലെ പ്രശ്നങ്ങൾ അനുഭവപ്പെടുന്നുണ്ട്.

'Something went wrong' എന്ന സന്ദേശമാണ് പലർക്കും ദൃശ്യമാകുന്നത്. സെർവർ തകരാറാണ് ഇതിന് പിന്നിലെന്നാണ് പ്രാഥമിക നിഗമനം. യൂട്യൂബ് മ്യൂസിക് ഉൾപ്പെടെയുള്ള മറ്റ് സേവനങ്ങളെയും തകരാർ ബാധിച്ചിട്ടുണ്ട്.

പ്രശ്നം പരിഹരിക്കാനുള്ള ശ്രമങ്ങൾ തുടരുകയാണെന്ന് ഗൂഗിൾ വൃത്തങ്ങൾ അറിയിച്ചു. എന്നാൽ തകരാറിന്റെ കൃത്യമായ കാരണം ഇതുവരെ വ്യക്തമാക്കിയിട്ടില്ല. തകരാർ സംബന്ധിച്ച റിപ്പോർട്ടുകൾ സമൂഹമാധ്യമങ്ങളിൽ ട്രെൻഡിംഗാണ്.