വിദഗ്ധ തൊഴിലാളികളുടെ സ്രോതസ്; ജർമനിയുടെ കുടിയേറ്റ നയത്തില്‍ ഇന്ത്യയ്ക്ക് മുൻ​ഗണന

ന്യൂഡൽഹി: ജർമനിയുടെ കുടിയേറ്റ നയത്തിൽ ഏറ്റവും മുൻ​ഗണനയുള്ള രാജ്യം ഇന്ത്യയെന്ന് ജർമൻ മൾലാറ്ററൽ അഫേഴ്സ് കമ്മീഷൺ ഫ്ലോറിയൻ ലോഡി. ജർമനിയിലെത്തുന്നവരിൽ ഏറ്റവും വൈദ​ഗ്ധ്യമുള്ള തൊഴിലാളികൾ ഇന്ത്യയിൽ നിന്നാണെന്നും ഫ്ലോറിയൻ ലോഡി പറഞ്ഞു.

വ്യാഴാഴ്ച നടന്ന ഐക്യരാഷ്ട്ര സഭയിലെ ഇന്ത്യൻ മിഷൻ സംഘടിപ്പിച്ച കുടിയേറ്റ ​ഗവേർണൻസിൽ ഡിജിറ്റൽ നവീകരണത്തിന്റെ സ്വാധീനം എന്ന പരിപാടിയിൽ സംസാരിക്കുന്നതിനിടെയാണ് ഇന്ത്യയെ കുറിച്ചുള്ള പരാമർശം. കുടിയേറ്റക്കാർക്ക് ജർമനിയിൽ ലഭിക്കുന്ന അവസരം, ഇതിലൂടെ ജർമനിയിൽ പരിഹരിക്കപ്പെടുന്ന തൊഴിൽക്ഷാമം, ഇന്ത്യയിലുള്ള വൈദ​ഗ്ധ്യമുള്ള തൊഴിലാളികൾ തുടങ്ങിയ കാരണങ്ങളിൽ ഇരുരാജ്യങ്ങളും തമ്മിലുള്ള സഹകരണം വലുതാണെന്നും അദ്ദേഹം പറഞ്ഞു.

ഇന്ത്യയിൽ നിന്നെത്തുന്നവർക്ക് ശാസ്ത്ര - സാങ്കേതിത മേഖലകളിൽ ഉയർന്ന പരിജ്ഞാനമുണ്ട്. അതിനാൽ ജർമൻ പൗരന്മാർക്ക് ലഭിക്കുന്നതിനേക്കാൾ ശമ്പളം ഇന്ത്യക്കാർക്ക് ലഭിക്കുന്നുണ്ട്. 2025ൽ മാത്രം 1,80,000 തൊഴിലാളികൾ ജർമനിയിലെത്തിയിരുന്നു. കഴിഞ്ഞ 10 വർഷത്തിനിടെ ഇതിൽ വലിയ വർധനവാണ് ഉണ്ടായിരിക്കുന്നത്. വിദ​ഗ്ധ തൊഴിലാലികളുടെ കാര്യത്തിൽ ജർമനിയുടെ ഏറ്റവും വലിയ പങ്കാളിയാണ് ഇന്ത്യ, ഫ്ലോറിയൻ ലോഡി പറഞ്ഞു.