നേപ്പാളിൽ വീണ്ടും മിന്നൽ പ്രളയം; 35 ലധികം വീടുകൾ ഒലിച്ചുപോയി

കാഠ്മണ്ഡു : നേപ്പാളിൽ വീണ്ടും മിന്നൽ പ്രളയം. നേപ്പാളിലെ ​ഗോർഖ ജില്ലയില്‍ ഞായറാഴ്ചയുണ്ടായ പ്രളയത്തിൽ 35 ലധികം വീടുകൾ ഒലിച്ചുപോയി. ​ഗോർഖ ജില്ലയിലെ ചുംനുബ്രി ​ഗ്രാമത്തിലാണ് പ്രളയമുണ്ടായത്.

നിരവധി പാലങ്ങൾ ഒലിച്ചുപോവുകയും ജലവൈദ്യുത പദ്ധതിക്ക് കേടുപാടുകളുണ്ടായതായും റിപ്പോർട്ടുകളുണ്ട്. നിരവധി പേരുടെ ജീവനെടുത്ത ആഗസ്തിലെ പ്രളയത്തിന് പിന്നാലെയാണ് വീണ്ടുമൊരു മിന്നൽ പ്രളയമുണ്ടായിരിക്കുന്നത്. ത്രിശൂലി നദിയുടെ കൈവഴിയായ ബുധി ​ഗന്ധകി നദിയിൽ ജലനിരപ്പ് ഉയർന്നതാണ് ​ഗ്രാമത്തിൽ വെള്ളപ്പൊക്കമുണ്ടാകാൻ കാരണമായത്.
പ്രളയത്തിന്‍റെ ദൃശ്യങ്ങള്‍ സോഷ്യല്‍ മീഡിയയില്‍ പ്രചരിക്കുകയാണ്. നദി ചാരനിറത്തിലാകുന്നതും മണ്ണും കല്ലുകളും ഒഴുകിപ്പോകുന്നതും ദൃശ്യങ്ങളില്‍ കാണാം.