'വിറോഷി'ന് പ്രണയസാഫല്യം; വിജയ്‍യും രശ്മികയും വിവാഹിതരായി

ഉദയ്പൂർ: ഗോസിപ്പുകൾക്കും ആരാധകരുടെ നീണ്ട കാത്തിരിപ്പിനും വിരാമമിട്ട് തെന്നിന്ത്യൻ പ്രിയജോഡികളായ വിജയ് ദേവരകൊണ്ടയും രശ്മിക മന്ദാനയും വിവാഹിതരായി. രാജസ്ഥാനിലെ ഉദയ്പൂരിലുള്ള ഐടിസി മെമെന്റോസ് റിസോർട്ടിൽ വെച്ച് ഇന്ന് രാവിലെ പത്തു മണിയോടെയാണ് ആരാധകർ സ്നേഹത്തോടെ 'വിറോഷ്' എന്ന് വിളിക്കുന്ന പ്രിയതാരങ്ങൾ ഒന്നായത്. 'ഗീത ഗോവിന്ദം', 'ഡിയർ കോമ്രേഡ്' എന്നീ ചിത്രങ്ങളിലൂടെ വെള്ളിത്തിരയിൽ വിരിഞ്ഞ പ്രണയം ഏഴ് വർഷത്തെ രഹസ്യജീവിതത്തിന് ശേഷമാണ് വിവാഹപ്പന്തലിലെത്തിയത്.

അതീവ സുരക്ഷാ വലയത്തിൽ നടന്ന ചടങ്ങുകൾ തികച്ചും സ്വകാര്യമായിരുന്നു. അടുത്ത ബന്ധുക്കളും സുഹൃത്തുക്കളും ഉൾപ്പെടെ 230 പേർ മാത്രമാണ് വിവാഹത്തിന് സാക്ഷ്യം വഹിച്ചത്. ഇന്ന് രാവിലെ വിജയ് ദേവരകൊണ്ടയുടെ കുടുംബ പാരമ്പര്യമനുസരിച്ചുള്ള തെലുങ്ക് രീതിയിലുള്ള വിവാഹമാണ് നടന്നത്. വൈകുന്നേരത്തോടുകൂടി രശ്മികയുടെ പാരമ്പര്യമനുസരിച്ചുള്ള 'കൊടവ' ചടങ്ങുകളും നടക്കും.

ആഡംബരത്തേക്കാൾ ഉപരിയായി പ്രകൃതിയോട് ചേർന്നുനിൽക്കുന്ന 'മിനിമലിസ്റ്റിക് ബോഹോ' തീമിലാണ് വിവാഹവേദി ഒരുക്കിയിരുന്നത്. മൃഗസ്നേഹികളായ താരങ്ങൾ തങ്ങളുടെ പ്രിയപ്പെട്ട നായക്കുട്ടികളെയും അലങ്കാരങ്ങളുടെ ഭാഗമാക്കിയിരുന്നു. വിവാഹത്തിന് മുന്നോടിയായി നടന്ന വിനോദപരിപാടികൾക്ക് 'വിറോഷ് പ്രീമിയർ ലീഗ്' എന്ന പേരാണ് നൽകിയിരുന്നത്.

വിവാഹ ചിത്രങ്ങൾ പുറത്താകാതിരിക്കാൻ മൊബൈൽ ഫോണുകൾക്കും ക്യാമറകൾക്കും കർശന വിലക്ക് ഏർപ്പെടുത്തിയിട്ടുണ്ട്. തങ്ങളുടെ പ്രണയം ഇത്രയും കാലം പിന്തുണച്ച ആരാധകർക്ക് നന്ദി അറിയിച്ചുകൊണ്ടാണ് 'വിറോഷ്' ദമ്പതികൾ വിവാഹ ജീവിതത്തിലേക്ക് കാലെടുത്തു വെക്കുന്നത്. താരങ്ങളുടെ വിവാഹചിത്രങ്ങൾക്കായി കാത്തിരിക്കുകയാണ് സോഷ്യൽ മീഡിയ.