അധികാരത്തിലിരിക്കുമ്പോൾ വിവാഹം ചെയ്യുന്ന ആദ്യ ഓസ്ട്രേലിയൻ പ്രധാനമന്ത്രിയായി ആന്റണി അൽബനീസ്

മെൽബൺ: ഓസ്‌ട്രേലിയൻ പ്രധാനമന്ത്രി ആന്റണി അൽബനീസ് പങ്കാളി ജോഡി ഹെയ്‌ഡനെ വിവാഹം ചെയ്തു. ശനിയാഴ്ച ഔദ്യോഗിക വസതിയിൽ നടന്ന ഒരു സ്വകാര്യ ചടങ്ങിലായിരുന്നു വിവാഹം. 124 വർഷത്തിനിടെ അധികാരത്തിലിരിക്കുമ്പോൾ വിവാഹം ചെയ്യുന്ന ആദ്യ ഓസ്ട്രേലിയൻ നേതാവാണ് ആന്റണി അൽബനീസ്. ഓസ്‌ട്രേലിയൻ പാർലമെന്റ് ഈ വർഷത്തേക്ക് ചേർന്ന് പിരിച്ചുവിട്ട് രണ്ട് ദിവസത്തിന് ശേഷമാണ് കാൻബറയിലെ ദി ലോഡ്ജിൽ ചടങ്ങ് നടന്നത്. കുടുംബാംഗങ്ങളും കാബിനറ്റ് മന്ത്രിമാരും ഉൾപ്പെടെ ഏകദേശം 60 അടുത്ത കുടുംബാംഗങ്ങളും സുഹൃത്തുക്കളും പങ്കെടുത്തു.

കഴിഞ്ഞ വർഷത്തെ വാലന്റൈൻസ് ദിനത്തിലാണ് 61കാരനായ ആന്റണി 45 കാരിയായ ഹെയ്ഡണിനോട് വിവാഹാഭ്യർഥന നടത്തിയത്. 2025 ൽ മാത്രമേ വിവാഹം നടക്കൂ എന്ന് അൽബനീസ് മുമ്പ് സൂചന നൽകിയിരുന്നു. ധനകാര്യ പ്രൊഫഷണലായ ഹെയ്‌ഡൺ 2020 ൽ മെൽബണിൽ നടന്ന ഒരു ബിസിനസ് പരിപാടിയിൽ വെച്ചാണ് ആദ്യമായി അൽബനീസിനെ പരിചയപ്പെടുന്നത്. ആദ്യം വിപുലമായ വിവാഹ ചടങ്ങുകൾ നിശ്ചയിച്ചിരുന്നെങ്കിലും നയതന്ത്രഞ്ജരുടെ നിർദേശ പ്രകാരം ലളിതവും സ്വകാര്യവുമായി നടത്തുകയായിരുന്നു. അൽബനീസിന് മുൻ വിവാഹത്തിൽ ഒരു മകനുണ്ട്. ഹെയ്‌ഡന്റെ അഞ്ച് വയസ്സുള്ള മരുമകൾ വിവാഹ ചടങ്ങിൽ ഫ്ലവർ ​ഗേളായി പങ്കെടുത്തു.