കാണികൾ ഖലിസ്ഥാൻ അനുകൂല പതാക വീശി; കൺസേർട്ട് പാതിവഴിയിൽ നിർത്തി ദിൽജിത്ത് ദോസഞ്ജ്

ഒട്ടാവ: കാനഡയിലെ കാൽഗറിയിൽ നടന്ന സംഗീത പരിപാടിക്കിടെ ഖാലിസ്ഥാൻ അനുകൂല പതാകകൾ ഉയർത്തിയവർക്കെതിരെ ശക്തമായ നിലപാടുമായി പഞ്ചാബി ഗായകൻ ദിൽജിത് ദോസഞ്ജ്. തന്റെ 'ഓറ ടൂർ' (Aura Tour) സംഗീത നിശയ്ക്കിടെ കാണികൾക്കിടയിൽ പതാകകൾ ശ്രദ്ധയിൽപ്പെട്ടതിനെ തുടർന്ന് ദിൽജിത് കോൺസേർട്ട് നിർത്തിവെച്ചു.

പ്രകോപനം സൃഷ്ടിച്ചവരോട് ഉടൻ തന്നെ വേദി വിട്ടുപോകാൻ ഗായകൻ ആവശ്യപ്പെട്ടു. ഇവരെ പരിസരത്തുനിന്ന് നീക്കം ചെയ്യാൻ അദ്ദേഹം സംഘാടകർക്ക് നിർദ്ദേശം നൽകുകയും ചെയ്തു. തന്റെ സംഗീത പരിപാടികൾ എപ്പോഴും പഞ്ചാബിനെ പ്രതിനിധീകരിക്കാനാണെന്ന് അദ്ദേഹം വ്യക്തമാക്കി. ദേശീയ മാധ്യമങ്ങൾ പഞ്ചാബിനെ വേണ്ടത്ര പരിഗണിക്കാത്തതിനാലാണ് അന്താരാഷ്ട്ര വേദികളിൽ താൻ തന്റെ സംസ്ഥാനത്തെക്കുറിച്ച് സംസാരിക്കുന്നതെന്ന് ദിൽജിത് കൂട്ടിച്ചേർത്തു.

നേരത്തെ 'കോൻ ബനേഗ ക്രോർപതി' (KBC), 'ജിമ്മി ഫാലൻ ഷോ' തുടങ്ങിയ പരിപാടികളിൽ പങ്കെടുത്തതുമായി ബന്ധപ്പെട്ട് ഉയർന്ന വിമർശനങ്ങളെയും അദ്ദേഹം തള്ളിക്കളഞ്ഞു. ഇവയൊന്നും വ്യക്തിപരമായ പ്രശസ്തിക്കുവേണ്ടിയല്ലെന്നും മറിച്ച് പഞ്ചാബിലെ വിഷയങ്ങളിലേക്ക് ലോകശ്രദ്ധ ആകർഷിക്കാനാണെന്നുമാണ് അദ്ദേഹത്തിന്റെ പക്ഷം. വാൻകൂവറിലെ സംഗീത പരിപാടിക്കിടെ 1914ലെ കൊമാഗത മാരു സംഭവത്തെക്കുറിച്ചും അദ്ദേഹം പരാമർശിച്ചു. പണ്ട് ഇന്ത്യൻ കുടിയേറ്റക്കാർക്ക് പ്രവേശനം നിഷേധിക്കപ്പെട്ട ആ ചരിത്രത്തിൽ നിന്നും വലിയ മാറ്റങ്ങൾ വന്നതിന്റെ സൂചനയാണ് ഇന്നത്തെ ഇത്തരം ജനകീയ ഒത്തുചേരലുകളെന്നും അദ്ദേഹം നിരീക്ഷിച്ചു.

ഇംതിയാസ് അലി സംവിധാനം ചെയ്യുന്ന 'മെയ്ൻ വാപസ് ആവുങ്ക'യാണ് ദിൽജിത്തിന്റെ പുറത്തിറങ്ങാനിരിക്കുന്ന പുതിയ ചിത്രം. ഷർവാരി, വേദാങ് റെയ്‌ന എന്നിവർ പ്രധാന വേഷങ്ങളിലെത്തുന്ന ചിത്രം ജൂൺ 12ന് തീയറ്ററുകളിലെത്തും.