ആധാര്‍ കാർഡ് 
തിരിച്ചറിയല്‍രേഖ ; ബിജെപിക്കും തെരഞ്ഞെടുപ്പ് കമീഷനും തിരിച്ചടി

ന്യൂഡൽഹി

ബിഹാറില്‍ കരട്‌ വോട്ടര്‍പ്പട്ടികയിൽനിന്ന്‌ പുറത്തായവര്‍ക്ക് തിരിച്ചറിയൽ രേഖയായി ആധാര്‍ കാര്‍ഡ് സമർപ്പിക്കാമെന്ന് സുപ്രീം
കോടതി. തെരഞ്ഞെടുപ്പ്‌ കമീഷൻ നിർദേശിച്ച 11 രേഖകൾക്ക് പുറമെ ആധാറും തിരിച്ചറിയൽ രേഖയായി പരിഗണിക്കണം. ആധാര്‍ അംഗീകരിക്കില്ലെന്നായിരുന്നു കമീഷൻ നിലപാട്.

തീവ്ര പുനഃപരിശോധനയിൽ പുറന്തള്ളപ്പെട്ടവരെ രാഷ്‌ട്രീയപാർടികൾ സഹായിക്കണമെന്നും ജസ്റ്റിസുമാരായ സൂര്യകാന്ത്, ജോയ്‌മല്യ ബാഗ്ചി എന്നിവരുടെ ബെഞ്ച്‌ ഇടക്കാല ഉത്തരവിൽ നിര്‍ദേശിച്ചു. പുറത്താക്കപ്പെട്ടവരുടെ പരാതികൾ കേൾക്കാനും വോട്ടർപ്പട്ടികയിൽ ചേർക്കാനുമുള്ള അപേക്ഷകൾ സമർപ്പിക്കാൻ വഴിയൊരുക്കാനും ബൂത്ത്‌ ഏജന്റുമാരെ പാർടികൾ നിയോഗിക്കണം. പുറന്തള്ളപ്പെട്ട 65 ലക്ഷം വോട്ടർമാരുടെ പേരുവിവരവും പുറത്താക്കിയതിന്റെ കാരണവും പ്രസിദ്ധീകരിക്കണമെന്ന്‌ സുപ്രീംകോടതി നിർദേശിച്ചിരുന്നു. ഇതുപ്രകാരമുള്ള പട്ടിക കമീഷൻ പുറത്തുവിട്ടിട്ടുണ്ട്‌.

സിപിഐ എം അടക്കം ബിഹാറിലെ 12 ദേശീയ, സംസ്ഥാന പാർടികളെ കേസിൽ കക്ഷിചേർക്കാനും എല്ലാവരും മറുപടി ഫയൽ ചെയ്യാനും നിര്‍ദേശിച്ചു. ഇതിനായി പാർടികളുടെ സംസ്ഥാന, ജില്ലാ ഭാരവാഹികൾക്ക്‌ കമീഷൻ കത്തുനൽകണം. പാർടി പ്രവർത്തകർ വോട്ടർമാർക്ക്‌ നൽകുന്ന ഫോം സ്വീകരിച്ച്‌ കമീഷൻ രസീത്‌ നൽകണം. ഉദ്യോഗസ്ഥരെക്കാൾ ആളുകളെ അറിയാവുന്നവരാണ്‌ പാർടി പ്രവർത്തകരെന്നും സുപ്രീംകോടതി നിരീക്ഷിച്ചു.

സംസ്ഥാനത്തെ 1.6 ലക്ഷം പാർടി ഏജന്റുമാർ ദിവസവും പത്തുപേരുകളെങ്കിലും പരിശോധിച്ചാൽ പ്രതിദിനം ഏകദേശം 16 ലക്ഷം പേരുകൾ പരിശോധിക്കാം. എന്നാൽ, ഇത്തരത്തിലുള്ള രണ്ട്‌ പരാതി മാത്രമാണ്‌ പാർടികൾ ഉന്നയിച്ചിട്ടുള്ളു എന്നത്‌ അത്ഭുതപ്പെടുത്തുന്നുവെന്നും എതിർപ്പറിയിക്കാൻ 10 ദിവസം മാത്രമേയുള്ളൂ എന്നും ബെഞ്ച്‌ പറഞ്ഞു. പരാതി സമർപ്പിക്കാൻ പാർടികളെ അനുവദിക്കുന്നില്ലെന്ന ആരോപണമുണ്ടെന്നും കോടതി ചൂണ്ടിക്കാട്ടി.

ഒരു പാർടിയും കോടതിയിൽ എത്തിയിട്ടില്ലെന്ന്‌ കമീഷൻ അഭിഭാഷകൻ രാകേഷ്‌ ദ്വിവേദി വാദിച്ചത്‌ ഹർജിക്കാർ ഖണ്ഡിച്ചു. ആർജെഡിയുടെ എംപി മനോജ്‌ ഝായ്‌ക്കുവേണ്ടിയാണ്‌ താൻ ഹാജരായതെന്ന് മുതിർന്ന അഭിഭാഷകൻ കപിൽ സിബൽ അറിയിച്ചു. സിപിഐ എം, കോൺഗ്രസ്‌, സിപിഐ (എംഎൽ) ലിബറേഷൻ, സിപിഐ, എൻസിപി പാർടികളെ താൻ പ്രതിനിധാനംചെയ്യുന്നതായി അഭിഷേക്‌ മനു സിങ്‌വിയും വ്യക്തമാക്കി. ഇതോടെ, പാർടികൾ സഹകരിക്കുന്നില്ല എന്നായി ദ്വിവേദി. ആധാർ കാർഡുകൾ ഉദ്യോഗസ്ഥർ സ്വീകരിക്കുന്നില്ലെന്ന്‌ അസോസിയേഷൻ ഫോർ ഡെമോക്രാറ്റിക് റിഫോംസിനുവേണ്ടി മുതിർന്ന അഭിഭാഷകൻ പ്രശാന്ത്‌ ഭൂഷൺ പറഞ്ഞു. ഇതുസംബന്ധിച്ച പത്രവാർത്തകൾ വോട്ടർമാരുടെ സംഘടനയ്‌ക്കുവേണ്ടി വൃന്ദ ഗ്രോവർ ബെഞ്ചിന്‌ നൽകി.