print edition സുപ്രീംകോടതി പരിഗണിക്കുന്ന 
7 ഭരണഘടനാചോദ്യങ്ങൾ

ന്യൂഡൽഹി

ശബരിമല പുനഃപരിശോധനാ ഹർജികൾ പരിഗണിക്കുംമുന്പ്‌ ഏഴ്‌ ഭരണഘടനാചോദ്യങ്ങൾക്ക്‌ മറുപടി ലഭിക്കേണ്ടതുണ്ടെന്നും അത്‌ വിശാല ബെഞ്ചിലേയ്‌ക്ക്‌ വിടണമെന്നും 2019 നവംബറിലാണ്‌ അന്നത്തെ ചീഫ്‌ ജസ്‌റ്റിസ്‌ രഞ്ജൻ ഗോഗോയ്‌യുടെ അഞ്ചംഗ ബെഞ്ച്‌ ഭൂരിപക്ഷ വിധി പ്രഖ്യാപിച്ചത്‌. ബെഞ്ചംഗങ്ങളായ ഡി വൈ ചന്ദ്രചൂഡ്‌ , രോഹിങ്‌ടൻ നരിമാൻ എന്നിവർ എതിർത്തു.

പാഴ്സി സ്‌ത്രീകൾ , ദാവൂദി ബോറ മുസ്ലിങ്ങൾ എന്നിവരെ സംബന്ധിച്ച വിഷയം ശബരിമലയുമായി കൂട്ടിക്കുഴക്കരുതെന്നായിരുന്നു ജസ്‌റ്റിസ്‌ നരിമാന്റെ ഭിന്നവിധി.

​ചോദ്യങ്ങൾ

• അനുച്ഛേദം 25 പ്രകാരം മതസ്വാതന്ത്ര്യത്തിനുള്ള അവകാശത്തിന്റെ വ്യാപ്തിയും പരിധിയും എന്താണ്?

• അനുച്ഛേദം 25 പ്രകാരമുള്ള വ്യക്തികളുടെ മതപരമായ അവകാശങ്ങളും 26 പ്രകാരമുള്ള മതവിഭാഗങ്ങളുടെ അവകാശങ്ങളും തമ്മിലുള്ള ബന്ധം എന്താണ്‌

• മതവിഭാഗത്തിന്റെ അവകാശങ്ങൾ ഭരണഘടനയുടെ മൂന്നാം ഭാഗത്തിലെ പൊതുക്രമം, ധാർമികത, പൊതുജനാരോഗ്യം എന്നിവയ്ക്ക് പുറമെയുള്ള വ്യവസ്ഥകൾക്ക് വിധേയമാണോ?

• അനുച്ഛേദം 25,26 എന്നിവ പ്രകാരം ‘ധാർമികത’ എന്ന വാക്കിന്റെ വ്യാപ്തിയും പരിധിയും എന്താണ്‌. ഇതിൽ ഭരണഘടനാധാർമികത ഉൾച്ചേർക്കപ്പെടുന്നുണ്ടോ

• മതപരമായ ആചാരവുമായി ബന്ധപ്പെട്ടുള്ള ജുഡിഷ്യൽ റിവ്യൂവിന്റെ പരിധിയും വ്യാപ്‌തിയും എത്ര.

• അനുച്ഛേദം 25 (2) (ബി)യിൽ പരാമർശിക്കുന്ന ‘ഹിന്ദുക്കളിലെ വിഭാഗങ്ങൾ ’ എന്ന വാക്കിന്റെ അർഥമെന്താണ്‌.

• ഏതെങ്കിലും മതത്തിലോ മതവിഭാഗത്തിലോപെടാത്ത വ്യക്തിക്ക്‌ മതാചാരങ്ങൾ പൊതുതാൽപര്യ ഹർജിയിലൂടെ ചോദ്യം ചെയ്യാനാകുമോ