കുവൈത്തിലെ മിന അൽ-അഹ്മദി റിഫൈനറിക്ക് നേരെ ഡ്രോൺ ആക്രമണം

കുവൈത്ത് സിറ്റി: കുവൈത്തിലെ ഏറ്റവും വലിയ എണ്ണ ശുദ്ധീകരണ സമുച്ചയങ്ങളിലൊന്നായ മിന അൽ-അഹ്മദി റിഫൈനറിക്ക് നേരെ ഡ്രോൺ ആക്രമണം. അന്താരാഷ്ട്ര വാർത്താ ഏജൻസിയായ റോയിട്ടേഴ്സ് റിപ്പോർട്ട് ചെയ്തതനുസരിച്ച്, ഡ്രോൺ റിഫൈനറിയിലേക്ക് ഇടിച്ചു കയറിയതിനെത്തുടർന്ന് പ്ലാന്റിലെ വിവിധ പ്രവർത്തന യൂണിറ്റുകളിൽ വൻ തീപിടിത്തമുണ്ടായി. ആക്രമണം നടന്ന ഉടൻ തന്നെ അധികൃതർ ജാഗ്രതാ നിർദ്ദേശം നൽകുകയും സുരക്ഷാ നടപടികൾ ശക്തമാക്കുകയും ചെയ്തു.

സംഭവം നടന്ന ഉടൻ തന്നെ കുവൈത്ത് പെട്രോളിയം കോർപ്പറേഷന്റെ (KPC) കീഴിലുള്ള അഗ്നിശമന സേനയും എമർജൻസി ടീമുകളും സ്ഥലത്തെത്തി തീ നിയന്ത്രണവിധേയമാക്കാൻ ശ്രമങ്ങൾ ആരംഭിച്ചു.ആക്രമണത്തിൽ പ്ലാന്റിന് നാശനഷ്ടങ്ങൾ സംഭവിച്ചിട്ടുണ്ടെങ്കിലും ആർക്കും പരിക്കേറ്റതായി ഇതുവരെ റിപ്പോർട്ടുകളില്ല. തൊഴിലാളികളുടെ സുരക്ഷ ഉറപ്പാക്കുന്നതിനായി റിഫൈനറിയിൽ പ്രത്യേക മുൻകരുതലുകൾ സ്വീകരിച്ചിട്ടുണ്ടെന്ന് അധികൃതർ അറിയിച്ചു.

കുവൈത്തിന്റെ സാമ്പത്തിക വ്യവസ്ഥയിലും ഊർജ്ജ കയറ്റുമതിയിലും അതീവ പ്രാധാന്യമുള്ള കേന്ദ്രമാണ് മിന അൽ-അഹ്മദി റിഫൈനറി. രാജ്യത്തെ ഏറ്റവും വലിയ എണ്ണ സംസ്കരണ ശാലയായതിനാൽ തന്നെ ഇത്തരമൊരു ആക്രമണം ആഗോള എണ്ണ വിപണിയെയും രാജ്യത്തിന്റെ ഉൽപ്പാദന ശേഷിയെയും എങ്ങനെ ബാധിക്കുമെന്ന ആശങ്ക ഉയർത്തുന്നുണ്ട്.