എസ്എസ്എൽവി റോക്കറ്റ് സാങ്കേതിക വിദ്യ എച്ച്എഎല്ലിന്

ന്യൂഡൽഹി: ഐഎസ്‍ആർഒയുടെ സ്മോൾ സാറ്റലൈറ്റ് ലോഞ്ച് വെഹിക്കിളി(എസ്എസ്എൽവി)ന്റെ സാങ്കേതികവിദ്യ ഹിന്ദുസ്ഥാൻ എയറോനോട്ടിക്സ് ലിമിറ്റഡിന് (എച്ച്എഎൽ) കൈമാറും. ലേലത്തിൽ എച്ച്എഎൽ വിജയിച്ചതോടെയാണ് സാങ്കേതിക വിദ്യാ കൈമാറ്റത്തിന് അനുമതിയായത്. ഭൂമിയുടെ താഴ്ന്ന ഭ്രമണപഥത്തിൽ 500 കിലോഗ്രാം വരെ ഭാരമുള്ള ഉപഗ്രഹങ്ങളെത്തിക്കാൻ ഉപയോ​ഗിക്കുന്ന ഉപ​ഗ്രഹ സംവിധാനമാണ് എസ്എസ്എൽവി.

ഇന്ത്യൻ നാഷണൽ സ്‌പേസ് പ്രമോഷൻ ആൻഡ് ഓതറൈസേഷൻ സെന്റർ ചെയർമാൻ പവൻ ഗോയങ്കയാണ് ഇക്കാര്യം അറിയിച്ചത്. ഇത് ആദ്യമായാണ് ഐഎസ്ആർഒ റോക്കറ്റിന്റെ സമ്പൂർണ സാങ്കേതിക വിദ്യാ കൈമാറ്റം നടക്കുന്നത്. ഇത് സംബന്ധിച്ച് എച്ച്എഎൽ, ഐഎസ്‍ആർഒ, എൻഎസ്ഐഎൽ, ഇൻ-സ്പേസ് എന്നിവ തമ്മിൽ കരാറിൽ ഒപ്പുവയ്ക്കും. ഇനി എച്ച്എഎല്ലിന് സ്വന്തമായി റോക്കറ്റ് നിർമിച്ച് വിക്ഷേപിക്കാം. 511 കോടി രൂപയ്ക്കാണ് എച്ച്എഎൽ എസ്എസ്എൽവിയുടെ സാങ്കേതിക വിദ്യ സ്വന്തമാക്കിയിരിക്കുന്നത് എന്നാണ് വിവരം.

ചെറിയ ഉപഗ്രഹങ്ങളെ കുറഞ്ഞ സമയത്തിനുള്ളിൽ താഴ്ന്ന ഭ്രമണപഥത്തിലേക്ക് വിക്ഷേപിക്കുന്നതിനാണ് എസ്എസ്എൽവി വികസിപ്പിച്ചെടുത്തിരിക്കുന്നത്. അടിയന്തര ഘട്ടങ്ങളിൽ പ്രതിരോധ സേനയുടെ ആവശ്യങ്ങൾക്കായി എസ്എസ്എൽവി ഉപയോ​ഗിക്കാറുണ്ട്. 10 കിലോഗ്രാം മുതൽ 500 കിലോഗ്രാം വരെ ഭാരമുള്ള ഉപഗ്രഹങ്ങളെ 500 കിലോമീറ്റർ വൃത്താകൃതിയിലുള്ള ഭ്രമണപഥത്തിലേക്ക് വിക്ഷേപിക്കാൻ എസ്എസ്എൽവിക്ക് കഴിയും.