വെടിനിർ‌ത്തലിന് ശേഷം ​ഗാസയിൽ ഇസ്രയേൽ തകർത്തത് 1500 കെട്ടിടങ്ങൾ

ഗാസ സിറ്റി/ടെൽ അവിവ്‌ : അന്താരാഷ്‌ട്ര സമ്മർദത്തിന്‌ വഴങ്ങി സമാധാന ഉടമ്പടിയിൽ ഒപ്പിട്ടശേഷവും ​ഗാസയിൽ ഇസ്രയേൽ നടത്തിയ ബോംബാക്രമണത്തിന്റെ ഭീകരത വെളിപ്പെടുത്തി റിപ്പോർട്ട്. ഇസ്രയേൽ അധിനിവേശ ​ഗാസയുടെ സാറ്റലൈറ്റ് ചിത്രങ്ങൾ പ്രകാരം ബിബിസി നടത്തിയ അന്വേഷണത്തിൽ 1500ൽ ഏറെ കെട്ടിടങ്ങൾ തകർക്കപ്പെട്ടതായി കണ്ടെത്തി. ഗാസയുടെ സമീപപ്രദേശങ്ങളാകെയും ഇസ്രയേൽ പ്രതിരോധ സേന( ഐഡിഎഫ്) തകർത്തതായും ബിബിസി റിപ്പോർട്ട് ചെയ്തു.

നവംബർ എട്ടിന് എടുത്ത പുതിയ ചിത്രങ്ങളനുസരിച്ച് ഐഡിഎഫ് നിയന്ത്രിക്കുന്ന മുഴുവൻ പ്രദേശങ്ങളും ഒരു മാസത്തിനകം തകർത്തതാണ്. വെടിനിർത്തലിന് മുൻപും ശേഷവുമുള്ള റഡാർ ചിത്രങ്ങൾ വിശകലനം ചെയ്താണ് നാശനഷ്ടങ്ങൾ എണ്ണിക്കണക്കാക്കിയത്. ചില പ്രദേശങ്ങളിലെ ദൃശ്യങ്ങൾ ലഭ്യമല്ലാത്തതിനാൽ കണക്കാക്കുന്നതിലും കൂടുതൽ നാശനഷ്ടങ്ങൾ യഥാർത്ഥത്തിൽ സംഭവിച്ചിരിക്കാമെന്നും ബിബിസി റിപ്പോർട്ട് സൂചിപ്പിക്കുന്നു.

രണ്ട് വർഷം നീണ്ട വംശഹത്യക്ക് ഒടുവിൽ ഒക്ടോബർ പത്തിനാണ് ​ഗാസയിൽ വെടിനിർത്തലിനുള്ള ആദ്യഘട്ടത്തിന് ഇസ്രയേലും പലസ്തീൻ സായുധ പോരാട്ട സംഘടന ഹമാസും ധാരണയായത്.