സോണിയാ ​ഗാന്ധിയുടെ ഓർമക്കുറിപ്പുകൾ പ്രസിദ്ധീകരിക്കുമെന്ന് ഹാർപ്പർ കോളിൻസ്

ന്യൂഡൽഹി: മുതിർന്ന കോൺഗ്രസ് നേതാവ് സോണിയാ ​ഗാന്ധിയുടെ ഓർമക്കുറിപ്പായ 'ബിലോങ്ങിങ്; എ ജേണി ഓഫ് ലൗ' പ്രസിദ്ധീകരിക്കുമെന്ന് പ്രസാധകരായ ഹാർപ്പർ കോളിൻസ് ഇന്ത്യ. പുസ്തകത്തിലെ ഉള്ളടക്കങ്ങൾ സംബന്ധിച്ച് പ്രസാധകരായ പെൻ​ഗ്വിൻ റാണ്ടം ഹൗസുമായി തർക്കങ്ങൾ നിലനിൽക്കെയാണ് പ്രഖ്യാപനം. ഓർമ്മക്കുറിപ്പ് നവംബർ 10 ന് ആഗോളതലത്തിൽ പുറത്തിറങ്ങും.

പുസ്തകം പ്രസിദ്ധീകരിക്കണമെങ്കിൽ ഉള്ളടക്കത്തിൽ ചില മാറ്റങ്ങൾ വരുത്തണമെന്നായിരുന്നു പെൻഗ്വിൻ റാൻഡം ഹൗസിന്റെ ആവശ്യം. എന്നാൽ അത് അം​ഗീകരിക്കാനാവില്ലെന്നും പുസ്തകം പെൻഗ്വിൻ ഇന്ത്യയിൽ പ്രസിദ്ധീകരിക്കുകയോ പുറത്തിറക്കുകയോ ചെയ്യരുതെന്നും സോണിയാ ​ഗാന്ധി പറഞ്ഞിരുന്നു. യുദ്ധാനന്തര ഇറ്റലിയിലെ സോണിയയുടെ ബാല്യകാലം മുതൽ ഇന്ത്യയിലെ ജീവിതം വരെയുള്ള ഓർമകൾ പുസ്തകത്തിലുണ്ടെന്നാണ് വിവരം.