സുപ്രീം കോടതിയിൽ പറഞ്ഞത് വ്യാജം; ഡൽഹിയെ ശ്വാസം മുട്ടിക്കുന്നതിൽ മുന്നിൽ ഉത്തർപ്രദേശ്

ന്യൂഡൽഹി: ഡൽഹിയെ ശ്വാസം മുട്ടിക്കുന്ന വായുമലിനീകരണത്തിന് മുഖ്യകാരണമായ വൈക്കോൽ കത്തിക്കലിൽ തങ്ങൾ ഗണ്യമായ കുറവ് വരുത്തിയതായി അവകാശപ്പെട്ട് ഉത്തർ പ്രദേശ് സർക്കാർ സുപ്രീം കോടതിയിൽ നൽകിയ കണക്കുകൾ വ്യാജമെന്ന് റിപ്പോർട്. കേന്ദ്ര സർക്കാരിന്റെ തന്നെ സ്വന്തം ഉപഗ്രഹ തീപിടുത്ത ഡാറ്റയ്ക്ക് തികച്ചും വിരുദ്ധമായ വിവരങ്ങളാണ് കെട്ടിച്ചമച്ച് നൽകിയത്.

2025 നവംബർ 23 വരെയുള്ള ഇന്ത്യൻ കൌൺസിൽ ഓഫ് അഗ്രികൾച്ചർ റിസർച്ച്  (ICAR–IAR- CREAMS) പുറത്തിറക്കിയ തീപിടുത്ത ബുള്ളറ്റിനുകൾക്ക് തികച്ചും വിരുദ്ധമാണ് യു പി സർക്കാർ നൽകിയ കണക്കുകൾ. ഉത്തർപ്രദേശിലെ നെല്ല് അവശിഷ്ട തീകത്തിക്കൽ ആറ് വർഷത്തിനിടയിലെ ഏറ്റവും ഉയർന്ന നിലയിലാണ് എന്നാണ് കേന്ദ്ര സർക്കാരിന്റെ ഡാറ്റകൾ വെളിപ്പെടുത്തുന്നത്.

പഞ്ചാബും ഹരിയാനയും നിയന്ത്രണങ്ങൾ സാധ്യമാക്കിയപ്പോൾ അതിന്റെ ഫലങ്ങൾ ഡൽഹിയിലെ അന്തരീക്ഷ വായുവിൽ കാണാതിരുന്നത് ഉത്തർ പ്രദേശിൽ നിന്നുള്ള മലിനീകരണം കുത്തനെ വർധിച്ചതാണ്.

ദേശീയ തലസ്ഥാനമായ ഡൽഹിയെ ശ്വസം മുട്ടിക്കുന്നതിന് മുഖ്യ കാരണമായ വൈക്കോൽ കത്തിക്കൽ നിയന്ത്രിക്കാൻ സുപ്രീം കോടതി നേരിട്ട് ഇടപെട്ടിരുന്നു. അയൽ സംസ്ഥാനങ്ങൾക്ക് കർശന നിർദ്ദേശം നൽകി. നിയന്ത്രണ നടപടികളുടെ പുരോഗതി അറിയിക്കാനും ഉത്തരവിട്ടു.

 "ശ്രദ്ധേയമായ കുറവ്" വരുത്തി എന്ന് കാണിച്ചാണ് യോഗി ആദിത്യനാഥ് സർക്കാർ സുപ്രീം കോടതിയിൽ റിപ്പോർട് നൽകിയത്.  ഇവയിൽ തന്നെ ഏറ്റവും കുറവ് വരുത്തിയാതായി കാണിച്ച 20 ജില്ലകളിൽ വാസ്തവത്തിൽ കുത്തനെ വർധനവാണ് ഉണ്ടായത്.

കുറവ് വരുത്തിയ 20 ജില്ലകളിൽ "ഏറ്റവും കുറഞ്ഞ" സംഭവങ്ങൾ ഉള്ളതായി എടുത്തുകാണിച്ച നാല് ജില്ലകൾ - ഇറ്റാ, കൗഷാമ്പി, സീതാപൂർ, ഉന്നാവോ എന്നിവയാണ്. എന്നാൽ  ഏറ്റവും താഴ്ന്ന നിലയുടെ അടുത്ത് പോലും ഈ പ്രദേശങ്ങൾ വരുന്നില്ല. 

എൻ‌സിഇ‌ആർ ചർച്ചകൾ നടക്കുമ്പോൾ ഡൽഹി മലിനീകരണത്തിന് കാരണക്കാരായി തങ്ങളെ കുറ്റപ്പെടുത്തുന്നതിൽ എതിർപ്പ് പ്രകടിപ്പിക്കാറുള്ള പഞ്ചാബും ഹരിയാനയും മികച്ച നിയതന്ത്രണങ്ങൾ കൈവരിച്ചിട്ടുണ്ട്.  ഐസിഎ‌എ‌ആർ ഡാറ്റാസെറ്റിൽ തന്നെ ഇവരുടെ മലിനീകരണ തോത് 2021 ലെ നിലവാരത്തിന്റെ പത്തിലൊന്നിൽ താഴെയായി കാണിക്കുന്നു. കുറ്റപ്പെടുത്തലുകളെ പ്രതിരോധിച്ചപ്പോഴും അവർ പ്രായോഗിക നടപടകൾ സ്വീകരിച്ച് മുന്നേറി.

സാധാരണ മനുഷ്യരാണ് ഡൽഹിയിലെ മലിനീകരണത്തിന്റെ ഏറ്റവും വലിയ ഇരകൾ. ഉന്നതരും സമ്പന്നരും എയർ പ്യൂരിഫയർ പോലുള്ള ചെലവ് കൂടിയ സംവിധാനങ്ങളാൽ വീടും ജോലി സ്ഥലങ്ങളും യാത്രയും എല്ലാം സുരക്ഷിതമാക്കുന്നു. ഡൽഹി ഭരണകൂടം തന്നെയും മലിനീകരണ തോത് വിസ്മരിച്ചു. കൃത്രിമ മഴ നാടകമായി അവസാനിച്ചു.

കോടതി മുമ്പാകെ പറഞ്ഞതിന് വിരുദ്ധമായി ഉത്തർപ്രദേശിലും രാജസ്ഥാനിലും തീപിടുത്തങ്ങൾ വർദ്ധിക്കയാണ് ഉണ്ടായിട്ടുള്ളത്. ഡൽഹിയെ അപകടപ്പെടുത്താൻ എന്ന വണ്ണം മലനീകരണം കൂടുതലായി വരുന്നു. അതേ സമയം തെറ്റായ അവകാശ വാദങ്ങളിലൂടെ വസ്തുതകൾ തെറ്റായി അവതരിപ്പിക്കയും ചെയ്യുന്നു.

മുഖ്യമന്ത്രി ആദിത്യനാഥിന്റെ കർശന നിർദ്ദേശങ്ങൾ, തത്സമയ നിരീക്ഷണം, പിഴകൾ, ജില്ലാതല നിയന്ത്രണങ്ങൾ എന്നിവ വഴി സംസ്ഥാനത്ത് വൈക്കോൽ കത്തിക്കൽ കേസുകൾ "ഗണ്യമായ കുറവ്" ഉണ്ടാക്കി എന്നാണ് യുപി സർക്കാർ സുപ്രീം കോടതിയെ അറിയിച്ചത്.

മഥുര, പിലിഭിത്ത്, സഹാറൻപൂർ, ബരാബങ്കി, ലഖിംപൂർ ഖേരി, കൗഷാമ്പി, എറ്റാ, ഹർദോയ്, ജലൗൺ, ഫത്തേപൂർ, മഹാരാജ്ഗഞ്ച്, കാൺപൂർ ദേഹത്ത്, ജാനി, മെയിൻപുരി, ബഹ്‌റൈച്ച്, എറ്റാവ, ഗോരഖ്പൂർ, അലിഗഡ്, ഉന്നാവോ, സീതാപൂർ എന്നീ 20 ജില്ലകളെ സംസ്ഥാനം ഇതിൽ മാതൃകയായ എടുത്തുകാണിച്ചു. ഇവയിൽ തന്നെ എറ്റ, കൗഷാമ്പി, സീതാപൂർ, ഉന്നാവോ എന്നിവിടങ്ങളിൽ വൈക്കോൽ കത്തിക്കൽ ഏറ്റവും കുറഞ്ഞ സംഭവങ്ങൾ രേഖപ്പെടുത്തി എന്നും അവകാശപ്പെട്ടു.

കണക്കുകളും കളവും യാഥാർത്ഥ്യവും

പഞ്ചാബ് വിമർശനങ്ങളെ പ്രതിരോധിക്കുമ്പോഴും പരിഹാര നടപടികൾ കർശനമാക്കി. 2021-ൽ 71,181 സംഭവങ്ങളിൽ നിന്ന് 2025-ൽ വെറും 5,088 ആയി കുറച്ചു, 92%-ൽ അധികം കുറവ് നേടാൻ അവർക്കായി.

ഹരിയാന 2021-ൽ 6,792 തീപിടുത്തങ്ങളിൽ നിന്ന് 2025-ൽ 617 ആയി, 90%-ൽ അധികം കുറവ് ഉണ്ടാക്കാനായി.

ഉത്തർപ്രദേശിൽ, തീപിടുത്തങ്ങൾ 3,376 (2021) ൽ നിന്ന് 5,622 (2025) ആയി ഉയർന്നു. ഇത് 66.5% കൂടുതലാണ്, 2024 നെ അപേക്ഷിച്ച് 30.8% കൂടുതലാണ്. കാർഷിക ഗവേഷണ കൌണിസിലിന്റെ ഡാറ്റ (ICAR-IARI’s CREAMS (Consortium for Research on Agro-ecosystem Monitoring and Modelling from Space) bulletins (up to 23 November 2025) പ്രകാരമാണിത്.

യുപിക്ക് പുറമെ ബിജെപി ഭരിക്കുന്ന ഡൽഹിയുടെ മറ്റൊരു അയൽ സംസ്ഥാനമായ രാജസ്ഥാനിൽ, 2021 ലെതിനേക്കാൾ ഇരട്ടിയിലധികം തീപിടുത്തങ്ങൾ ഉണ്ടായിട്ടുണ്ട്.

പഞ്ചാബ് + ഹരിയാന + യുപി + രാജസ്ഥാൻ എന്നിവിടങ്ങളിൽ, 2025 ലെ മൊത്തം തീപിടുത്തങ്ങൾ 14,131 ആണ്. ഇതിൽ യുപി 40 ശതമാനം പങ്കുവഹിച്ചു. പഞ്ചാബ് 36 ശതമാനവും ഹരിയാൻ അഞ്ച് ശതമാനവും. 

കേന്ദ്ര സർക്കാരിന്റെ സ്വന്തം ഉപഗ്രഹ രേഖ പ്രകാരം സെപ്റ്റംബർ 15 മുതൽ നവംബർ 23 വരെയുള്ള കാലയളവിൽ ഡൽഹി പരിസരത്ത് നെൽവയൽ അവശിഷ്ട തീപിടുത്തത്തിന്റെ ഏറ്റവും വലിയ ഏക സ്രോതസ്സ് പഞ്ചാബോ ഹരിയാനയോ അല്ല ഉത്തർപ്രദേശാണ്.

പഞ്ചാബും ഹരിയാനയും വൈക്കോൽ കത്തിക്കൽ കുത്തനെ വെട്ടിക്കുറച്ചതോടെ ഡൽഹിക്കു മേലുള്ള മാലിന്യ പ്രശ്നം കുറയേണ്ടതായിരുന്നു. വപരീത ഫലം ചെയ്തതിന്റെ കാരണം ഉത്തർ പ്രദേശാണ്. മറ്റ് ഇരു സംസ്ഥാനങ്ങളിലും കുറഞ്ഞതിനെക്കാൾ യുപിയിൽ വർധിച്ചു.