റഷ്യ-ഉക്രെയ്ൻ യുദ്ധം; യുഎസിന്റെ സമാധാന ശ്രമങ്ങൾ പരാജയപ്പെട്ടതായി സമ്മതിച്ച് മാർക്കോ റൂബിയോ

മനില : റഷ്യ - ഉക്രെയ്ൻ യുദ്ധം അവസാനിപ്പിക്കുന്നതിനായി ഇരുരാജ്യങ്ങൾക്കും ഒരുപോലെ സ്വീകാര്യമായ സമാധാന നിർദ്ദേശങ്ങൾ കണ്ടെത്തുക തികച്ചും പ്രയാസകരമാണെന്ന് അമേരിക്കൻ വിദേശകാര്യ സെക്രട്ടറി മാർക്കോ റൂബിയോ. ആസിയാൻ ഉച്ചകോടിയുടെ ഭാഗമായി ഫിലിപ്പീൻസിലെ മനിലയിൽ റഷ്യൻ വിദേശകാര്യ മന്ത്രി സെർജി ലാവ്‌റോവുമായി നടത്തിയ കൂടിക്കാഴ്ചയ്ക്ക് ശേഷമാണ് റൂബിയോ ഇക്കാര്യം വ്യക്തമാക്കിയത്.

ഉക്രെയ്ൻ സംഘർഷം അവസാനിപ്പിക്കാൻ ഡൊണാൾഡ് ട്രംപ് ഭരണകൂടം മധ്യസ്ഥത വഹിക്കാൻ സന്നദ്ധമാണെങ്കിലും ഉടൻ തന്നെ ഒരു സമാധാന കരാറിലെത്താൻ സാധിക്കില്ലെന്നും സമഗ്രമായ നയതന്ത്ര ചർച്ചകൾക്ക് പുതിയ നിർദ്ദേശങ്ങൾ ആവശ്യമാണെന്നും റൂബിയോ കൂട്ടിച്ചേർത്തു. നേരത്തെ അമേരിക്കയുടെ നേതൃത്വത്തിൽ നടന്ന സമാധാന ശ്രമങ്ങൾ ഫലപ്രദമായിരുന്നില്ലെന്ന് പരസ്യമായി സമ്മതിച്ച റൂബിയോ ഇരുവിഭാഗത്തിനും ഒരുപോലെ അംഗീകരിക്കാൻ കഴിയുന്ന സമവായ നിലപാടുകൾ കണ്ടെത്താനാണ് ശ്രമിക്കുന്നതെന്ന് വ്യക്തമാക്കി.

ഉക്രെയ്‌ന് പാശ്ചാത്യ രാജ്യങ്ങൾ വൻതോതിൽ ആയുധങ്ങൾ നൽകുന്നതിനെ റഷ്യൻ വിദേശകാര്യ മന്ത്രാലയം കടുത്ത ഭാഷയിൽ എതിർത്തു. ഉക്രെയ്‌ന് ആയുധങ്ങൾ വിതരണം ചെയ്യുന്നത് അംഗീകരിക്കാനാകില്ല. അനാവശ്യ സൈനിക ഇടപെടലുകൾ ഒഴിവാക്കി രാഷ്ട്രീയ-നയതന്ത്ര ചർച്ചകളിലൂടെ വിഷയം പരിഹരിക്കാനാണ് റഷ്യ ആഗ്രഹിക്കുന്നതെന്നും ലാവ്‌റോവ് വ്യക്തമാക്കിയതായി റഷ്യൻ വിദേശകാര്യ മന്ത്രാലയം പ്രസ്താവനയിലൂടെ അറിയിച്ചു.