തമിഴ്നാട്ടിലെ കാലാവസ്ഥാ അറിയിപ്പിലും ഹിന്ദി; ത്രിഭാഷാനയ പ്രതിഷേധത്തിനിടയിൽ പുതിയ നീക്കവുമായി കേന്ദ്രം

ചെന്നൈ: ത്രിഭാഷാനയ പോര് മുറുകുന്നതിനിടയിൽ വീണ്ടും ഹിന്ദി അടിച്ചേൽപ്പിക്കാൻ കേന്ദ്ര നീക്കം. തമിഴ്നാട്ടിലെ കാലാവസ്ഥാ കേന്ദ്രത്തിൽ നിന്നും ഇനി മുതൽ ഹിന്ദിയിലും അറിയിപ്പുകൾ നൽകും. തമിഴിലും ഇം​ഗ്ലീഷിലും മാത്രമായിരുന്നു നേരത്തെ അറിയിപ്പുകൾ നൽകിയിരുന്നത്.

ദക്ഷിണേന്ത്യയിൽ കേരളത്തിലെയും ആന്ധ്രയിലെയും കാലാവസ്ഥാ കേന്ദ്രങ്ങളിൽ ഇംഗ്ലീഷിലും പ്രാദേശിക ഭാഷയിലും അറിയിപ്പുകൾ നൽകുമ്പോൾ ഇവയ്ക്ക് പുറമെ ഹിന്ദിയിലും അറിയിപ്പ് നൽകുന്നത് തമിഴ്നാട്ടിൽ മാത്രമാണ്. ഹിന്ദി അടിച്ചേൽപ്പിക്കുന്ന കേന്ദ്ര നയത്തിനെതിരെ തമിഴ്നാട് പോരാട്ടം ശക്തമാക്കുന്ന സാഹചര്യത്തിലാണ് പുതിയ നീക്കം.

ചെന്നൈ കാലാവസ്ഥാ നിരീക്ഷണ കേന്ദ്രത്തിൻ്റെ വിജ്ഞാപനത്തിൽ ഹിന്ദി ഭാഷ കൂടി ചേർക്കാൻ ഇന്ത്യൻ കാലാവസ്ഥാ വകുപ്പ് ഉദ്യോഗസ്ഥർ നിർദ്ദേശിച്ചിട്ടുണ്ട്. അധികൃതരുടെ നിർദ്ദേശപ്രകാരമാണ് ഈ മാറ്റങ്ങൾ നടപ്പിലാക്കിയത്. ഹിന്ദിയിൽ മുന്നറിയിപ്പുകൾ പ്രസിദ്ധീകരിക്കാൻ ചെന്നൈ കേന്ദ്രത്തിൽ ഒരു വിവർത്തകനെയും നിയമിച്ചിട്ടുള്ളതായി ചെന്നൈ കാലാവസ്ഥാ നിരീക്ഷണ കേന്ദ്രം മേധാവി അമുദ പറഞ്ഞു.

ദ്വിഭാഷാ നയം സംബന്ധിച്ച് തമിഴ്‌നാടും കേന്ദ്രവുമായി തർക്കം നിലനിൽക്കെയാണ് ചെന്നൈ കാലാവസ്ഥാ നിരീക്ഷണ കേന്ദ്രത്തിൽ നിന്നുള്ള കാലാവസ്ഥ മുന്നറിയിപ്പുകളിൽ ഹിന്ദി ഭാഷയും ഉൾപ്പെടുത്തിയിരിക്കുന്നത്. ചെന്നൈ കാലാവസ്ഥാ വകുപ്പിൻ്റെ വെബ്‌സൈറ്റിൽ ഹിന്ദി ഭാഷയും ചേർത്തിട്ടുണ്ട്.