ഉദ്ദംപൂരിൽ സൈനികവാ​ഹനം കൊക്കയിലേക്ക് മറിഞ്ഞ് മൂന്ന് സൈനികർ കൊല്ലപ്പെട്ടു; നിരവധി പേർക്ക് പരിക്ക്

ശ്രീന​ഗർ : ജമ്മു കശ്മീരിലെ ഉദംപൂർ ജില്ലയിൽ സൈനികവാ​ഹനം കൊക്കയിലേക്ക് മറിഞ്ഞ് സെൻട്രൽ റിസർവ് പൊലീസ് സേനയിലെ മൂന്ന് സൈനികർ കൊല്ലപ്പെട്ടു. നിരവധി പേർക്ക് പരിക്കേറ്റു. വ്യാഴാഴ്ചയാണ് സംഭവം. കാണ്ട്വ-ബസന്ത്ഗഡ് റോഡിൽ സഞ്ചരിക്കുകയായിരുന്ന വാഹനം റോഡിൽ നിന്ന് തെന്നിമാറി ആഴത്തിലുള്ള കൊക്കയിലേക്ക് മറിയുകയായിരുന്നു.

പൊലീസും നാട്ടുകാരും ഉടൻ തന്നെ രക്ഷാപ്രവർത്തനം ആരംഭിക്കുകയും പരിക്കേറ്റവരെ ചികിത്സയ്ക്കായി അടുത്തുള്ള ആശുപത്രിയിലേക്ക് മാറ്റുകയും ചെയ്തു. സേനയുടെ 187-ാം ബറ്റാലിയന്റെ വാഹനമാണ് അപകടത്തിൽപ്പെട്ടതെന്ന് മാധ്യമങ്ങൾ റിപ്പോർട്ട് ചെയ്തു. വാഹനത്തിൽ 23 പേരാണ് ഉണ്ടായിരുന്നത്. രണ്ട് പേർ സംഭവസ്ഥലത്ത് വെച്ച് തന്നെ മരിച്ചു. 16 പേർക്ക് പരിക്കേറ്റു. ഇവരെ ആശുപത്രിയിൽ പ്രവേശിപ്പിച്ചെങ്കിലും ചികിത്സയിലിരിക്കെ ഒരാൾ കൂടി മരിച്ചു. ഇതോടെ മരണസംഖ്യ മൂന്നായി.