ന്യൂയോർക്കിൽ വിമാനാപകടം: ഇന്ത്യൻ വംശജയായ ഡോക്ടറും കുടുംബവും കൊല്ലപ്പെട്ടു

ന്യൂയോർക്ക് : ന്യൂയോർക്കിലുണ്ടായ വിമാനാപകടത്തിൽ ഇന്ത്യൻ വംശജയായ ഡോക്ടറും കുടുംബവും കൊല്ലപ്പെട്ടു. ശനിയാഴ്ച ന്യൂയോർക്കിലാണ് സ്വകാര്യ വിമാനം തകർന്നുവീണത്. ആറുപേരാണ് വിമാനത്തിലുണ്ടായിരുന്നത്. കൊല്ലപ്പെട്ടവരിൽ കായികതാരവും ഉൾപ്പെടുന്നു. കാറ്റ്സ്കിൽസിലേക്ക് വിനോദയാത്ര പോവുകയായിരുന്ന കുടുംബം സഞ്ചരിത്ത ഇരട്ട എൻജിൻ മിത്സുബിഷി MU- 2B വിമാനമാണ് കോപാക്കിലെ മഡ്ഡി ഫീൽഡിൽ തകർന്നുവീണത്.

ഇന്ത്യൻ വംശജയായ യൂറോ​ഗെനക്കോളജിസ്റ്റ് ഡോ. ജോയ് സെനി, ഭർത്താവും ന്യൂറോസയന്റിസ്റ്റുമായ ഡോ. മൈക്കിൾ ​ഗ്രോഫ്, മകൾ കരേന ​ഗ്രോഫ്, സുഹൃത്ത് ജെയിംസ് സാന്റോറോ, മകൻ ജേർഡ് ​ഗ്രോഫ്, പങ്കാളി അലക്സിയ എന്നിവരാണ് വിമാനത്തിലുണ്ടായിരുന്നത്. എല്ലാവരും അപകടത്തിൽ കൊല്ലപ്പെട്ടു.

എംഐടി മുൻ സോക്കർ പ്ലേയറും 2022 NACC വുമൺ ഓഫ് ദ ഇയർ പുരസ്കാരവും നേടിയ അത്ലറ്റാണ് കരേൻ. വെസ്റ്റ്ചെസ്റ്റർ കൗണ്ടി എയർപോർട്ടിൽ നിന്നും കൊളംബിയ കൗണ്ടി എയർപോർട്ടിലേക്ക് പുറപ്പെട്ടതായിരുന്നു വിമാനം. നിയന്ത്രണം നഷ്ടപ്പെട്ട വിമാനം ഉയരത്തിൽ നിന്ന് താഴേക്ക് വീഴുന്നതിന്റെ വീഡിയോ ദൃശ്യങ്ങൾ പുറത്തുവന്നു.