print edition ഓൺലൈൻ അശ്ലീലം ; ആധാർ പരിശോധന നടപ്പാക്കിക്കൂടേയെന്ന്‌ സുപ്രീംകോടതി

ന്യൂഡൽഹി

അശ്ലീല ഉള്ളടക്കമുള്ള വെബ്‌സൈറ്റുകളിൽ ഉപയോക്താവിന്റെ പ്രായം കൃത്യമായി സ്ഥിരീകരിക്കാന്‍ ആധാര്‍ അധിഷ്‌ഠിത പരിശോധനാ സംവിധാനം ഉപയോഗിക്കുന്നതിന്റെ സാധ്യതകൾ കേന്ദ്രസര്‍ക്കാരിനോട് ആരാഞ്ഞ് സുപ്രീംകോടതി. കുട്ടികളടക്കം ഓൺലൈനിലെ അശ്ലീല ഉള്ളടക്കങ്ങളിലേക്ക് വലിച്ചിഴക്കപ്പെടുന്ന സാഹചര്യത്തിലാണ് പരിശോധനാ സംവിധാനം കര്‍ശനമാക്കണമെന്ന നിര്‍ദേശം. ഭിന്നശേഷിയുള്ളവരെ അപമാനിക്കുംവിധം പോഡ്‌കാസ്റ്റുകൾ നടത്തിയ കൊമേഡിയന്മാർക്കെതിരായ ഹർജി പരിഗണിക്കവേയാണ്‌ ചീഫ്‌ ജസ്റ്റിസ്‌ സൂര്യകാന്ത്‌, ജസ്റ്റിസ്‌ ജോയ്‌മാല്യ ബാഗ്‌ചി എന്നിവരുടെ ബെഞ്ചിന്റെ പ്രതികരണം.

നിലവിൽ ഉള്ളടക്കം തുടങ്ങുംമുൻപ് മുന്നറിയിപ്പ് നൽകാറുണ്ട്. എന്നാൽ, ഈ മുന്നറിയിപ്പ് നൽകുന്ന സമയത്തിൽ തന്നെ ഉപയോക്താവ് കാണാനുദ്ദേശിക്കാത്ത ഉള്ളടക്കം ദൃശ്യമാകും. അശ്ലീല ഉള്ളടക്കങ്ങള്‍ കുട്ടികളില്‍ എത്തുന്നത് തടയാന്‍ രാജ്യത്ത് നിലവിലുള്ള സംവിധാനങ്ങൾ അപര്യാപ്തമാണ്‌. ഉപയോക്താവിന്റെ പ്രായം ഉറപ്പാക്കാൻ കൂടുതൽ വിശ്വസനീയമായ മാർഗങ്ങൾ ആവശ്യമാണ്‌– കോടതി നിരീക്ഷിച്ചു.

ഇക്കാര്യത്തില്‍ നിയമനിർമാണം കേന്ദ്രം ആലോചിക്കുന്നുണ്ടെന്ന്‌ സോളിസിറ്റർ ജനറൽ തുഷാർ മേത്ത പ്രതികരിച്ചു. സാമൂഹ്യ മാധ്യമങ്ങളിൽ വ്യക്തികളുടെ അന്തസ്സ് ഹനിക്കുന്ന ഉള്ളടക്കം നല്‍കുന്നവര്‍ക്കെതിരെ പട്ടികജാതി പട്ടികവര്‍ഗ നിയമത്തിന്റെ മാതൃകയിൽ കർശന നിയമം കൊണ്ടുവരുന്നതിനെക്കുറിച്ച് ആലോചിക്കണമെന്നും കോടതി കേന്ദ്രത്തോട് നിര്‍ദേശിച്ചു.