​ഗുവാഹത്തി മെഡിക്കൽ കോളേജ് ആശുപത്രിയിലെ ഡോക്ടർക്കെതിരെ ലൈം​ഗികാരോപണം

ഡിസ്പുർ: ​ഗുവാഹത്തി മെഡിക്കൽ കോളേജ് ആശുപത്രിയിലെ ഡോക്ടർക്കെതിരെ ലൈം​ഗികാരോപണ പരാതിയുമായി യുവതി. പരിശോധനയുടെ മറവിൽ ലൈം​ഗികാതിക്രമം നടത്തിയെന്നാണ് യുവതിയുടെ ആരോപണം. ഡോ. ഋഷികേശിനെതിരെയാണ് പരാതി ഉയർന്നത്. പ്രതിശ്രുത വരന്റെ മെഡിക്കൽ റിപ്പോർട്ടുകൾ കാണിക്കുന്നതിനായാണ് യുവതി ആശുപത്രിയിലെത്തിയത്.

മെഡിക്കൽ പരിശോധനയ്ക്കിടെ ഡോക്ടർ ലൈം​ഗികമായി സ്പർശിക്കുകയായിരുന്നുവെന്ന് യുവതി ആരോപിച്ചു. ആശുപത്രിയിൽ ഒപ്പമുണ്ടായിരുന്ന ബന്ധുവിനെ പരിശോധനാമുറിയിൽ നിന്നും പുറത്തുപോകാൻ ഡോക്ടർ ആവശ്യപ്പെട്ടു. ശേഷം താനും സുഹൃത്തുമായുള്ള ബന്ധത്തെ കുറിച്ചും ലൈം​ഗികമായി സംസാരിക്കുകയും ചെയ്തതായി യുവതി പറഞ്ഞു.

മെഡിക്കൽ റിപ്പോർട്ട് പരിശോധിച്ച ശേഷം തന്നെ പരിശോധിക്കണമെന്നു പറഞ്ഞുകൊണ്ട് ശരീരത്തിൽ അനാവശ്യമായി സ്പർശിക്കുകയായിരുന്നുവെന്ന് യുവതി ആരോപിച്ചു. സ്വകാര്യഭാ​ഗങ്ങളിലും സ്പർശിക്കാൻ ശ്രമം നടത്തിയതായും യുവതി വെളിപ്പെടുത്തി. സംഭവത്തിൽ ഡോക്ടർക്കെതിരെ യുവതി പൊലീസിൽ പരാതി നൽകി. ഇതിന്റെ അടിസ്ഥാനത്തിൽ പൊലീസ് അന്വേഷണം ആരംഭിച്ചു.