ട്രംപിന് നൊബേൽ വാങ്ങിക്കാൻ “പീസ്  പ്രസിഡന്റ്” വിശേഷണവുമായി വൈറ്റ് ഹൗസും രംഗത്ത്

ഓസ്‌ലോ: സമാധാന നൊബേൽ പ്രഖ്യാപനം നാളെ വെള്ളിയാഴ്ച നടക്കും. സ്വയം തന്നെ അർഹത പ്രഖ്യാപിച്ച് അമേരിക്കൻ പ്രസിഡന്റ് ഡൊണൾഡ് ട്രംപ് രംഗത്തുണ്ട്. ഇതോടെ, സമാധാന നൊബേൽ ലോകത്തിന്റെ മുഴുവൻ കൗതുകം ഉണർത്തിയാണ് സംഭവിക്കാനിരിക്കുന്നത്.

വൈറ്റ് ഹൗസ് തന്നെ അവസരം മുതലെടുത്ത് നേരിട്ട് രംഗത്ത് എത്തിയിതാണ് പുതിയ കൌതുകം. അവർ ഡൊണാൾഡ് ട്രംപിനെ 'പീസ് പ്രസിഡന്റ്' ആയി അവതരിപ്പിച്ചു. ഔദ്യോഗിക ട്വിറ്റര്‍ ഹാന്‍ഡിലിലാണ് പ്രതികരണം.

 ട്രംപ് അധികാരത്തിൽ തിരിച്ചെത്തിയതിനുശേഷം ഈ പുരസ്കാരത്തിനായുള്ള മോഹം പലതവണ പ്രകടിപ്പിച്ചിട്ടുണ്ട്‌. 

244 വ്യക്‌തികളും 94 സംഘടനകളുമാണ് ഇത്തവണ നാമനിർദ്ദേശം ചെയ്യപ്പെട്ടിട്ടുള്ളത്. മൊത്തം 338 നിർദ്ദേശങ്ങൾ ലഭിച്ചു. ഇക്കണോമിക്സിന് തൊട്ടുമുൻപായി ഒടുവിലായാണ് സമാധാന നൊബേൽ പ്രഖ്യാപിക്കുന്ന പതിവ്. സയൻസ് വിഷയങ്ങൾക്ക് ശേഷം സാഹിത്യം, സമാധാനം എന്നിങ്ങനെയാണ് ക്രമം.

നാമനിർദേശം ലഭിച്ച പേരുകൾ നൊബേൽ പുരസ്കാര സമിതി പരസ്യപ്പെടുത്താറില്ല. ഇന്ത്യയും പാകിസ്ഥാനുമായുണ്ടായത് ഉൾപ്പെടെ യുദ്ധങ്ങളിൽ സമാധാന പുനഃസ്ഥാപിക്കാൻ നടത്തിയ ശ്രമങ്ങൾ ഉയർത്തിക്കാട്ടിയാണ് ട്രംപ് സ്വയം സ്ഥാനാർത്ഥിത്വം അവകാശപ്പെട്ടത്. ഗാസ സമാധാന കരാർ വേഗത്തിലാക്കാൻ  സജീവ ശ്രമങ്ങൾ തുടരുകയാണ്. മൂന്നു ദിവസത്തിനകം കരാർ എന്ന ലക്ഷ്യം നടന്നില്ല.

ഇസ്രായേലും പാകിസ്ഥാനും ട്രംപിനെ നോബൽ സമ്മാനത്തിന് പിന്തുണച്ചു. ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു ട്രംപിനെ നേരിട്ട് സമാധാന നോബലിന് അർഹൻ എന്ന് വിശേഷിപ്പിച്ചു. കംബോഡിയയും ട്രംപിനെ പിന്തുണച്ചു, അയൽക്കാരനായ തായ്‌ലൻഡുമായുള്ള സംഘർഷം അവസാനിപ്പിക്കാൻ സഹായിച്ചതിന് യുഎസ് പ്രസിഡന്റിനെ പ്രശംസിച്ചു. അവർക്ക് മുമ്പ്, അമേരിക്കൻ പ്രസിഡന്റിന്റെ സാന്നിധ്യത്തിൽ സമാധാന കരാറിൽ ഒപ്പുവച്ചതിന് ശേഷം അർമേനിയയും അസർബൈജാനും ട്രംപിനെ നോബൽ സമാധാന സമ്മാനത്തിന് പിന്തുണച്ചു.

എന്നാൽ ഏറ്റവും ഒടുവിലായി ഇതു സംബന്ധിച്ച ട്രംപിന്റെ പ്രതികരണം അല്പം നിരാശ കലർന്നതായിരുന്നു. "എനിക്കറിയില്ല... മാർക്കോ (സ്റ്റേറ്റ് സെക്രട്ടറി റൂബിയോ) നിങ്ങളോട് പറയും, ഞങ്ങൾ ഏഴ് യുദ്ധങ്ങൾ പരിഹരിച്ചു. എട്ടാമത്തേത് പരിഹരിക്കുന്നതിലേക്ക് ഞങ്ങൾ അടുത്തിരിക്കുന്നു. റഷ്യയിലെ സാഹചര്യം ഞങ്ങൾ പരിഹരിക്കുമെന്ന് ഞാൻ കരുതുന്നു. ചരിത്രത്തിൽ ആരും ഇത്രയധികം പരിഹരിച്ചിട്ടില്ലെന്ന് ഞാൻ കരുതുന്നു,"

വൈറ്റ് ഹൗസിലെ ഒരു റിപ്പോർട്ടർ അദ്ദേഹത്തോട് കഴിഞ്ഞ ദിവസം സമാധാന നോബൽ സമ്മാനം നേടാനുള്ള സാധ്യതയെക്കുറിച്ച് ചോദിച്ചപ്പോൾ പ്രതികരിച്ചത് ഇങ്ങനെയായിരുന്നു.

ട്രംപിന് പുറമെ അദ്ദേഹത്തിന്റെ മുൻസുഹൃത്തും ശതകോടീശ്വരനുമായ ഇലോൺ മസ്ക്, മലേഷ്യൻ പ്രധാനമന്ത്രി അൻവർ ഇബ്രാഹി, പാകിസ്ഥാൻ മുൻ പ്രധാനമന്ത്രി ഇമ്രാൻ ഖാൻ തുടങ്ങിയവർ ഊഹങ്ങളിലുണ്ട്.

 ഡിസംബർ 10ന് നോർവേയുടെ തലസ്ഥാനമായ ഓസ്‌ലോയിൽ വച്ചാണ് നൊബേൽ സമ്മാനങ്ങൾ വിതരണം ചെയ്യുക.