ആശുപത്രിയിലെ എസി കംപ്രസർ പൊട്ടിത്തെറിച്ച് അപകടം; പാകിസ്ഥാനിൽ 15 നവജാതശിശുക്കൾ വെന്തുമരിച്ചു

ഇസ്ലാമാബാദ് : പാകിസ്ഥാനിലെ സർക്കാർ ആശുപത്രിയിൽ എസി കംപ്രസർ പൊട്ടിത്തെറിച്ച് 15 വനജാതശിശുക്കൾ മരിച്ചു. ഇസ്ലാമാബാദിലെ പാകിസ്ഥാൻ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസ്(PIMS) ആശുപത്രിയിലെ ​ഗൈനക്കോളജി വാർഡിലാണ് തീപ്പിടിത്തമുണ്ടായത്. ബുധനാഴ്ച രാവിലെയാണ് സംഭവം.

പതിനാറ് നവജാതശിശുക്കളായിരുന്നു വാർഡിലുണ്ടായിരുന്നത്. ഒരു കുഞ്ഞിനെ മാത്രമാണ് രക്ഷപ്പെടുത്താൻ കഴിഞ്ഞതെന്ന് അധികൃതർ അറിയിച്ചു. ആശുപത്രിയുടെ മൂന്നാം നിലയിലാണ് തീപിടിത്തമുണ്ടായത്. കെട്ടിടത്തിലെ ചില്ലുകൾ പൊട്ടിച്ചാണ് അ​ഗ്നിരക്ഷാസേന അകത്തുകടന്നത്. നിലവിൽ തീയണച്ചതായാണ് റിപ്പോർട്ടുകൾ. ദുരന്തത്തിൽ പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ് ഖേദം പ്രകടിപ്പിച്ചു. സംഭവത്തിൽ വിശദമായ അന്വേഷണം നടത്താൻ അധികൃതർക്ക് നിർദേശം നൽകിയതായും ഷെഹ്ബാസ് ഷെരീഫ് പറഞ്ഞു.