ലോകത്തെ കരുത്തുറ്റ പാസ്‌പോർട്ട് സിംഗപ്പൂരിന്റേത്; തുടർച്ചയായ മൂന്നാം വർഷവും ഒന്നാമത്

ന്യൂഡൽഹി: ലോകത്തിലെ ഏറ്റവും ശക്തമായ പാസ്‌പോർട്ടുകളുടെ പട്ടികയിൽ സിംഗപ്പൂർ വീണ്ടും ഒന്നാം സ്ഥാനത്ത്. 2026-ലെ ഹെൻലി പാസ്‌പോർട്ട് ഇൻഡക്സ് പ്രകാരം തുടർച്ചയായ മൂന്നാം വർഷമാണ് സിംഗപ്പൂർ ഈ നേട്ടം നിലനിർത്തുന്നത്.

സിംഗപ്പൂർ പാസ്‌പോർട്ട് ഉള്ളവർക്ക് ലോകത്തെ 192 രാജ്യങ്ങളിലേക്ക് മുൻകൂട്ടി വിസയില്ലാതെ പ്രവേശനം സാധ്യമാണ്. അന്താരാഷ്ട്ര വ്യോമ ഗതാഗത സംഘടനയുടെ ഡാറ്റയെ അടിസ്ഥാനമാക്കിയാണ് 199 പാസ്‌പോർട്ടുകളുടെ പട്ടിക തയ്യാറാക്കിയത്.

188 രാജ്യങ്ങളിലേക്ക് വിസ രഹിത പ്രവേശനം അനുവദിക്കുന്ന ജപ്പാനും ദക്ഷിണ കൊറിയയുമാണ് പട്ടികയിൽ രണ്ടാമത്. ശക്തമായ നയതന്ത്ര ബന്ധങ്ങളും ആഗോള തലത്തിലെ സ്ഥിരതയുമാണ് സിംഗപ്പൂരിനെ ഒന്നാമത് എത്തിച്ചത്.

യൂറോപ്പ്, ഏഷ്യ, അമേരിക്കൻ ഭൂഖണ്ഡങ്ങൾ ഉൾപ്പെടെ ലോകത്തെ പ്രധാന വിനോദസഞ്ചാര കേന്ദ്രങ്ങളിലേക്കും ബിസിനസ് ഹബ്ബുകളിലേക്കും സിംഗപ്പൂർ പൗരന്മാർക്ക് അതിരുകളില്ലാതെ യാത്ര ചെയ്യാം.

അതേസമയം, ഇന്ത്യൻ പാസ്‌പോർട്ട് അതിന്റെ സ്ഥാനത്തിൽ മുന്നേറ്റം നടത്തിയിട്ടുണ്ട്. നിലവിൽ 75-ാം സ്ഥാനത്താണ് ഇന്ത്യ. ഇന്ത്യൻ പൗരന്മാർക്ക് നിലവിൽ 62 രാജ്യങ്ങളിലേക്ക് വിസ രഹിത യാത്ര അനുവദിക്കുന്നുണ്ട്. പട്ടികയിൽ ഏറ്റവും പിന്നിൽ അഫ്ഗാനിസ്ഥാനാണ്. 24 രാജ്യങ്ങളിലേക്ക് മാത്രമാണ് അഫ്ഗാൻ പൗരന്മാർക്ക് വിസ രഹിത പ്രവേശനമുള്ളത്.